Kalɛ 5 - NYANMIƐN NDƐ'N 1998

Be nga fiɛn kannin be'n bé bo kanlɛ

¹ Anannganman seli Moiz kɛ:

² «Kokowefuɛ'm be kwlaa nin sran kwlaa b'ɔ lɛ loliɛ'n, annzɛ sran kwlaa ng'ɔ kannin fuɛn b'ɔ man fiɛn ɔ'a kɛn i'n, man Izraɛlfuɛ'm be mmla kɛ be kan bé bo nanmue'n nun.

³ Sɛ ɔ wie yasua o, sɛ bla o, man be kan bé bo, kɛ ɔ ´yo nan nanmue bɔ min Nyanmiɛn'n n wo nun'n ɔ'a yo-man fiɛn'n ti.

⁴ Izraɛlfuɛ'm be niannin Anannganman i nuan ndɛ b'ɔ kan kleli Moiz'n su, be yoli i su sa'n. Be kannin sran sɔ'm bé bo nanmue'n nun.»

Like ng'ɔ saci'n, i osu sielɛ ndɛ

⁵ Anannganman seli Moiz kɛ

⁶ ɔ `kan ndɛ yɛ mun kle Izraɛlfuɛ mun. I waan: «Sɛ yasua wie annzɛ bla wie yo i wiengu kun sa'n, wuun min yɛ ɔ'a yo min sa sɔ nin-ɔn, wuun sa sɔ'n ti dan.

⁷ Sa ng'ɔ yoli'n, ɔ fata kɛ ɔ di i nanwlɛ. Like ng'ɔ wuali'n, man ɔ yi i ngba fa man like'n i fuɛ'n. Yɛ sɛ be bu like sɔ'n i gua'n nun nnun'n, man ɔ fɛ i bue kun su i bo.

⁸ Sɛ sran ng'ɔ lɛ like sɔ'n ɔ'a wu'n, nan ɔ lɛ-man osufuɛ ng'ɔ mɛntɛn i'n nan b'a yi like'n b'a sie i osu b'a mɛn i'n, man be fa man min, be `fa wla min nyrun jranfuɛ'n i sa nun. Man sran ng'ɔ yoli sa'n ɔ fa bua nene kun uka su nan be `fa yi min kpatalɛ tɛ nan min nyrun jranfuɛ ɔ yo like nga ɔ fata kɛ ɔ yo nan m'an yaci sran sɔ'n i wun sa m'an cɛ i.

⁹ Like kwlaa nga Izraɛlfuɛ'm be yi i ninnge nga be ti min liɛ klonglo'n bé su, bɔ be fa man min nyrun jranfuɛ'n, ɔ ti i liɛ.

¹⁰ Sran kun i ninnge nga ɔ fa man min'n be ti i liɛ, like nga be fa man min nyrun jranfuɛ'n ɔ ti i liɛ ekun.»

Bla nga be bu i kɛ ɔ'a kunndɛ bian i wun i bo'n i su mmla

¹¹ Anannganman seli Moiz kɛ

¹² ɔ kan ndɛ yɛ mun kle Izraɛlfuɛ mun. I waan: «Sɛ bla kun lɛ bian nan ɔ tran-man diin i wun'n i bo'n,

¹³ nan yasua uflɛ wlu i sin'n, sɛ i wun'n ɔ'a wun-man be'n, bɔ kusu ɔ lɛ-man sa kun nan ɔ'a jran su kɛ b'a kunndɛ i yi'n yɛlɛ kɛ sran fi a wun-man nun'n, yɛ kusu b'a trɛ-mɛn i nin bian'n,

¹⁴ bɔ kwla silɛ bɛ i nun, nan sɛ ɔ ti be-wan-be-wan, sɛ yasua wie kusu se kɛ i yi ɔ'a kunndɛ bian i bo'n sanngɛ wuun ɔ'a yo-man sɔ'n,

¹⁵ man sran sɔ'n ɔ fɛ i yi'n ɔ to min nyrun jranfuɛ'n lɔ. Kɛ ɔ ´kɔ'n, ɔ `fa cɛlɛ ng'ɔ ti i su'n, bɔ yɛlɛ ɔrz sanmlɛn kilo nsan'n. Nán man ɔ fa ngo guɛ i ɔrz sanmlɛn'n su, nán be fa ansans be sie su afin ɔ ti kwla silɛ su sraka like b'ɔ kle kɛ atrɛkpa-a, sa wie trannin lɛ.

¹⁶ Man min nyrun jranfuɛ'n ɔ fa bla'n wɔ min sua'n nun lɔ, nan ɔ fɛ i ko jran min nyrun lɔ.

¹⁷ Man min nyrun jranfuɛ'n ɔ fa nzue ng'ɔ ti min liɛ klonglo'n wie ɔ `guɛ i nyannzɛ kun nun, nan ɔ `fa min lika'n nun asiɛ wun ndutre'n wie `gua nzue'n nun.

