JÉSUS-CHRIST I DYASIN FE'N BO LUC KLELI'N 13 - NYANMIƐN NDƐ'N 1998

Sran'm be nzuɛn kacilɛ ndɛ

¹ Kɛ ɔ yoli sɔ'n, sa bɔ Pilat fa yoli Galilefuɛ wie b'ɔ fa be mmoja'n sanngannin nnɛn nga be fa sɔ Nyanmiɛn'n i mmoja nun'n, le kun sran wie'm be wa kannin i ndɛ kleli Jésus.

² Ɔ usali be kɛ: «?An bu i kɛ Galilefuɛ sɔ'm bé sa tɛ liɛ'n tra Galilefuɛ kun nga'm be liɛ'n ti yɛ man be wunnin nyrɛnnɛn dan sɔ-ɔ?

³ Nɛ́n i sɔ ti-ɔ, sanngɛ sɛ amu'an kaci-man amun nzuɛn'n, nanwlɛ, amun kwlaa amun wa wu kɛ be liɛ'n sa.

⁴ ?Yɛ sran blu-nin-mɔcuɛ bɔ Silɔe akpa fleiin'n bu tɔli be su kunnin be'n, an bu i kɛ bé wun sa liɛ'n tra Zerizalɛmfuɛ'n kwlaa be liɛ'n?

⁵ Nɛ́n i sɔ ti-ɔ, sanngɛ sɛ amu'an kaci-man amun nzuɛn'n, nanwlɛ, amun kwlaa amun wa wu kɛ be liɛ'n sa.»

Figie b'ɔ su-man'n i wun nyanndra

⁶ Ɔ bu nyanndra nga kleli be. Ɔ seli be kɛ: «Bian kun tali figie bo kun i vinyi fie'n nun. I waan ɔ wa nian sɛ ɔ suli-ɔ ɔ ´ti, sanngɛ ɔ'a su-man.

⁷ Yɛ ɔ seli vinyi fie'n i sunianfuɛ'n kɛ: ‹Nian, figie bo kun nga, kɛ m bɛ i nianlɛ nan sɛ mma o su-ɔ n ´ti'n, bɔ ɔ'a su-man'n, i afuɛ nsan yɛ, i sɔ'n ti, bu i bo. ?Nguɛ yɛ ɔ jin lɛ yo-ɔ?›

⁸ Sanngɛ vinyi fie'n i sunianfuɛ'n seli i kɛ: ‹Baba, yaci i lɛ, man e niɛn afuɛ nga ekun, m ma fufu i bo, yɛ n ´guɛ i bo nnɛn waka su.

⁹ Sɛ e yo i sɔ-ɔ wienun-ɔn afuɛ b'ɔ ba lɔ'n, ɔ ´su. Sɛ e yo i sɔ nan ɔ'a su-man'n, a ko bu i bo.› »

Bla cɛcɛwafuɛ kun i juejue yolɛ

¹⁰ Wunmiɛn-delɛ-cɛn kun nun Jésus kleli like Nyanmiɛn ndɛ suanlɛ nin i srɛlɛ sua kun nun.

¹¹ Kɛ ɔ ´yo sɔ'n, bla kun o lɛ, asiɛ usu wie sacili i, ɔ'a di afuɛ blu-nin-mɔcuɛ, kɛ ɔ ´nanti'n, ɔ klu, ɔ kwla tinngɛ-mɛn i wun mlɔnmlɔn.

¹² Kɛ Jésus wunnin bla sɔ'n, ɔ flɛli i, yɛ ɔ seli i kɛ: «Mmo, ɔ tukpacɛ'n ɔ'a wie, w'a nyan ɔ ti,» yɛ ɔ fɛ i sa fuɛli i su-ɔ.

¹³ Bé ja osu kunngba'n nun lɛ kpɛkuun ɔ'a tinngɛ, nan ɔ'a la Nyanmiɛn ase.

¹⁴ Sanngɛ bla i juejue bɔ Jésus yoli i wunmiɛn-delɛ-cɛn nun'n, ɔ yoli Nyanmiɛn ndɛ suanlɛ nin i srɛlɛ sua su kpɛn'n i ya, nan ɔ'a se sran'm be kɛ: «Cɛn nga be fa di junman'n ɔ ti cɛn ba nsiɛn, an `bla cɛn sɔ'm be nun man be yo amun juejue, nán an ba wunmiɛn-delɛ-cɛn nun kun .»

¹⁵ Yɛ e Min'n seli kɛ: «?Amun dunman klofuɛ mun, amun nun onin yɛ wunmiɛn-delɛ-cɛn nun ɔ nyannji-mɛn i nannin annzɛ i aflunmun b'ɔ o tuin'n nun'n ɔ ko mɛn-mɛn i nzue-ɔ?

¹⁶ ?Yɛ bla nga li b'ɔ ti Abraam anunman bɔ Satan cili i ɔ'a di afuɛ lele blu-nin-mɔcuɛ'n, i yɛ sɛ n nyannji i wunmiɛn-delɛ-cɛn nun'n ɔ ti-mɛn i su-ɔ?»

