Kalɛ 6 - NYANMIƐN NDƐ'N 1998

Sran ng'ɔ jaso kɛ ɔ ´cuɛn i wun i wiengu'm be nun'n i ndɛ'n

¹ Anannganman seli Moiz kɛ

² ɔ kan ndɛ yɛ mun kle Izraɛlfuɛ mun. I waan: «Sɛ yasua wie o, sɛ bla wie o, ɔ jaso nan ɔ cuɛn i wun i wiengu'm be nun'n, nan ɔ ta nda kɛ ɔ ´yo min liɛ klonglo'n nan ɔ ´su min'n,

³ nzan ng'ɔ bo'n nin vinɛgri nga be fa nzan be yo'n, ɔ nin nzan kwlaa nga be fa vinyi mma be yo'n, nán man wie fi kɛn i nuan. Nán man ɔ di vinyi mma mɔnnɛn annzɛ i mma kee .

⁴ Blɛ b'ɔ tɛ o i sɔ blɛ'n nun'n, nán man ɔ di vinyi i wun like fi kɛ ɔ bo i bo i klun mma'm be su lele b'ɔ ´fa ju i wun bui'n su nin o.

⁵ Sɛ blɛ ng'ɔ kleli i kɛ ɔ ´tran nun nan ɔ ´yo min liɛ klonglo'n nian wie-man'n, nán man laliɛ lɛman ɔ kɛn i timuɛn nin i akanza'n mlɔnmlɔn. Afin ɔ ti min liɛ klonglo, yɛ min junman'n yɛ ɔ di-ɔ. I sɔ'n ti, ɔ `yaci i timuɛn nin i akanza'm be lɛ man be fu lele fa ju blɛ ng'ɔ kleli'n i awieliɛ.

⁶ Blɛ b'ɔ ti min liɛ klonglo sɔ'n, nán man ɔ mantan fuɛn.

⁷ Kannzɛ ɔ wie i si bɔbɔ yɛ ɔ wuli o, sɛ i nin o, sɛ i niaan bian annzɛ i niaan bla wie yɛ ɔ wuli o, ɔ lɛ-man atin kɛ ɔ ´kan be kɛ ɔ ´yo nan ɔ'a yo-man fiɛn'n ti. Afin ɔ ti min liɛ klonglo, yɛ n junman yɛ ɔ di-ɔ. I ti bɔ be yi-man'n ɔ ti i sɔ nzɔliɛ.

⁸ Blɛ'n i kwlaa nga ɔ ´fa di i nda sɔ ng'ɔ tali'n i nun'n, ɔ ´yo min liɛ klonglo.

⁹ Blɛ bɔ ɔ tɛ yo min liɛ klonglo'n, sɛ wie wa fu sran wie nun kun i i nyrun lɛ'n, wuun fiɛn wa kɛn i. Blɛ bɔ be kplo i wun fiɛn'n, man be yi i ti'n. Be `yi i ti'n i cɛn ba nso'n su.

¹⁰ Cɛn ba'n i mɔcuɛ'n su'n, ɔ `fa auble nnyɔn annzɛ okunmomo nnyɔn ko man min nyrun jranfuɛ'n tannin sua nga n yi min wun nglo nun'n i anuan'n nun lɔ.

¹¹ Min nyrun jranfuɛ'n ɔ `kun anunman'n kun `fa kpata min. Ɔ `kun kun'n kusu, ɔ `yrɛ i nnɛn'n kɔlikɔli. I sin man min nyrun jranfuɛ ɔ yo like ng'ɔ fata kɛ ɔ yo'n nan sran ng'ɔ kan fuɛn i wun fiɛn ɔ'a kplo'n. Kɛ cɛn sɔ nun'n sran ng'ɔ fɛ i wun man min'n ɔ kplo i wun fiɛn kɛ nga sa.

¹² Ɔ `fɛ i wun wla mín sa nun ekun, ɔ `man bua kaan kun bɔ ɔ'a di afuɛ kun'n, ɔ `fa yi tɛ `fa siesie ɔ nin min e afiɛn. Blɛ ng'ɔ dun mmua dili i laa'n, be ka wlɛ-mɛn i cɛn nun kun, yɛlɛ kɛ i sɔ blɛ'n sacili.

¹³ Sran ng'ɔ fɛ i wun man min mlɔnmlɔn'n, i su mmla'n yɛ. Sɛ blɛ nga be kleli'n ju'n, man be fɛ i wɔ tannin sua'n i anuan'n nun lɔ.

