JÉSUS-CHRIST I DYASIN FE'N BO LUC KLELI'N 14 - NYANMIƐN NDƐ'N 1998

Jésus yoli tukpacɛfuɛ kun juejue

¹ Le kun, Jésus ɔli Farizifuɛ'm be kpɛn kun awlo lɔ like dilɛ, wunmiɛn-delɛ-cɛn nun. Be nga be o lɛ'n be niɛn i siin.

² Kɛ ɔ ´yo sɔ'n, bian kun b'ɔ wlawlali'n ɔ jin i nyrun lɛ.

³ Yɛ Jésus usa mmla sifuɛ nin Farizifuɛ'm be kɛ: «?Be kwla yo sran juejue wunmiɛn-delɛ-cɛn annzɛ be yo-man?»

⁴ B'a tɛ-man su. Yɛ ɔ utili tukpacɛfuɛ'n, ɔ yoli i juejue-ɔ, yɛ ɔ seli i kɛ ɔ wɔ.

⁵ I sin ɔ usali be kɛ: «?Amun nun onin yɛ wunmiɛn-delɛ-cɛn'n, sɛ i wa yasua o, sɛ i nannin o tɔ nzue gbo nun'n ɔ ka-man lɛ yi-mɛn i kpɛkun-ɔn?»

⁶ Sanngɛ b'a kwla tɛ-man ndɛ sɔ'n su.

Bia kpakpa su tranlɛ

⁷ I sin ɔ buli nyanndra kun kleli be bɔ be flɛli be kɛ be wa di like'n, yɛlɛ kɛ ɔ wunnin kɛ be kunndɛ bia kpakpa mun yɛ be tran su-ɔ. Ɔ seli be kɛ:

⁸ «Sɛ sran wie flɛ amun nun kun atɔnvlɛ bo'n, nán kpli ko tran bia kpafuɛ'n su nan sɛ sran wie b'ɔ lɛ nyrun tra wɔ'n, bɔ be flɛli i wie'n , sɛ ɔ ba-a,

⁹ sran ng'ɔ flɛli amun nnyɔn'n, ɔ'a se-man wɔ kɛ jao ɔ bia liɛ'n su mɛn i'n ti. Kɛ a ´jao ko tran siɛn lɔ bia liɛ'n su'n, nyannzuɛn ´kun wɔ.

¹⁰ Sanngɛ sɛ sran flɛ wɔ kɛ a wa di like'n, ko tran siɛn lɔ bia liɛ'n su nan sran ng'ɔ flɛli wɔ'n, sɛ ɔ ju lɛ'n ɔ'a se wɔ kɛ: ‹Janvuɛ, bla wa tran bia kpa nga su.› I sɔ'n nun'n, a ´nyan kɔmin be nga a nin be di like'n be nyrun.

¹¹ Afin sran kwlaa ng'ɔ yo i wun dandan'n, Nyanmiɛn ´guɛ i nyin ase, sanngɛ sran ng'ɔ tu-mɛn i wun'n, Nyanmiɛn man ɔ ´nyan nyrun.»

¹² Yɛ ɔ seli sran ng'ɔ flɛli i'n kusu kɛ: «Sɛ a ´flɛ sran kɛ ɔ wa di like'n, sɛ wia nun o, sɛ nnɔsua o, nán flɛ ɔ janvuɛ, nan flɛ ɔ niaan, nin ɔ osufuɛ, ɔ nin ɔ tranfuɛ anyanbeunfuɛ mun nan be kusu b'a flɛ-man wɔ b'a yo-man nga a yo mannin be'n i wunsu a man-man wɔ'n ti.

¹³ Sanngɛ sɛ a ´di cɛn'n, flɛ yalɛfuɛ mun flɛ be bɔ bé sa nin bé ja ti wuwa'n, nin cɛcɛwafuɛ mun, nin anyansifuɛ mun.

¹⁴ Sɛ a yo sɔ'n, Nyanmiɛn wa yo ɔ liɛ ye. Be liɛ'n be lɛ-man like nan b'a yo wie a man wɔ, Nyanmiɛn bɔbɔ yɛ kɛ sran kpa'm be ´cɛn'n, ɔ ´yo ɔ liɛ'n man wɔ-ɔ.»

Be bɔ be flɛ be kɛ be wa di like'n bé wun nyanndra

¹⁵ Kɛ be wo aliɛ'n sin'n, be nun kun tili ndɛ sɔ'n, yɛ ɔ seli Jésus kɛ: «Sran ng'ɔ ´ko di aliɛ Nyanmiɛn mɛn nun'n, i liɛ su ti ye!»

¹⁶ Yɛ Jésus seli i kɛ: «Nian, bian kun tɔnnin aliɛ dan kpa nan ɔ'a flɛ sran kpanngban kpa kɛ be wa di.

