Kalɛ 34 - NYANMIƐN NDƐ'N 1998

Kanaan mɛn'n i anyialiɛ mun

¹ Anannganman seli Moiz kɛ

² ɔ `kan ndɛ yɛ mun kle Izraɛlfuɛ mun. I waan: «Amun su wa wlu Kanaan mɛn'n nun. Mɛn sɔ b'ɔ ti amun liɛ'n i nuan su lika mun yɛ:

³ sɛ amun kpɛ amún nyin wia afiliɛ lɔ'n, amun sa fama su lika'n nun lɔ'n, amun asiɛ'n i nuan su yɛlɛ Zin aawlɛ flɛnnɛn'n nin Edɔm mɛn'n. Anyialiɛ'n fɛ i wia afiliɛ lɔ lele fa ju jenvie b'ɔ ti njin nzue klakla'n i fama su lɔ.

⁴ Ɔ ko bli nyannglan kpɔlɛ'n i fama su lɔ Zin lika'n su lɔ, ɔ sin Kadɛs-Barnea lika'n i fama su lɔ ɔ sin Azar-Adar nin Azmɔn lika'm be nun.

⁵ Kɛ ɔ ko ju Azmɔn'n, ɔ bli ekun ko to Ezipt nzue ba'n, kpɛkuun ɔ ju jenvie nga be flɛ i Mediterane'n su lɔ.

⁶ Wia atɔliɛ lɔ'n, mɛn'n i nuan su yɛlɛ Mediterane jenvie'n.

⁷ Sɛ amun kpɛ amún nyin wia afiliɛ lɔ'n, amún sa bɛ su lika'n nun lɔ'n anyialiɛ'n sin Mediterane jenvie'n nin Ɔr oka'n be afiɛn.

⁸ Kɛ ɔ fɛ i Ɔr oka'n su lɛ'n, man awɛ'n sin Amat, yɛ Zɛdad.

⁹ Kpɛkuun man ɔ wɔ i nyrun lɔ ɔ ko sin Zifrɔn lika'n nun lɔ, nan ɔ `ju Azar-Enan lɔ. Fama su lɔ awɛ'n yɛ ɔ o lɛ-ɔ.

¹⁰ Wia afiliɛ lɔ'n, man amun anyialiɛ'n fɛ i Azar-Enan lɔ nan ɔ to i ti ɔ Sɛfam lika'n su lɔ.

¹¹ Kɛ ɔ fɛ i lɛ'n, man ɔ wɔ Ribla bue liɛ'n su lɔ, Ain i wia afiliɛ lɔ. Kpɛkuun man ɔ wɔ mmua lɔ nan ɔ ko sin ndroliɛ ng'ɔ o Kinerɛt fɛtɛ'n i wia afiliɛ lɔ'n i nuan su tɛɛn.

¹² Ɔ ko to Zurdɛn nzue ba'n kpɛkuun ɔ ju jenvie b'ɔ ti njin nzue klakla'n su lɔ. Amun mɛn'n i anyialiɛ mun yɛ be o lɛ-ɔ.»

¹³ Moiz kannin ndɛ sɔ'n kleli Izraɛlfuɛ mun. Kpɛkuun ɔ seli be kɛ: «Amun `nian, mɛn nga Anannganman waan e `tu i wun fɔtɔ nan y'a wun i cɛwlɛ'n yɛ ɔ o lɛ-ɔ. Ɔ ti akpasua ngwlan nin bue be liɛ.

¹⁴ Afin Ribɛn i awlo'n, Gad i awlo'n nin Manase i awlo'n i bue b'a nyan be lika liɛ laa.

¹⁵ Akpasua nnyɔn nin bue sɔ'm be lika liɛ'n wo Zeriko lika'n nun wia afiliɛ lɔ Zurdɛn'n i bue kun'n su lɔ.»

Be nga be wa cɛ asiɛ'n be yɛ

¹⁶ Anannganman seli Moiz kɛ:

¹⁷ «Eleazar b'ɔ ti Nyanmiɛn nyrun jranfuɛ'n nin Nɛn i wa Zozie yɛ be wa cɛ asiɛ nin-ɔn.

¹⁸ Be nga be wa uka bé su be junman sɔ'n i dilɛ nun'n yɛlɛ akpasua-akpasua'm bé su kpɛnngbɛn kunngun bɔ amun wa kpa be'n:

¹⁹ Sran sɔ'm be yɛ: Zida akpasua'n su'n, Zɛfine i wa Kalɛb,

²⁰ Simeɔn akpasua'n su'n, Samiɛl b'ɔ ti Amiid i wa'n,

²¹ Bɛnzamɛn akpasua'n su'n, Kislɔn i wa Elidad,

²² Dan akpasua'n su'n, Zɔgli i wa Biki,

²³ Manase b'ɔ ti Zozɛf i wa'n i akpasua liɛ'n su'n, Efɔd i wa Aniɛl,

²⁴ Efraim, Zozɛf i wa kun ekun'n i akpasua liɛ'n su'n, Siftan i wa Kɛmiɛl,

²⁵ Zabilɔn akpasua'n su'n, Parnak i wa Elizafan,

²⁶ Isakar akpasua'n su'n, Azan i wa Paltiɛl,

²⁷ Azɛr akpasua'n su'n, Sɛlɔmi i wa Aiid,

²⁸ Nɛftali akpasua'n su'n, Amiid i wa Pɛdaɛl.

²⁹ Be nga bɔ n kpali be kɛ be `cɛ Kanaan asiɛ'n nun bɔ be fin akpasua-akpasua'm bé su'n, be yɛ be o lɛ-ɔ.»