Kalɛ 33 - NYANMIƐN NDƐ'N 1998

Kɛ Izraɛlfuɛ'm be tuli bé bo Ezipt lɔ'n, be sinsinwlɛ mun nin be jranjranwlɛ mun

¹ Kɛ Izraɛlfuɛ'm be tuli bé bo Ezipt lɔ'n, lika nga be sinsinnin be nun mun be yɛ. Kɛ be ´kɔ'n, Moiz nin Aarɔn yɛ be ti be su kpɛn mun-ɔn, be kɔ akpasua-akpasua.

² Moiz klɛklɛli lika nga Anannganman seli be kɛ be `jran be nun bɔ be jrannin be nun'n, ɔ nin lika ng'ɔ seli be kɛ be `jaso lɛ be wɔ nan b'a wɔ'n. Lika sɔ mun be yɛ:

³ Izraɛlfuɛ'm be tuli bé bo Ramsɛs klɔ'n su lɔ anglo klikli'n i le blu-nin-nnun su. Kɛ be dili Delɛ-cɛn'n bɔ i aliɛ cɛnnin'n yɛ be ɔli sɔ nin-ɔn. Be ɔli Eziptfuɛ'm be nyrun lɛ kɛ sran bɔ b'a nyan bé ti laa sa.

⁴ Kɛ be ´kɔ'n, wuun Eziptfuɛ'm be su sie be talua ba nga Anannganman boli be bɔ be wuli bé sa nun'n mun. Talua ba'm be wulɛ sɔ'n, Anannganman fa guali Eziptfuɛ'm be amuɛn'm be nyin ase.

⁵ Kɛ Izraɛlfuɛ'm be tuli bé bo Ramsɛs lɔ'n, be ko kpɛli be ngblaliɛ Sikɔt lɔ.

⁶ Kɛ be fɛli i Sikɔt lɛ'n, be ko jrannin Etam lɔ aawlɛ flɛnnɛn'n i nuan su lɔ.

⁷ Kɛ be fɛli i Etam lɛ'n, be blili be ɔli Pi-Airɔt lika liɛ'n nun lɔ, be ko kpɛli be ngblaliɛ Migdɔl nyrun lɛ.

⁸ Kɛ be fɛli i Pi-Airɔt lɛ'n, be sinnin ndɛma jenvie'n i afiɛn aawlɛ flɛnnɛn'n i wun lɔ. Be fali cɛn nsan be nantili Etam aawlɛ flɛnnɛn'n nun. Be kpɛli be ngblaliɛ'n Mara lɛ.

⁹ Kɛ be fɛli i Mara lɛ'n, be ɔli Elim, be wunnin nzue ti blu-nin-nnyɔn nin mme ableso Elim lɛ, lɛ yɛ be kpɛli be ngblaliɛ nin-ɔn.

¹⁰ Kɛ be fɛli i Elim lɛ'n, be ko kpɛli be ngblaliɛ ndɛma jenvie'n i nuan lɛ.

¹¹ Kɛ be fɛli i ndɛma jenvie'n i nuan lɛ'n, be ko kpɛli be ngblaliɛ Sin aawlɛ flɛnnɛn'n nun lɔ.

¹² Kɛ be fɛli i Sin aawlɛ flɛnnɛn'n nun lɛ'n, be ɔli Dɔfka be ko kpɛli be ngblaliɛ'n lɔ.

¹³ Kɛ be fɛli i Dɔfka lɛ'n, be ko kpɛli be ngblaliɛ'n Alis lɔ.

¹⁴ Kɛ be fɛli i Alis lɛ'n, be ko kpɛli be ngblaliɛ'n Refidim lɔ, lɛ yɛ Izraɛlfuɛ'm b'a nyan-man nzue b'a nɔn-man nin-ɔn.

¹⁵ Kɛ be fɛli i Refidim lɛ'n, be ko kpɛli be ngblaliɛ'n Sinai aawlɛ flɛnnɛn'n nun lɔ.

¹⁶ Kɛ be fɛli i Sinai aawlɛ flɛnnɛn nun lɛ'n, be ko kpɛli be ngblaliɛ'n Kibrɔt-Atava.

