Kalɛ 35 - NYANMIƐN NDƐ'N 1998

Levifuɛ'm be klɔ mun

¹ Moab lika kpɛtɛkplɛɛ'n nun lɔ'n, Zeriko klɔ'n i nyrun lɛ'n, Anannganman kannin ndɛ kleli Moiz. Ɔ kannin ndɛ sɔ'n Zurdɛn'n i nuan lɛ. I waan:

² «Se Izraɛlfuɛ'm be kɛ be man Levifuɛ'm be klɔ'm be wie man be tran su. Man be man klɔ sɔ mun asiɛ nga be ti be bɔbɔ be liɛ'n be su. Kpɛkuun be `fa asiɛ ng'ɔ mantan Levifuɛ'm be klɔ'n man be ekun.

³ Man be tran klɔ dandan'm bé su. Asiɛ ng'ɔ mantan be lɛ'n, be ti be nnɛn'm be didiwlɛ lika, i nnɛn kanngan mun o, i nnɛn dandan mun o.

^4-5 Nnɛn'm be didiwlɛ sɔ'n, kɛ ɔ fɛ i klɔ'm be wun talɛ'm bé wun lɛ'n, man ɔ wɔ lele ju mɛtri ya nnun, wia afiliɛ lɔ o, wia atɔliɛ lɔ o, fama su lɔ o, bɛ su lɔ o. Kɛ ɔ ko yo sɔ'n, wuun lika sɔ'n i bue nnan'n i ngba ɔ'a sɛ. I bue kun ti mɛtri akpi, i bue kun ti mɛtri akpi, kpɛkuun klɔ'n wo i afiɛn.

⁶ Klɔ nga amun ´fa man Levifuɛ mun'n, man be nun nsiɛn yo fiawlɛ klɔ bɔ sɛ sanvuɛsa nyan sran wie nan ɔ kun sran'n, ɔ kwla ko fia be nun. Levifuɛ'm be klɔ onga'm be ti ablanan-nin-nnyɔn.

⁷ Man klɔ'm be kwlaa be yo ablanan-nin-mɔcuɛ, man bé nnɛn didiwlɛ lika'm be mantan klɔ sɔ mun.

⁸ Kɛ akpasua kun i dan fa ti'n yɛ be ´nian su cɛ be klɔ mun-ɔn. Akpasua ng'ɔ cɛnnin'n, amun mɛn i klɔ kpanngban, akpasua nga ɔ'a cɛn-man'n i liɛ nga amun man'n, man ɔ yo kaan.»

Fiawlɛ klɔ mun

⁹ Anannganman seli Moiz kɛ

¹⁰ ɔ `kan ndɛ yɛ mun kle Izraɛlfuɛ mun. I waan: «Kɛ amun ko kpɛ Zurdɛn'n bɔ amun ko ɔ Kanaan mɛn'n nun'n,

¹¹ amun `kpa klɔ wie mun nan amun `fa yo fiawlɛ klɔ. I liɛ'n, sran nga sanvuɛsa nyɛn i nan ɔ kun sran'n, bɔ nán i nyinfu'n, ɔ ´ko fia be su.

¹² Sɛ sran wie waan ɔ ´tu i klunngbɔ nan ɔ ´kun sran kunfuɛ'n i wie'n, man sran kunfuɛ sɔ'n ɔ ko fia lɔ, kɛ ɔ ´yo nan b'a dun-man mmua b'a kun-man sran kunfuɛ'n kwlaa nan b'a di i jɔlɛ nzrafuɛ'm be nyrun'n ti.

¹³ Fiawlɛ klɔ'n `yo nsiɛn.

¹⁴ Amun `fa klɔ nsan Zurdɛn nzue ba'n i bue kun'n su lɔ, yɛ amun `fa klɔ nsan Kanaan mɛn'n nun. Klɔ sɔ'm be ´yo fiawlɛ klɔ.

¹⁵ Sran kwlaa nga sanvuɛsa nyɛn i nan ɔ kun sran'n, Izraɛlfuɛ o, aofuɛ o, ɔ kwla fia klɔ sɔ'm be nun kun su.

¹⁶ Sɛ sran kun fa blalɛ like wie fin sran nan ɔ wu'n, ɔ ti sran kunfuɛ, man be kun i wie.

¹⁷ Sɛ ɔ fa yɛbuɛ fin sran nan ɔ kun i'n, ɔ ti sran kunfuɛ, man be kun i wie.

¹⁸ Sɛ waka yɛ ɔ fa finnin sran yɛ ɔ kunnin i'n, ɔ ti sran kunfuɛ, man be kun i wie.

¹⁹ Sɛ sran ng'ɔ ti sran nga be kunnin i'n i klunngbɔ tufuɛ'n ɔ wun sran kunfuɛ'n, man ɔ kun i.

