JÉSUS-CHRIST I DYASIN FE'N BO LUC KLELI'N 10 - NYANMIƐN NDƐ'N 1998

Jésus sɔnnzɔnfuɛ ableso-nin-nnyɔn be sunmanlɛ

¹ Kɛ ɔ yoli sɔ'n, e Min'n kpali sran ableso-nin-nnyɔn ekun, ɔ sunmannin be nnyɔn-nnyɔn kɛ be dun mmua klɔ nin lika nga i bɔbɔ ɔ wa sin lɛ'm be nun.

² Ɔ seli be kɛ: «Awie'n ɔ'a yo ye dan, sanngɛ junman difuɛ'm b'a sɔn-man. I sɔ'n ti'n, an `se fie i fuɛ'n man ɔ fa sran nan be wɔ i fie'n su.

³ An `nian, n ´sunman amun bɔ an ti kɛ bua sa'n gboklo'm be afiɛn, an `wɔ.

⁴ Kɛ amun ´kɔ'n, nán an fa pata, nán an fa trɔ, nin ngbabua, nán an yo sran like atin'n nun.

⁵ Awlo kwlaa nga an wlu nun'n, kɛ an wlu lɔ cɛ'n, an `yo be like se kɛ: ‹Man alaje tran awlo nga nun!›

⁶ Sɛ sran wɛtɛɛfuɛ wie o awlo sɔ nun'n, man ɔ nyan alaje, sanngɛ sɛ i sɔfuɛ nun-man lɛ'n, nán man amún nuan yralɛ'n yo ye.

⁷ An `sike awlo sɔ'n nun, like kwlaa nga be di i lɛ'n, an `di wie, afin junman difuɛ'n i sa ka-man ngbɛn. Nán an tu wɔ awlo uflɛ nun .

⁸ Klɔ kwlaa nga an ju su bɔ be sɔ amun nun'n, like nga be fa man amun'n, an `di.

⁹ An `yo tukpacɛfuɛ nga be o lɛ'n be juejue, an `se be kɛ, Nyanmiɛn sielɛ'n ɔ nin be ɔ'a ka koko.

¹⁰ Sanngɛ klɔ kwlaa nga an ju su bɔ be sɔ-man amun nun'n, an `jran gua'n su, an `se kɛ:

¹¹ ‹Amun bɔbɔ amun klɔ'n su ndutre b'ɔ wo é ja wun'n, e ´kpukpu guɛ i amún wun, sanngɛ man amun si kɛ Nyanmiɛn i sielɛ blɛ'n ɔ'a mantan.›

¹² Nanwlɛ, jɔlɛ dilɛ cɛn'n nun, Sodɔm i nyrɛnnɛn liɛ'n, ɔ ´yo sɔsɔ tra klɔ sɔ'n i liɛ'n .»

Klɔ nga be lafi-man Jésus su'n

¹³ «Kɔrazɛnfuɛ mun, an yako! Bɛtsaidafuɛ mun, an yako! Afin sɛ ɔ ti kɛ sa kekleekle bɔ be yoli be amun klɔ su'n yɛ be yoli be Tir nin Sidɔn'n, wuun lɔfuɛ'm be wlali bajɛ tralɛ, be trannin nzuɛn nun, yɛ wuun be kacili be nzuɛn'n ɔ'a cɛ .

¹⁴ Ɔ man jɔlɛ dilɛ cɛn'n nun'n, Tir nin Sidɔn be nyrɛnnɛn liɛ'n ɔ ´yo sɔsɔ tra amun liɛ'n.

¹⁵ ?Kapɛrnaɔmfuɛ mun, amun kusu an bu i kɛ be wa bo amun dunman lele ju Nyanmiɛn su lɔ? Ɔ su yo-man sɔ, be wa gua amún nyin ase blɔlɔ lɔ.

