Kalɛ 7 - NYANMIƐN NDƐ'N 1998

Kakaklolo bɔ be mannin kɛ be fa di Nyanmiɛn i lika'n nun junman'n

¹ Kɛ Moiz wieli Nyanmiɛn i lika'n i kplan'n, ɔ guali su ngo yɛ ɔ fa wlali Anannganman bɔbɔ sa nun. Ɔ fali lika sɔ'n i nun ninnge mun wlɛli i sa nun. I sin ɔ fali Nyanmiɛn sɔwlɛ'n nin i wun ninnge mun wlali Anannganman bɔbɔ sa nun ekun. Ɔ guali ninnge sɔ'm be kwlaa be su ngo.

² Izraɛl mɛn i nun sran'm bɔ be ti bé si'm be awlobo kpɛnngbɛn'n, be mannin cɛlɛ ninnge mun. Kpɛnngbɛn sɔ'm be yɛ be yoli dunman klɛlɛ junman'n i su kpɛn mun-ɔn.

³ Be fali be cɛlɛ ninnge mun fa blɛli Anannganman. Ninnge sɔ mun yɛ: kakaklolo bɔ nnɛn yɛ ɔ cuɛn be'n bɔ be su ti katawa'n i sɔ nsiɛn, ɔ nin nannin blu-nin-nnyɔn. Kakaklolo sɔ'n, kun ti kpɛnngbɛn nnyɔn be liɛ, kun ti kpɛnngbɛn nnyɔn be liɛ, yɛ nannin'm be ti kpɛnngbɛn sɔ'm be ti nun kunngun. Be fa be ɔli tannin sua'n i nyrun lɔ.

⁴ Anannganman seli Moiz kɛ:

⁵ «Sɔ cɛlɛ ninnge sɔ'm be nun. Man be fa kakaklolo sɔ mun be nin nannin sɔ mun be fa di tannin sua nga n yi min wun nglo nun'n i su junman'n. Nian kɛ Levifuɛ'm be junman'n ɔ fa ti'n su man be.»

⁶ Moiz fali kakaklolo mun nin nannin mun bɔ be fa bali'n mannin Levifuɛ mun.

⁷ Gɛrsɔnfuɛ'm be junman wafa bɔ be di'n ti, ɔ fali kakaklolo nnyɔn nin nannin nnan mannin be.

⁸ Ɔ mannin Mɛrarifuɛ'm be kakaklolo nnan ɔ nin nannin mɔcuɛ, kɛ be junman'n ɔ fa ti ju'n, i su yɛ be niannin be mannin be-ɔ. Be junman sɔ'n i dilɛ nun'n, Nyanmiɛn nyrun jranfuɛ Aarɔn i wa Itamar yɛ ɔ nian bé su-ɔ.

⁹ Sanngɛ ɔ'a man-man Keatfuɛ'm be wie. Sa ti bɔ ɔ'a man-man be wie'n yɛlɛ kɛ be yɛ be nian ninnge nga be ti Nyanmiɛn liɛ'n bé su-ɔ. Ninnge sɔ'm be kusu be wati su yɛ be sua be-ɔ.

Like nga Izraɛl awlobo kpɛn'm be yili i Nyanmiɛn sɔwlɛ'n i nglo yilɛ nun'n

¹⁰ Le kun nga bɔ be wa yi Nyanmiɛn i sɔwlɛ'n i nglo'n, kpɛnngbɛn'm be fali cɛlɛ ninnge'm be bali. Kɛ be guali be su ngo'n, be fa be bali Nyanmiɛn sɔwlɛ'n i nyrun lɛ.

¹¹ Anannganman seli Moiz kɛ: «Man kpɛnngbɛn'm be bla kunngun nan be wa yi be cɛlɛ ninnge nga be ´fa yi min sɔwlɛ'n i nglo'n.» Man cɛn kun sran kun blɛ i liɛ, cɛn kun sran kun blɛ i liɛ.