²⁰ Sɛ sran kun su i wiengu kun bo nan ɔ kun i kpɔlɛ ti'n, annzɛ sɛ ɔ fa like wie b'ɔ buli i akunndan laa'n ɔ fa fin i nan ɔ kun i'n,

²¹ sɛ kusu ɔ fɛ i sa finfin i like abɔlɛ su nan sran sɔ'n wu'n, ɔ ti sran kunfuɛ. Sɛ sran ng'ɔ wuli'n i klunngbɔ tufuɛ'n ɔ wun sran kunfuɛ sɔ'n, man ɔ kun i.

²² Sanngɛ sɛ sran kun su i wiengu kun bo nan ɔ wu'n, bɔ nán kɛ ɔ fuali i ti yɛ ɔ kunnin i'n, annzɛ sɛ ɔ to like wie fin i wiengu'n nan ɔ kun i'n, bɔ sanvuɛsa yɛ ɔ nyɛnnin i'n,

²³ sɛ kusu ɔ fa yɛbuɛ wie yi i su nan ɔ wu'n bɔ nán kɛ ɔ fuɛli i ti annzɛ ɔ kpɔ i ti'n,

²⁴ wafa ng'ɔ fata kɛ nvlefuɛ'm be siesie ndɛ ng'ɔ juli sran ng'ɔ kunnin sran'n nin sran nga be kunnin i'n i klunngbɔ tufuɛ'n be afiɛn'n, i su mmla'n yɛ.

²⁵ Man be fa sran ng'ɔ kunnin sran'n be ko fia klɔ nga ɔ ko fiali su lɔ'n su kɛ ɔ ´yo nan klunngbɔ tufuɛ'n ɔ'a kun-mɛn i'n ti. Sran ng'ɔ kunnin sran'n, ɔ ´ka fiawlɛ klɔ'n su lɔ lele san min nyrun jranfuɛ'm be su kpɛn'n bɔ be fali ngo ng'ɔ ti min liɛ klonglo'n be guɛli i ti su'n ɔ'a wu.

²⁶ Sɛ sran ng'ɔ kunnin sran'n ɔ fin i fiawlɛ klɔ'n nun lɔ fite'n,

²⁷ nan sran ng'ɔ kunnin i'n i klunngbɔ tufuɛ'n nin i ko yia nan ɔ nun-man fiawlɛ klɔ'n i asiɛ'n su'n, sɛ ɔ kun i'n, be su fa-man ndɛ be su su-mɛn i su kɛ ɔ'a kun sran.

²⁸ Yɛlɛ kɛ sran ng'ɔ kunnin sran'n, ɔ fata kɛ ɔ ka fiawlɛ klɔ'n nun lɔ lele san min nyrun jranfuɛ'm be su kpɛn'n ɔ'a wu. Sɛ min nyrun jranfuɛ'm be su kpɛn'n wu'n, i liɛ sran ng'ɔ kunnin sran'n kwla sɛ i sin i tranwlɛ.

²⁹ Lika kwlaa nga amun tran lɛ'n, amun `di mmla nga su tititi.

³⁰ Sɛ sran kun ɔ kun sran'n, bɔ a ´wun kɛ be ´kun i wie'n, wuun b'a ti i wun ndɛ lalofuɛ kaka be nuan nun. Lalofuɛ kunngba cɛ i ndɛ'n ju-man.

³¹ Nán amun sɔ sran b'ɔ kunnin sran b'ɔ fata kɛ be kun i wie'n i ti kpatalɛ like'n nun, ɔ fata kɛ ɔ wu.

³² Sɛ sran kun kunnin sran nan sɛ ɔ ko fiali, kpɛkuun sɛ ɔ jaso i fiawlɛ klɔ'n su, nan sɛ i waan ɔ ´ko trɛn i mɛn'n nun lɔ min nyrun jranfuɛ'm be su kpɛn'n i nyin su'n, nan sɛ ɔ man adi'n, nán amun sɔ adi'n sɔ nun.

³³ Nán amun yo mɛn nga amun tran nun'n i fiɛn. Sran kunlɛ'n kusu saci mɛn. Sɛ be kun sran kun'n, wuun mɛn'n ɔ'a saci. A ´wun kɛ mɛn sɔ'n ɔ ´kpɛn su ekun'n, wuun b'a kun sran ng'ɔ kunnin sran'n wie.

³⁴ I sɔ'n ti amun nian amún wun kpa, nán amun yo mɛn nga amun tran nun'n bɔ m bɔbɔ kusu n tran nun wie'n i fiɛn. Afin min nin Izraɛlfuɛ mun yɛ e tran-an.»