¹⁶ Sran ng'ɔ fa amun ndɛ'n su'n, wuun min ndɛ'n su yɛ ɔ'a fa-a. Sanngɛ sran ng'ɔ sɔ-man amun nun'n, wuun ɔ'a sɔ-man min nun, yɛ sran ng'ɔ sɔ-man min nun'n, wuun ɔ'a sɔ-man sran ng'ɔ sunmannin min'n, i nun.»

Jésus sɔnnzɔnfuɛ ableso-nin-nnyɔn be balɛ

¹⁷ Kɛ sran ableso-nin-nnyɔn'm be ɔli be bali'n, be klun jɔli, yɛ be seli kɛ: «Nannan, kɛ e bo ɔ dunman'n, asiɛ usu'm be sro ye.»

¹⁸ Ɔ seli be kɛ: «N wunnin Satan ɔ fin nyanmiɛn su lɔ kɛ nyanmiɛn b'ɔ kpa sin'n sa, ɔ tɔli.

¹⁹ Nian, n seli amun kɛ, m mannin amun kwlalɛ, ɔ man amun ´tia wuo nin nyannglan'm be su, amun ´kwla kpɔfuɛ'n, yɛ like fi su yo-man amun.

²⁰ Kannzɛ n seli sɔ'n, nán amun klun jɔ ninnge'm bɔ be sro amun'n ti, sanngɛ man amun klun jɔ amun dunman bɔ b'a klɛ i nyanmiɛn su lɔ'n ti .»

Jésus klun jɔli

²¹ I osu kunngba'n nun Nyanmiɛn Wawɛ'n man Jésus klun jɔli dan kpa, nan ɔ'a se kɛ: «N Si, wɔ bɔ a sie like'n kwlaa Nyanmiɛn su lɔ nin asiɛ'n su wa'n, kwla o, yɛlɛ kɛ a fa ninnge nga mun fiali ngwlɛlɛfuɛ nin be bɔ be si sa'n bé wun, sanngɛ a yi be nglo kleli be bɔ be ti kɛ ba kanngan mun sa'n. N Si, kwla o, ɔ klun sa nga a yoli'n ti yɛ n la wɔ ase-ɔ.

²² N Si yɛ ɔ fali like'n kwlaa mannin min-ɔn. Sran fi si-man Nyanmiɛn Wa'n, san i Si kunngba yɛ ɔ si i-ɔ, yɛ sran fi si-man Nyanmiɛn Wa'n i Si'n, san Ba'n bɔbɔ ɔ nin sran ng'ɔ klo kɛ ɔ ´fɛ i Si kle i'n, i yɛ ɔ si i-ɔ.»

²³ Ɔ kpɛli i nyin i sɔnnzɔnfuɛ'm be wun lɔ, ɔ wɔ i nuan ase seli be kɛ: «Be nga be wun like nga an wun be yɛ'n, be liɛ su ti ye!

²⁴ Afin an `nian, Nyanmiɛn nuan ijɔfuɛ nin famiɛn kpanngban be klo kɛ be ´wun like nga an wun be yɛ'n, sanngɛ b'a wun-mɛn i, yɛ be klo kɛ be ´ti ndɛ nga an ti be yɛ'n, sanngɛ b'a ti-man.»

Samari bian kpa'n i wun nyanndra

²⁵ Mmla sifuɛ kun waan ɔ ´kan Jésus nian ti ɔ jaoli nan ɔ'a usɛ i kɛ: «?Nja, nguɛ yɛ n `yo nan m'an nyan anannganman nguan nin-ɔn?»

²⁶ Jésus kusu usɛli i kɛ: «?Be klɛli i sɛ mmla fluwa'n nun? ?Yɛ kɛ a kanngan'n, ɔ se sɛ?»