¹⁴ Man ɔ fa nnɛn nsan bɔ lɛ fi nun-man bé wun'n man min: bua kaan kun bɔ ɔ'a di afuɛ kun, ɔ ti tɛ nga be yrɛ i nnɛn'n kɔlikɔli'n i yilɛ liɛ'n, bua talua kun bɔ ɔ'a di afuɛ kun, ɔ ti min kpatalɛ tɛ'n i yilɛ liɛ, yɛ bua nene kun, ɔ ti bo kun yolɛ i su tɛ'n i yilɛ liɛ.

¹⁵ Ɔ `fa gbogbo, ɔ `gua nun kpaun nga bɔ b'a gua-man nun kpaun ayre'n, bɔ be kɛɛnnin i ngo nun'n, ɔ nin kpaun paplapa nga bɔ b'a gua-man nun kpaun ayre'n bɔ b'a gua su ngo'n, ɔ nin ble sanmlɛn mlɛnnɛnnɛn kpa'n b'ɔ ti like cɛlɛ liɛ'n, yɛ nzan ng'ɔ uka tɛ nnɛn'm bé su'n, ɔ `fa blɛ min ekun.

¹⁶ Man min nyrun jranfuɛ'n ɔ fa ninnge sɔ'n kwlaa ɔ `ju min nyrun, ɔ `yi tɛ nga be yrɛ i nnɛn'n kɔlikɔli'n nin kpatalɛ tɛ'n.

¹⁷ Ɔ `fa bua nene yi bo kun yolɛ'n i su tɛ'n man min. I sin kpaun bɔ kpaun ayre nun-man nun'n nin ble sanmlɛn mlɛnnɛnnɛn kpa'n b'ɔ ti like cɛlɛ liɛ'n, ɔ nin nzan'n, ɔ `fa be man min.

¹⁸ Kɛ ɔ ko yo sɔ'n, wuun sran ng'ɔ fɛli i wun mannin min kɛ ɔ ´di min junman'n, ɔ su yi i ti'n tannin sua'n i anuan'n nun lɛ. Ɔ `fɛ i timuɛn'n gua sin nga be yra bo kun yolɛ i su tɛ'n i nun'n nun.

¹⁹ Man min nyrun jranfuɛ'n ɔ fa bua nene i walɛ nga be tɔnnin'n, nin kpaun nga b'a gua-man nun kpaun ayre b'ɔ o gbogbo nun'n, ɔ `fa kun nin gbofloto nga b'a gua-man nun kpaun ayre'n kun, kpɛkuun kɛ be wie sran ng'ɔ fɛli i wun mannin min i ti'n i yi'n, ɔ `fa be sie i sran sɔ'n i sa'n su.

²⁰ I sin man min nyrun jranfuɛ'n i bɔbɔ fa be wla mín sa nun, man ɔ dun mmua toto be mín nyrun lɛ. Nnɛn sɔ'm be ti min nyrun jranfuɛ'n i liɛ, ɔ ´fa ukɛ i walɛ nin i sɔwa'n bé su. Kpɛkuun i sɔ sran ng'ɔ fɛli i wun mannin min'n, ɔ kwla nɔn nzan siɛn'n.

²¹ Sran ng'ɔ cuɛn i wun i wiengu be nun kɛ ɔ ´di min junman'n, i wun mmla'n yɛ ɔ o lɛ-ɔ. Ninnge ng'ɔ fata kɛ ɔ man be'n be yɛ be o lɛ-ɔ .»

Bé nuan yralɛ

²² Anannganman seli Moiz kɛ

²³ ɔ kan ndɛ yɛ mun kle Aarɔn nin i mma mun. I waan: «Sɛ amun ´yra Izraɛlfuɛ'm be nguan'n, ndɛ nga ɔ fata kɛ amun kan'n yɛ:

²⁴ ‹Man Anannganman yo amun wun sa ye, yɛ man ɔ sasa amun!

²⁵ Man Anannganman nian amun nyrun, yɛ man ɔ sɔ amun nun klanman!

²⁶ Man Anannganman yo amun kpa, yɛ ɔ yo man amun wun jɔ amun fɔuun.›

²⁷ Sɛ min nyrun jranfuɛ'm be fa min dunman'n sie Izraɛlfuɛ'm be su kɛ nga sa'n, yɛ n wa yo be wun sa ye-ɔ.»