¹⁸ Man min nyrun jranfuɛ'n ɔ kpu bla b'ɔ fɛli i bali min nyrun'n i ti'n su, ɔ `fa kwla silɛ nnɛn'n wlɛ i bla'n i sa nun. Man min nyrun jranfuɛ'n i bɔbɔ tra nzue wiwi b'ɔ man wunnzue'n nun.

¹⁹ Man min nyrun jranfuɛ'n ɔ yo man bla'n wunnzin i klun. Man min nyrun jranfuɛ'n se sran'm be kwlaa be nyrun lɛ kɛ: ‹Kɛ a o ɔ́ wun i bo'n, sɛ a nian kunndɛ-man yasua uflɛ le'n, nán man nzue nga a wa nɔn'n ɔ yo wɔ wunnzue.

²⁰ Sanngɛ sɛ kɛ a o ɔ́ wun i bo'n, sɛ w'a yaci i lɛ w'a yo fiɛn le'n, sɛ yasua uflɛ nin wɔ lali'n,

²¹ man Anannganman tu wɔ fɔ. Man ɔ yo man ɔ klun'n ɔ yo kpan, man ɔ ku'n ɔ wla ɔ́ wun. Yɛ man i sɔ'n ti sɛ ɔ nvle'n nunfuɛ'm be waan be ´bo sran wie sannzan nzra nun'n, be `nian ɔ liɛ'n su yɛ be bo-ɔ.

²² Man nzue yɛ'n b'ɔ man wunnzue'n, ɔ wlu ɔ wunnɛn'n wunmuan nun, nan ɔ `wla ɔ ku'n, yɛ man ɔ klun yo kpan.› Kpɛkuun man bla'n ɔ tɛ su kɛ: ‹Ɛɛn, man ɔ yo sɔ. Ɛɛn, man ɔ yo sɔ.› »

²³ «Sannzan sɔ nga be ko bo i sɔ'n, man min nyrun jranfuɛ'n ɔ klɛ i fluwa kun nun, yɛ man ɔ fa sannzan nzue'n fa salo ng'ɔ klɛli'n.

²⁴ Nzue wiwi b'ɔ ti sannzan nzue b'ɔ fa saloli fluwa ng'ɔ klɛli'n, ɔ `fa man bla'n man ɔ nɔn. Kpɛkuun sannzan nzue'n ɔ wa yo man i wla su gua-man ase kun.

²⁵ I sin, man min nyrun jranfuɛ'n fa bla i sa nun like nga i waan ɔ fa man min'n, ɔ `toto i mín nyrun lɛ, kpɛkuun ɔ `fa like sɔ'n man min, ɔ `fa sie min sɔwlɛ'n su.

²⁶ Man min nyrun jranfuɛ'n ɔ fla like sɔ'n kan i sa buɛ kun, ɔ ti wla kpɛnlɛ like. Ɔ `yrɛ i min sɔwlɛ'n su. Kɛ ɔ ko yo sɔ'n, ɔ `fa nzue'n man bla'n kɛ ɔ nɔn.

²⁷ Sɛ bla'n nɔn nzue sɔ'n, sa ng'ɔ wa ju'n yɛ. Sɛ ɔ yoli i bɔbɔ i wun finfin'n i wun bo bian kunndɛlɛ nun'n, sannzan nzue'n ɔ ´wlu i klun lɔ, ɔ ´wlɛ i ku'n, kpɛkuun i klun ´yo kpan. I wla'n su gua-man ase kun. Kɛ ɔ fin lɛ'n, sɛ i wiengu'm be ´bo sran sannzan'n, be ´nian ng'ɔ juli i su'n i su yɛ be ´bo-ɔ.

²⁸ Sanngɛ sɛ bla'n ɔ'a kunndɛ-man bian i wun i bo'n, sɛ sa sɔ'n ɔ ti-man i nzuɛn'n, sa fi su ju-mɛn i su yɛ ɔ ´wu ba ekun.

²⁹ Kwla silɛ'n i su mmla liɛ'n yɛ ɔ o lɛ-ɔ. Ɔ ti bla kun b'ɔ kunndɛ bian i wun bo'n,

³⁰ annzɛ bla kun bɔ kwla silɛ bɛ i wun nun bɔ i ti ɔ bu i kɛ ɔ'a kunndɛ bian i bo'n bé wun mmla. Man bian'n ɔ fa bla'n ɔ fa bla min nyrun, yɛ man min nyrun jranfuɛ'n ɔ yo i kwlaa ng'ɔ fata kɛ ɔ yo'n.

³¹ Be su kputu-man yasua'n, sanngɛ sɛ bla'n yoli i sɔ sa sakpa'n, bla sɔ'n ɔ ´fɛ i su afɛ'n.»