²⁷ Yɛ ɔ seli i kɛ: «Amun klo amun Min Nyanmiɛn'n kpa, amun fa amún wla'n kwlaa guɛ i su, amun fa amun wunmuan'n kwlaa mɛn i, yɛ man amun akunndan'n kwlaa trɛn i su, yɛ amun klo amun wiengu kɛ an fa klo amun bɔbɔ amun wun'n sa .»

²⁸ Jésus seli i kɛ: «Kɛ ɔ ti sɔ-ɔ, yo i sɔ, a ´nyan nguan.»

²⁹ Sanngɛ ɔ klo kɛ be bu i sran kpa, i sɔ'n ti ɔ usali Jésus kɛ: «?Wan yɛ ɔ ti n wiengu nin-ɔn?»

³⁰ Yɛ Jésus seli i kɛ: «Bian kun fin Zerizalɛm ɔ su kɔ Zeriko, ɔ ko tɔli kodiawiefuɛ'm be nun, be deli i wun ninnge'n kwlaa, be boli i lele, kɛ ɔ ka kaan ɔ ´wu'n, yɛ be yacili lɛ ɔli-ɔ.

³¹ Nyanmiɛn nyrun jranfuɛ kun ´sin atin kunngba sɔ'n su, ɔ wunnin bian sɔ'n, ɔ sɛnnin i wun ɔli.

³² Yɛ Levifuɛ kun kusu ´sin lɛ'n, ɔ wunnin bian sɔ'n, ɔ sɛnnin i wun ɔli.

³³ Sanngɛ Samarifuɛ kun b'ɔ su kɔ lika'n, ɔ ko fiteli i su, kɛ ɔ wunnin i'n, ɔ yoli i annvɔ.

³⁴ Ɔ guɛguɛli i kannin'm be nun ngo nin nzan, nan ɔ'a cici bé su, yɛ ɔ fɛ fuli nnɛn'n bɔ i bɔbɔ fu su'n i su-ɔ, ɔ fɛ ɔli aofuɛ sua kun nun, ɔ niɛnnin i lika.

³⁵ Kɛ aliɛ cɛnnin'n, ɔ yili denie nnyɔn mannin aofuɛ sua'n i sunianfuɛ, ɔ seli kɛ: ‹Niɛn i lika kpa, like nga a mɛn i ekun'n, sɛ m ba'n, n ´yi i nuan like man wɔ.›

³⁶ ?Be sran nsan sɔ'n, ɔ nyrun'n, be nun onin yɛ ɔ niannin bian b'ɔ tɔli kodiawiefuɛ'm be nun'n i lika kɛ i wiengu sran sa-a?»

³⁷ Yɛ i waan: «Yɛlɛ nga b'ɔ sili i aunnvuɛ'n.» Yɛ Jésus seli i kɛ: «Ɔ kusu, ko yo i kunngba sɔ'n.»

Jésus i Mart nin Mari bé wun wunlɛ

³⁸ Kɛ Jésus nin i sɔnnzɔnfuɛ'm be ´kɔ bɔ be juli klɔ kun su'n, Jésus wluli klɔ'n nun, nan bla kun bɔ be flɛ i kɛ Mart'n ɔ'a sike i kpa.

³⁹ I niaan bla kun be flɛ i kɛ Mari, ɔ trannin ase e Min'n i wun lɛ, ɔ tie i ndɛ b'ɔ kan'n.

⁴⁰ Sanngɛ Mart nyin ti blowa be lika nianlɛ'n ti. Ɔ bali e Min'n i wun lɛ, ɔ seli i kɛ: «?Kɛ min niaan'n yaci like'n kwlaa min sa nun'n, ɔ yo-man ɔ ya? Se i man ɔ uka min.»

⁴¹ E Min'n seli i kɛ: «Mart, Mart, a koko, yɛ ɔ́ nyin blo like sunman su.»

⁴² Sanngɛ like kunngba cɛ yɛ ɔ ti kpa-a, Mari a fɛ i nun kpafuɛ'n, sran fi su de-mɛn i sa nun.