Kalɛ 4 - NYANMIƐN NDƐ'N 1998

Levi akpasua'n i junman mun

¹ Anannganman seli Moiz nin Aarɔn be kɛ:

² «Amun `klɛ Keat i mma mun bɔ be ti Levifuɛ'm be dunman. Kɛ be awlobo'n nin be afiliɛ'n fa ti'n, be su yɛ amun nian be klɛ-ɔ.

³ Be nga be ´klɛ be dunman sɔ'n yɛlɛ sran nga b'a di afuɛ ablasan nin afuɛ ablasan gua su'n lele b'ɔ ´fa ju afuɛ ablenun'n. Be kwlaa be kwla di junman tannin sua nga n yi min wun nglo nun'n i nun.

⁴ Be yɛ be wa nian ninnge nga be ti min liɛ'n bɔ be o min lika kpa tra su nun lɔ'n su-ɔ.

⁵ Blɛ bɔ Izraɛlfuɛ'm be wa tu bé bo be kɔ'n, man Aarɔn nin i mma'm be dun mmua yi rido b'ɔ kpɛ min lika nun'n, nan be `fa kata min alaka'n su.

⁶ Yɛ man be fa nnɛn kplo ng'ɔ sɔ kpa'n be fa kata su, kpɛkuun be fa tannin ble nzue-nzue kun be `sɛ su. I sin, man be fa waka floloflolo nnyɔn nga be fa sua alaka'n, be fa wlɛwlɛ i sa'm be nun.

⁷ Be `fa tannin ble nzue-nzue be `sɛ i tabli nga be sie su kpaun be man min'n i su. Man be fa pla mun, nin klowa mun, nin satro mun, ɔ nin klowa nga be fa gua nzan ase'n mun sie su. Man kpaun tran su tititi.

⁸ Be `fa tannin bɔ i nyin ti ɔkwlɛ youun'n, be `sɛ ninnge sɔ'm be su. Be `fa nnɛn kplo ng'ɔ sɔ kpa'n be `kata su. I sin, be `wla tabli'n i sa floloflolo mun.

⁹ Be `fa tannin ble nzue-nzue'n be `kata kannin siewlɛ'n su, man ɔ kata kannin'm be bɔbɔ nin bé wun ninnge mun, ɔ nin like nga be fa tu nzuɛn'n, ɔ nin ngo guawlɛ'm bé su wie.

¹⁰ Man be fɛ i kwlaa sɔ'n be cici i nnɛn kplo'n ng'ɔ sɔ kpa'n nun nan be `fa sie i suanuɛn kun nun.

¹¹ Be `fa tannin ble nzue-nzue be kɛtɛ i sɔwlɛ'n b'ɔ ti sika ɔkwlɛ'n su. Be `kɛtɛ i wun nnɛn kplo ng'ɔ sɔ kpa'n. I sin'n, be `wlɛwlɛ i sa floloflolo mun.

¹² Ninnge nga be fa di min lika kpa nun lɔ junman mun'n, man be fɛ i kwlaa be sie i tannin ble nzue-nzue kun nun, nan be fa nnɛn kplo ng'ɔ sɔ kpa'n be fa `cici i wun. I sin, be `fa be sie suanuɛn kun nun.

¹³ Man be yi nzuɛn ng'ɔ o min sɔwlɛ'n su'n. Man be fa tannin ɔkwlɛ kun be sɛ min sɔwlɛ'n su.

¹⁴ Be `fa ninnge nga be fa yi tɛ'n be kwlaa be `sie su, nzuɛn tulɛ like mun o, atiɛ je mun o, peli mun o, kpongbo dandan mun o. Man be cici i kwlaa sɔ'm bé wun nin nnɛn kplo ng'ɔ sɔ kpa'n, yɛ man be fa min sɔwlɛ'n i waka floloflolo'm be wla i sa'm be nun.

¹⁵ Kɛ Aarɔn nin i mma mun be ko wie min ninnge nga be o min lika nun'n bé wun cici'n, bɔ Izraɛlfuɛ'm be ´tu bé bo be ´kɔ'n, Keatfuɛ mun yɛ be wa sua ninnge sɔ mun-ɔn. Sanngɛ nán be kan like bɔ be ti min liɛ klonglo mun kɛ ɔ ´yo nan b'a wu-man'n ti. Junman ng'ɔ ti Keatfuɛ'm be liɛ tannin sua'n nun'n yɛ ɔ o lɛ-ɔ.

¹⁶ Min nyrun jranfuɛ Aarɔn i wa Eleazar yɛ ɔ wa nian ngo nga be fa gua kannin'm be nun'n, nin ansans nga be yrɛ i'n, nin ble annzɛ like ng'ɔ ti kɛ ble sa bɔ be fa yi sraka cɛn kwlakwla'n, ɔ nin bé ti su gualɛ ngo'n bé su-ɔ. Ɔ ´nian min tannin sua'n nin i nun ninnge'm bé su. Ninnge nga be ti min liɛ klonglo'n nin be wun ninnge mma mma mun'n, ɔ ´nian bé su.»

¹⁷ Anannganman seli Moiz nin Aarɔn be kɛ:

¹⁸ «Levifuɛ kun nga'm be nun'n, nán amun ti Keatfuɛ mun yi.

¹⁹ Kɛ ɔ´yo nan b'a wu-man, nan b'a tran nguan nun blɛ bɔ be nian ninnge nga be ti min liɛ klonglo be lika'n ti'n, like nga amun `yo man be'n yɛ: Aarɔn, a nin ɔ mma mun, amun `fa Keatfuɛ sɔ'm be nun kunngun `sie be be junman'm be su, yɛ amun `kle be like ng'ɔ fata kɛ be `yo'n.