¹⁷ Kɛ be wieli like'n yo'n, ɔ sunmɛnnin i sran'n kɛ ɔ ko se be b'ɔ yiali be'n kɛ b'a wie like'n yo nan be bla.

¹⁸ Sanngɛ nga waan, n kwla kɔ-man nga waan n kwla kɔ-man. Be nun kun seli i kɛ: ‹Sɛ a ju lɔ'n, se i kɛ ɔ yaci, m'an to asiɛ wie, be waan, san ndɛ n ´ko nian.›

¹⁹ Yɛ kun kusu waan: ‹Sɛ a ju lɔ'n, se i kɛ ɔ yaci, m'an to nannin blu, n ´ko nian be sɛ be si junman di o.›

²⁰ Yɛ kun ekun waan: ‹N fin bla jalɛ icra'n, i sɔ'n ti n kwla kɔ-man .›

²¹ Kɛ sran sɔ'n sɛli i sin awlo lɔ'n, ɔ kannin be ngbata sɔ'n kleli i min'n. Yɛ awlo bo kpɛn sɔ'n fali ya ɔ seli i sran'n kɛ: ‹Kɔ guasu lɔ nin klɔ'n nun atin-atin'm be su ndɛndɛ, ko flɛ yalɛfuɛ mun nin be bɔ bé sa nin bé ja ti wuwa'n, nin anyansifuɛ mun, ɔ nin cɛcɛwafuɛ mun man be bla.›

²² Kɛ i sran'n wɔli b'ɔ bali'n, ɔ seli i min'n kɛ: ‹Baba, like nga a sunmannin min kɛ n ko yo'n, m'an yo, sanngɛ tranwlɛ'n wie tɛ o lɛ ekun.›

²³ Yɛ i min'n seli i kɛ: ‹Fa atin'm bé su, sin klangla'm bé bo, sran kwlaa bɔ a wun i'n, man ɔ bla, man min sua'n yi.

²⁴ Afin be kwlaa nga n yiali be bɔ b'a ba-man'n, nanwlɛ, bé nuan su kan-man min like'n wie mlɔnmlɔn.› »

Like nga be yo nan b'a su Jésus su'n

²⁵ Le kun kɛ Jésus nin sran kpanngban kpa be ´kɔ lika'n, ɔ jran kpɛli i nyin seli be kɛ:

²⁶ «Sran ng'ɔ ba min sin'n, sɛ ɔ'a kpɔ-mɛn i si, i nin, i yi, i mma mun, i niaan mun, yɛ i bɔbɔ i wun'n, ɔ su kwla yo-man n sɔnnzɔnfuɛ.

²⁷ Yɛ sran ng'ɔ suɛ-mɛn i waka'n ɔ su-man n su'n, ɔ su kwla yo-man n sɔnnzɔnfuɛ.

²⁸ ?Amun nun onin yɛ sɛ i waan ɔ ´kplan nglo sua fleiin kun'n, ɔ dunman mmua tran-man ase bu-mɛn i sika'n nian-man, sɛ i sika'n kwla ´ju i kplanlɛ o?

²⁹ Sɛ ɔ'a yo-mɛn i sɔ'n, nan sɛ ɔ bo i bo bɔ ɔ'a wie-mɛn i yo'n, ɔ cɛ-man nan be kwlaa nga be wun i'n b'a sri i,

³⁰ b'a se kɛ: ‹Bian nga boli sua'n bo, sanngɛ i sa ju-mɛn i yolɛ su kun.›

³¹ ?Yɛ famiɛn onin yɛ sɛ i waan ɔ nin i wiengu famiɛn kun be ´ko kun alɛ'n, ɔ dunman mmua tran-man ase bu-mɛn i akunndan kpa sɛ ɔ nin i be ´kwla kun o? Afin i liɛ'n, ɔ fa sran akpi blu (10.000), sanngɛ kusu i liɛ'n, ɔ fa sran akpi-akpi ablaɔn (20.000).

³² Sɛ ɔ wun kɛ ɔ nin i be su kwla kun-man'n, kɛ famiɛn kun'n tɛ o mmua lɔ'n, ɔ ´sunman sran kɛ be ko guɛ i ase.

³³ I sɔ'n ti, amun nun sran kwlaa nga ɔ'a yaci-mɛn i ninnge'n kwlaa'n, ɔ su kwla yo-man n sɔnnzɔnfuɛ.»

Kɛ njin'n i ta'n ko kpɔ'n

³⁴ ?Njin'n ti like kpa, sanngɛ sɛ i ta'n kpɔ'n, nguɛ yɛ be ´fa yo nan ɔ'a yo fɛ ekun-ɔn?

³⁵ Sɛ be guɛ i asiɛ wun o, sɛ be guɛ i nnɛn waka su nun o, be kwla fa yo-man like fi, blo yɛ be guɛ i-ɔ. Man sran ng'ɔ si fa sie'n, fa sie!