¹⁷ Kɛ be fɛli i Kibrɔt-Atava lɛ'n, be ko kpɛli be ngblaliɛ'n Azerɔt.

¹⁸ Kɛ be fɛli i Azerɔt lɛ, be ko kpɛli be ngblaliɛ Ritma lɔ.

¹⁹ Kɛ be fɛli i Ritma lɛ'n, be ko kpɛli be ngblaliɛ Rimɔn-Ferez.

²⁰ Kɛ be fɛli i Rimɔn-Ferez lɛ'n, be ko kpɛli be ngblaliɛ Libna lɔ.

²¹ Kɛ be fɛli i Libna lɛ'n, be ko kpɛli be ngblaliɛ Risa lɔ.

²² Kɛ be fɛli i Risa lɛ'n, be ko kpɛli be ngblaliɛ Kɛelata.

²³ Kɛ be fɛli i Kɛelata lɛ'n, be ko kpɛli be ngblaliɛ'n Safɛr oka'n su lɔ.

²⁴ Kɛ be fɛli i Safɛr oka'n su lɛ'n, be ko kpɛli be ngblaliɛ'n Arada lɔ.

²⁵ Kɛ be fɛli i Arada lɛ'n, be ko kpɛli be ngblaliɛ'n Makelɔt.

²⁶ Kɛ be fɛli i Makelɔt lɛ'n, be ko kpɛli be ngblaliɛ'n Taat.

²⁷ Kɛ be fɛli i Taat lɛ'n, be ko kpɛli be ngblaliɛ'n Tarak.

²⁸ Kɛ be fɛli i Tarak lɛ'n, be ko kpɛli be ngblaliɛ'n Mitka.

²⁹ Kɛ be fɛli i Mitka lɛ'n, be ko kpɛli be ngblaliɛ'n Asmɔna.

³⁰ Kɛ be fɛli i Asmɔna lɛ'n, be ko kpɛli be ngblaliɛ'n Mɔzerɔt.

³¹ Kɛ be fɛli i Mɔzerɔt lɛ'n, be ko kpɛli be ngblaliɛ'n Bɛne-Zakan.

³² Kɛ be fɛli i Bɛne-Zakan lɛ'n, be ko kpɛli be ngblaliɛ'n Ɔr-Gidgad.

³³ Kɛ be fɛli i Ɔr-Gidgad lɛ'n, be ko kpɛli be ngblaliɛ Zɔtbata.

³⁴ Kɛ be fɛli i Zɔtbata lɛ'n, be ko kpɛli be ngblaliɛ'n Abrɔna,

³⁵ kɛ be fɛli i Abrɔna lɛ'n, be ko kpɛli be ngblaliɛ'n Ɛzɔn-Gebɛr.

³⁶ Kɛ be fɛli i Ɛzɔn-Gebɛr lɛ'n, be ko kpɛli be ngblaliɛ'n Zin aawlɛ flɛnnɛn'n nun lɔ, be flɛ lɛ lika sɔ'n kɛ Kadɛs.

³⁷ Kɛ be fɛli i Kadɛs lɛ'n, be ko kpɛli be ngblaliɛ'n Ɔr oka'n su Edɔm mɛn'n i tiwa su lɔ.

³⁸ Anannganman seli Aarɔn kɛ ɔ `fu Ɔr oka'n su, yɛ ɔ fuli su-ɔ. Lɛ yɛ ɔ wuli-ɔ. Kɛ be fin Ezipt lɔ bali'n, be afuɛ ablanan'n su'n i anglo nnun su'n i cɛn ba klikli'n su yɛ ɔ wuli-ɔ.

³⁹ Kɛ ɔ ´wu Ɔr oka'n su lɛ sɔ'n, wuun ɔ lɛ afuɛ ya afuɛ ablaɔn-nin-nsan.

⁴⁰ Kanaan famiɛn b'ɔ o Arad'n, b'ɔ tran Kanaan mɛn'n i ngua lɔ'n ɔ tili kɛ Izraɛlfuɛ'm be su ba.

⁴¹ Kɛ be fɛli i Ɔr oka'n su lɛ'n, be ko kpɛli be ngblaliɛ Zalmɔna.