^12-83 Wafa nga be fa bali'n yɛ: Cɛn i klikli su'n: Aminadab i wa Naksɔn b'ɔ fin Zida akpasua'n su'n yɛ ɔ fa i cɛlɛ ninnge liɛ'n bali-ɔ. Cɛn ba nnyɔn su'n: Ziar i wa Nɛtaneɛl b'ɔ fin Isakar akpasua'n su'n yɛ ɔ fɛ i liɛ'n bali-ɔ. Cɛn ba nsan su'n: Elɔn i wa Eliab b'ɔ fin Zabilɔn akpasua'n su'n yɛ ɔ fɛ i liɛ'n bali-ɔ. Cɛn ba nnan su'n: Sɛdeir i wa Elizir b'ɔ fin Ribɛn akpasua'n su'n yɛ ɔ fɛ i liɛ'n bali-ɔ. Cɛn ba nnun su'n: Zirisadai i wa Sɛlimiɛl b'ɔ fin Simeɔn akpasua'n su'n yɛ ɔ fɛ i liɛ'n bali-ɔ. Cɛn ba nsiɛn su'n: Deiɛl i wa Eliazaf b'ɔ fin Gad akpasua'n su'n yɛ ɔ fɛ i liɛ'n bali-ɔ. Cɛn ba nso su'n: Amiid i wa Elisama b'ɔ fin Efraim akpasua'n su'n yɛ ɔ fɛ i liɛ'n bali-ɔ. Cɛn ba mɔcuɛ'n su'n: Pɛdazir i wa Gamliɛl b'ɔ fin Manase akpasua'n su'n yɛ ɔ fɛ i liɛ'n bali-ɔ. Cɛn ba ngwlan su'n: Gidɛɔni i wa Abidan b'ɔ fin Bɛnzamɛn akpasua'n su'n yɛ ɔ fɛ i liɛ'n bali-ɔ. Cɛn ba blu'n su'n: Amisadai i wa Aiezɛr b'ɔ fin Dan akpasua'n su'n yɛ ɔ fɛ i liɛ'n bali-ɔ. Cɛn ba blu-nin-kun su'n: Ɔkran i wa Pagiɛl b'ɔ fin Azɛr akpasua'n su'n yɛ ɔ fɛ i liɛ'n bali-ɔ. Cɛn ba blu-nin-nnyɔn su'n: Enan i wa Aira b'ɔ fin Nɛftali akpasua'n su'n yɛ ɔ fɛ i liɛ'n bali-ɔ. Ninnge nga be fa bali be ti nun ti nun'n i kwlaa yɛ: pla dan kun, be fa jɛtɛ ufue yɛ be fa yoli-ɔ, ɔ ti gram akpi kun gram ya nsan (1.300), klowa nga be fa kpɛntɛn-kpɛntɛn nzue'n, jɛtɛ ufue yɛ be fa yoli-ɔ, i sɔ kun, ɔ ti gram ya nso. Nyanmiɛn sua'n nun lɔ sika sunnzunliɛ'n su yɛ be sunnzunnin-ɔn. Be guali ninnge nnyɔn sɔ'm be nun ble sanmlɛn mlɛnnɛnnɛn kpa'n bɔ be fɔtɔli i nin ngo'n, ɔ ti ble annzɛ like ng'ɔ ti kɛ ble sa'n, ɔ ti cɛlɛ like. Ninnge nga be fa bali'n be ti nun ti nun wie ekun yɛ: klowa b'ɔ ti sika ɔkwlɛ'n, i sɔ kun, ɔ ti gram ya, be guali nun ansans ɔ yili piɛ, nannin tola kun, nin bua nene kun, yɛ bua nga b'a kpɛ cro'n kun, be ´fa yi tɛ nga be yrɛ nnɛn'n kɔlikɔli'n, boli kpakpuɛ kun bɔ be ´fa yi Anannganman i kpatalɛ tɛ'n, nannin tola nnyɔn, bua nene nnun, boli kpakpuɛ nnun, bua bɔ b'a di afuɛ kun'n, i sɔ nnun. Be ´fa nnɛn sɔ mun ´yi bo kun yolɛ'n i su tɛ'n.

⁸⁴ Ninnge nga awlobo kpɛnngbɛn'm be yili i nun bɔ be ´fa Nyanmiɛn sɔwlɛ'n be wlɛ i sa nun'n i kwlaa'n yɛ: pla dandan nga jɛtɛ ufuɛ yɛ be fa yoli'n, i sɔ blu-nin-nnyɔn, klowa nga be fa kpɛntɛn-kpɛntɛn nzue'n, bɔ jɛtɛ ufue yɛ be fa yoli'n, i sɔ blu-nin-nnyɔn, yɛ sika ɔkwlɛ klowa blu nin nnyɔn.

⁸⁵ Pla dan kun ti gram akpi kun gram ya nsan (1.300) yɛ klowa kun ti gram ya nso. I kwlaa sɔ'n ɔ ju jɛtɛ ufue kilo ablaɔn-nin-nnan, Nyanmiɛn sua'n nun lɔ sika sunnzunliɛ'n su yɛ be sunnzunnin-ɔn.

⁸⁶ Sika ɔkwlɛ klowa kun ti gram ya. Be blu-nin-nnyɔn'm be ti gram akpi gram ya nnyɔn (1.200), ansans bɔ be yrɛ i'n ɔ yi be piɛ.

⁸⁷ Be fali nannin tola blu-nin-nnyɔn, ɔ nin bua nene blu nin nnyɔn, ɔ nin bua bɔ b'a kpɛ cro-cro'n i sɔ blu-nin-nnyɔn, be ti tɛ nga be yra be nnɛn'n kɔlikɔli'n be yilɛ liɛ. Be fali ble annzɛ like ng'ɔ ti kɛ ble sa bɔ be fa yi sraka man Anannganman'n be ukali su. Be fali boli kpakpuɛ blu-nin-nnyɔn kɛ be `fa kpata Nyanmiɛn,

⁸⁸ be fali nannin tola ablaɔn-nin-nnan, ɔ nin bua nene ablesiɛn, ɔ nin boli kpakpuɛ ablesiɛn, yɛ bua bɔ b'a di afuɛ kunngun'n i sɔ ablesiɛn, be ti bo kun yolɛ'n i su tɛ'n i yilɛ liɛ. Blɛ bɔ be fa Nyanmiɛn sɔwlɛ'n be wlali Nyanmiɛn sa nun'n, ninnge nga be mannin'n be yɛlɛ nga be o lɛ'n.

⁸⁹ Sɛ Moiz wlu tannin sua'n nun lɔ kɛ ɔ nin Anannganman be ´ko koko yalɛ'n, ɔ ti aniɛn kun, ɔ tɛ Nyanmiɛn i alaka'n i ti tre i su, anz nnyɔn'm be afiɛn lɛ. Kpɛkuun Moiz nin Anannganman be koko yalɛ.