¹⁷ Kɛ ɔ kannin sɔ'n, i kpɔfuɛ'm be kwlaa bé nyin guali ase, yɛ abonuan sa b'ɔ yoli be'n be kwlaa ti sran'm be kwlaa be klun jɔli.

Mutard'n i wun nyanndra

¹⁸ Ɔ seli be ekun kɛ: «?Nyanmiɛn sielɛ'n fa nguɛ, yɛ nguɛ yɛ n ´fa sunnzun i-ɔ?

¹⁹ Ɔ fa mutard mma bɔ sran kun fa luɛ i fie'n su'n, ɔ fifi, ɔ yo waka dan, anunman'm be wa yo bé sua i sama'm be su.»

Kpaun ayre'n i wun nyanndra

²⁰ Ɔ seli be ekun kɛ: «?Nguɛ yɛ n ´fa Nyanmiɛn sielɛ'n sunnzun i-ɔ?

²¹ Ɔ fa kpaun ayre bɔ bla kun fa gua ble sanmlɛn b'ɔ ju kilo ablaɔn-nin-nnun nun, nan i wunmuan'n ɔ'a wla'n.»

Anuan fii'n

²² Kɛ Jésus ´kɔ Zerizalɛm'n, ɔ sin klɔ dandan mun nin klɔ kanngan'm be su ɔ kle sran'm be like.

²³ Sran wie wa usɛli i kɛ: «?Nannan, sran kaan sa yɛ be ´fite nun-ɔn?» Ɔ seli be kɛ:

²⁴ «An `mian amún nyin an `sin anuan fii'n nun. Afin an `nian, sran kpanngban be klo kɛ be ´sin nun, sanngɛ be su kwla sin-man.

²⁵ Kɛ awlo bo kpɛn'n ko to anuan nun'n, amun bɔ an ka gua su lɔ'n, amun ´bobo anuan'n amun ´se kɛ: ‹Nja, tike ye anuan!› Yɛ ɔ ´se amun kɛ: ‹N si-man amun finwlɛ.›

²⁶ Yɛ amun ´se i kɛ: ‹E nin wɔ e wlali asa, yɛ a kleli like e klɔ'n su.›

²⁷ Yɛ i kusu ɔ ´se amun kɛ: ‹Amun kwlaa bɔ an yo sa tɛ'n, an `fa jao min wun lɛ, n si-man amun finwlɛ.›

²⁸ Kɛ an ´ko wun Abraam, nin Izaak, nin Zakɔb, ɔ nin Nyanmiɛn nuan ijɔfuɛ'm be kwlaa Nyanmiɛn mɛn'n nun bɔ amun kusu be ´kan amún bo an ka guasu lɔ'n, amun ´sun, yɛ amun ´di amun je.

²⁹ Sran wie'm be wa fin wia afiliɛ, nin sɛnzɛ atɔliɛ, nin papla nun lɔ, ɔ nin bue kun ekun lɔ be ´ba, be wa di like Nyanmiɛn mɛn'n nun.

³⁰ An `nian, be nga be dunnin mmua'n be wie'm be wa ka siɛn, yɛ be nga be kali siɛn'n, be wie'm be wa dun mmua.»

Kokolɛ nga Jésus kokoli Zerizalɛm ti'n

³¹ Le kunngba sɔ'n, Farizifuɛ wie'm be wa seli Jésus kɛ: «Erɔd waan ɔ nyan wɔ-ɔ ɔ ´kun wɔ, i sɔ'n ti'n, jao wa.»

³² Yɛ ɔ seli be kɛ: «An `ko se gblɛfuɛ tɛ sɔ'n kɛ, ndɛ nin ainman n ´fuan asiɛ usu mun, yɛ n ´yo sran'm be juejue, i lɛ nsan su yɛ n ´wie n junman'n di-ɔ.

³³ Sanngɛ san n ´nanti ndɛ, nin ainman, ɔ nin ainman sin, afin kɛ Nyanmiɛn nuan ijɔfuɛ kun yaci Zerizalɛm lɛ ko wu klɔ uflɛ su'n, ɔ ti-mɛn i nuan su.

³⁴ Ɔo Zerizalɛmfuɛ mun! Zerizalɛmfuɛ'm bɔ an kun Nyanmiɛn nuan ijɔfuɛ mun'n, bɔ an fin be nga be sunman be amún sin'n be yɛbuɛ'n, blɛ sunman n klo kɛ n ´flɛ amun kɛ akɔ ta kun flɛ i mma mun ɔ utu be su'n sa, sanngɛ amu'an kplin-man su!

³⁵ An `nian, amun awlo'n ɔ wa ka amún sa nun, yɛ ndɛ kun bɔ n ´kan kle amun'n yɛ, an su wun-man min kun lele san amun ´se kɛ: ‹Sran ng'ɔ ba e Min Nyanmiɛn'n i dunman nun'n, man Nyanmiɛn yo i liɛ ye .› »