Kalɛ 9 - NYANMIƐN NDƐ'N 1998

Delɛ-cɛn'n i dilɛ

¹ Anannganman kannin ndɛ kleli Moiz Sinai aawlɛ flɛnnɛn'n nun lɔ. Kɛ Izraɛlfuɛ'm be tuli bé bo Ezipt lɔ'n, be afuɛ nnyɔn su'n i anglo klikli'n nun'n, ɔ seli i kɛ:

² «Cɛn nga n kleli su'n, man Izraɛlfuɛ'm be di Delɛ-cɛn'n.

³ Amun `di cɛn sɔ'n i blɛ nga n kleli'n su. Amun `di i anglo ng'ɔ o yɛ'n i le blu-nin-nnan'n i nnɔsua nun. Amun `niɛn i mmla'n nin i siesielɛ nga be fa siesieli'n su be yo.»

⁴ Moiz seli Izraɛlfuɛ'm be kɛ be `di Delɛ-cɛn'n,

⁵ nan b'a di cɛn sɔ'n anglo klikli'n i cɛn ba blu-nin-nnan'n su i nnɔsua nun Sinai aawlɛ flɛnnɛn'n nun lɔ. Nga Anannganman fa kleli Moiz'n i su yɛ Izraɛlfuɛ'm be niannin be yoli-ɔ.

⁶ Sanngɛ sran wie'm be kannin fuɛn, i ti be yoli fiɛn cɛn sɔ'n nun. Ɔ man b'a kwla di-man Delɛ-cɛn'n wie. Be ko toli Moiz nin Aarɔn,

⁷ yɛ be seli be kɛ: «E kannin fuɛn i ti y'a yo fiɛn. ?Nguɛ ti yɛ blɛ nga be kleli'n su'n, be kplin-man su kɛ e `ko yi e cɛlɛ ninnge mun kɛ Izraɛlfuɛ kun nga'm be sa-a?»

⁸ Moiz seli be kɛ: «Amun `jran man n usa nan n si sa nga Anannganman waan amun `yo'n ka.»

⁹ Anannganman seli Moiz kɛ:

¹⁰ «Kan kle Izraɛlfuɛ'm be kɛ: Sɛ amun nun sran wie'm annzɛ amun osu nunfuɛ wie be kan fuɛn'n, wuun b'a yo fiɛn'n, sɛ wie kusu be ɔli lika mmua wie'n, sanngɛ ɔ nin i sɔ'n ngba'n, man be di Delɛ-cɛn'n be `fa manman min.

¹¹ Sanngɛ anglo i nnyɔn su'n, i le blu-nin-nnan'n i nnɔsua nun yɛ be `di be cɛn liɛ nin-ɔn. Man be di bua bɔ b'a kpɛ cro'n bɔ be fa yili tɛ'n nin kpaun bɔ b'a gua-man nun kpaun ayre'n, yɛ ijre wiwi mun.

¹² Nán be yaci wie lɛ man aliɛ cɛn su, nán be fufu nnɛn'n i owie'n. Man be nian Delɛ-cɛn'n su be `di i kɛ be kleli be kɛ be `di'n sa .

¹³ Sɛ sran kun ti saun'n, sɛ kusu ɔ'a ɔ-man lika nan i waan ɔ di-man Delɛ-cɛn'n wie'n, man be tu i min nvlefuɛ'm be afiɛn, kɛ bɔ sran sɔ'n ɔ'a yi-mɛn i cɛlɛ ninnge nga be kleli i blɛ kɛ be `yi'n ti'n, ɔ wa sua i tɛ trɔ'n.

¹⁴ Sɛ aofuɛ wie'm be o amun mɛn'n nun nan be waan be ´di Delɛ-cɛn'n wie be ´manman min'n, man be yo i kɛ n fa siesieli bɔ n kleli kɛ be fa `di'n sa. Kɛ ɔnvuɛ'm be fa di be liɛ'n yɛ aofuɛ'm be kusu be `fa di be liɛ nin-ɔn.»

Sin wɛnsrɛn'n

¹⁵ Cɛn kunngba nga be kplannin Nyanmiɛn i sua'n, sin wɛnsrɛn'n ɔ wa katali tannin sua sɔ'n bɔ i nun yɛ yɛbuɛ paplapa nga be klɛli Nyanmiɛn i mmla blu'n i su'n ɔ o nun'n i su. Kɔnguɛ'n, sin wɛnsrɛn sɔ'n kpaja lele aliɛ'n fa cɛn weiin .

¹⁶ Kɛ ɔ fin lɛ'n, kɛ ɔ yo sɔ tititi-ɔ. Sin wɛnsrɛn'n kata Nyanmiɛn i lika'n su. Yɛ kɔnguɛ'n sin wɛnsrɛn'n ɔ kpaja.

¹⁷ Kɛ sin wɛnsrɛn'n ko tu i bo tannin sua'n su'n, wuun Izraɛlfuɛ'm be su tu bé bo be ´kɔ lika uflɛ. Kan sin wɛnsrɛn'n ko jran lɛ'n, wuun be su jran.

¹⁸ Kɛ Izraɛlfuɛ'm be ´tu bé bo'n, Anannganman yɛ ɔ se be yɛ be kɔ-ɔ, yɛ kɛ be jran'n bɔ be ´bo be nanmue uflɛ'n, Anannganman yɛ ɔ se be kɛ be bo-ɔ. Sɛ sin wɛnsrɛn'n tɛ o tannin sua'n su'n, be tu-man bé bo.

¹⁹ Blɛ bɔ sin wɛnsrɛn'n tɛ o tannin sua'n i ti su'n, Izraɛlfuɛ'm be nian Nyanmiɛn i mmla'n su, be tu-man bé bo.

²⁰ Wienun-ɔn sin wɛnsrɛn'n ɔ di-man cɛn pɛ nan ɔ'a tu i bo, sɛ Anannganman kan kle be kɛ be tran lɛ'n, be tran lɛ, sɛ kusu Anannganman kan kle be kɛ be tu be bo'n, kpɛkuun be su tu bé bo.

²¹ Sɛ sin wɛnsrɛn'n ka sua'n su lɛ kɔnguɛ, nan kpɛkuun kɛ aliɛ'n ´cɛn-ɔn, ɔ tu i bo'n, be kusu be tu bé bo. Sɛ sin wɛnsrɛn'n di kɔnguɛ kun nin wia su kun nan ɔ tu i bo'n, Izraɛlfuɛ'm be tu bé bo wie.

²² Sɛ sin wɛnsrɛn'n ka Nyanmiɛn tannin sua'n su lɛ sɛ cɛn ba nnyɔn o, sɛ anglo kun o, annzɛ afuɛ kun o, Izraɛlfuɛ'm be tran lɛ, be kɔ-man lika. Kɛ ɔ ´tu i bo'n, wuun be kusu be su tu bé bo wie.

²³ Kɛ Anannganman ko se be kɛ be `sua be ngblaliɛ'n i wun ninnge mun'n, wuun be su sua. Sɛ i waan be tu bé bo'n, wuun be su tu bé bo. Anannganman i mmla ng'ɔ fa wla Moiz nuan'n, i su yɛ be nanti-ɔ.