⁴² Kɛ be fɛli i Zalmɔna lɛ'n, be ko kpɛli be ngblaliɛ'n Pinɔn lɔ.

⁴³ Kɛ be fɛli i Pinɔn lɛ'n, be ko kpɛli be ngblaliɛ'n Ɔbɔt.

⁴⁴ Kɛ be fɛli i Ɔbɔt lɛ'n, be ko kpɛli be ngblaliɛ Ize-Abarim, Moab mɛn'n i nuan su lɔ.

⁴⁵ Kɛ be fɛli i Ize-Abarim lɛ'n, be ko kpɛli be ngblaliɛ'n Dibɔn-Gad lɔ.

⁴⁶ Kɛ be fɛli i Dibɔn-Gad lɛ'n, be ko kpɛli be ngblaliɛ'n Almɔn-Diblataim lɔ.

⁴⁷ Kɛ be fɛli i Almɔn-Diblataim lɛ'n, be ko kpɛli be ngblaliɛ'n abarim oka-oka'n nun Nɛbo i ndɛnman lɛ.

⁴⁸ Kɛ be fɛli i Abarim oka-oka'n nun lɛ'n, be ko kpɛli be ngblaliɛ'n Moab lika kpɛtɛkplɛɛ'n nun. Be kpɛli ngbaliɛ sɔ'n Zurdɛn nzue ba'n i wun lɛ Zeriko klɔ'n nyrun lɛ.

⁴⁹ Be kpɛli be ngblaliɛ'n Zurdɛn'n i nuan lɛ. Be ngblaliɛ'n fɛ i Bɛt-Zɛsimɔt lɛ lele ju Abɛl-Sitim Moab lika kpɛtɛpklɛɛ'n nun lɔ.

Mmla nga Anannganman mannin Moiz kɛ be nian su be cɛ Kanaan mɛn'n nun'n

⁵⁰ Moab lika kpɛtɛkplɛɛ'n nun lɔ Zurdɛn'n wun lɛ Zeriko klɔ'n i nyrun ndɛnman su lɛ'n, Anannganman kannin ndɛ kleli Moiz.

⁵¹ I waan ɔ `se Izraɛlfuɛ'm be kɛ: «Sɛ amun kpɛ Zurdɛn nzue'n nan amun ju Kanaan mɛn'n nun lɔ'n,

⁵² amun `kan lɔfuɛ nga be o amun nyrun'n bé bo, amun `bubu amuɛn nga be fali yɛbuɛ annzɛ blalɛ yoli'n mun, amun `saci be sraka yiwlɛ lika bɔ be o kpɔlɛ'm be su mun.

⁵³ Amun `de be lika'n bé sa nun nan amun `tran nun, afin min yɛ n fa mannin amun-ɔn, ɔ ti amun liɛ.

⁵⁴ Kɛ amun ´cɛcɛ asiɛ'n nun'n, amun `tu fɔtɔ. Amun `nian kɛ amun akpasua nin amun osu-osu'm be dan'n ɔ fa ti'n su yɛ amun `yo-ɔ. Be nga be sɔnnin'n, man be lika liɛ nga amun ´man be'n ɔ cɛn, be nga b'a sɔn-man'n, man be lika liɛ nga amun ´man be'n `yo kaan. Nga fɔtɔ'n kle'n, i su yɛ amun `di-ɔ. Kɛ amún si'm be akpasua'm be fa ti'n, i su yɛ be ´nian yɛ be ´man amun asiɛ nin-ɔn.

⁵⁵ Sɛ kusu amu'an kan-man mɛn'n i nun sran nga be o amun nyrun'n bé bo'n nan amun yaci be lɛ'n, be ´kaci kɛ owie sa, be ´wɔ amun nyinma su, annzɛ be ´kaci kɛ kpɛngbɛ piembie sa, be ´wɔ amun nvɛn mma'n. Be ´kaci amun kpɔfuɛ mɛn nga amun wa tran nun'n i nun.

⁵⁶ Kpɛkuun nyrɛnnɛn nga n waan n ´fa kle be'n, amun yɛ n wa fa kle amun-ɔn.»