²⁰ Nán man be se kɛ be ´ko sa nian min ninnge bɔ be su cici bé wun kaan sa. Afin sɛ be wun min ninnge sɔ mun-ɔn, be ´wu.»

Gɛrsɔn i osu nun sran mun

²¹ Anannganman seli Moiz kɛ:

²² «Klɛ Gɛrsɔn i mma'm be dunman. Kɛ be awlobo'n nin be afiliɛ'n fa ti'n, be su yɛ be `nian be `klɛ be dunman nin-ɔn.

²³ Be nga be `klɛ be dunman sɔ'n yɛlɛ sran nga b'a di afuɛ ablasan annzɛ afuɛ ablasan ɔ'a gua su'n lele fa ju afuɛ ablenun'n. Be `fa be kɛ be `di junman wie mun tannin sua nga bɔ n yi min wun nglo nun'n i nun.

²⁴ Be junman nga be wa di be mun'n yɛ:

²⁵ be ´sua min tannin sua nga n yi min wun nglo nun'n i su tannin nin i su katalɛ like'n, ɔ nin nnɛn kplo ng'ɔ sɔ kpa'n bɔ be fa utu su'n, ɔ nin rido ng'ɔ o i anuan nun'n,

²⁶ ɔ nin awlo'n i wun silɛ tannin dandan mun, ɔ nin rido ng'ɔ o awlo klun b'ɔ sin yia tannin sua'n nin min sɔwlɛ'm be anuan nun'n, ɔ nin awa'n i nyanman mun, ɔ nin ninnge nga be fa di junman'm be kwlakwla.

²⁷ Aarɔn nin i mma mun yɛ be ´man Gɛrsɔnfuɛ'm be junman ng'ɔ fata kɛ be di nin-ɔn, sɛ ɔ ti ninnge'm be sualɛ nun o annzɛ junman kwlaa ng'ɔ ti bɔ be di nin o.

²⁸ Junman bɔ be fa mannin Gɛrsɔn i osu nunfuɛ'm be kɛ be di i tannin sua bɔ Nyanmiɛn yi wun nglo nun'n i nun'n yɛ be o lɛ-ɔ. Nyanmiɛn nyrun jranfuɛ Aarɔn i wa Itamar yɛ ɔ ´nian be su be junman'n i dilɛ nun-ɔn.»

Mɛrari i osu nun sran mun

²⁹ Anannganman seli Moiz kɛ: «Klɛ Mɛrari mma'm be dunman. Kɛ be awlobo'n nin be afiliɛ'n fa ti'n, be su yɛ amun nian be klɛ-ɔ.

³⁰ Ka be kwlaa nga b'a di afuɛ ablasan annzɛ afuɛ ablasan gua su'n lele fa ju afuɛ ablenun'n, nan be `man be junman wie mun tannin sua bɔ n yi mín wun nglo nun lɔ'n i nun man be di.

³¹ Junman nga be wa di'n be mun yɛ: be `sua min lika'n i waka paplaapla mun nin waka nga be fa jaja nun'n, nin sua ja mun, nin bé takawlɛ mun,

³² nin awa'n i waka mun, nin i kpɛngbɛ mun, nin i nyanman mun, ɔ nin ninnge sɔ'm bé wun ninnge nga be fa di bé wun junman'n. Man min nyrun jranfuɛ'm be klɛ ninnge nga sran kun ´sua'n be dunman fluwa su.

³³ Junman nga be fa mannin Mɛrari i osu nunfuɛ mun kɛ be di i tannin sua nun'n yɛ ɔ o lɛ-ɔ. Nyanmiɛn nyrun jranfuɛ Aarɔn i wa Itamar yɛ ɔ nian bé su be junman'n i dilɛ nun-ɔn.»

Levifuɛ nga be tɛ o junman nun'n be dunman klɛlɛ

^34-49 Moiz nin Aarɔn, ɔ nin Izraɛlfuɛ'm be kwlaa bé su kpɛnngbɛn'm be klɛli Levifuɛ'm be kwlaa nga be ti Keat, nin Gɛrsɔn, nin Mɛrari be anunman'm be dunman. Kɛ be awlobo'n nin be afiliɛ'n fa ti'n, be su yɛ be niannin be klɛli-ɔ. Sran bɔ be klɛli be dunman sɔ mun yɛlɛ be nga b'a di afuɛ ablasan annzɛ afuɛ ablasan gua su'n lele fa ju afuɛ ablenun'n. Be fali junman wafa-wafa mun wlali sran sɔ'm bé sa nun kɛ be `di be tannin sua'n nun. Kɛ Anannganman kan kleli Moiz kɛ ɔ `ka be'n, i su yɛ be niannin be kali be-ɔ. Kɛ be kali be sɔ'n, bé nuan'n yɛ: Keat i osu nunfuɛ'm be ti sran akpi nnyɔn sran ya nso sran ablenun (2.750) Gɛrsɔn i osu nunfuɛ'm be ti sran akpi nnyɔn sran ya nsiɛn sran ablasan. (2.630) Mɛrari i osu nunfuɛ'm be ti sran akpi nsan sran ya nnyɔn (3.200) Levifuɛ'm be kwlaa be ti sran akpi mɔcuɛ sran ya nnun sran ablaɔcuɛ (8.580). Levifuɛ'm be kwlaa be wunnin junman ng'ɔ fata kɛ sran kun di'n nin ninnge ng'ɔ fata kɛ ɔ sua be'n, nga Anannganman kan kleli Moiz'n, i su yɛ be niannin-ɔn.