Kalɛ 32 - NYANMIƐN NDƐ'N 1998

Tranwlɛ nga akpasua nsan be trannin nun Zurdɛn nzue'n i wia afiliɛ lɔ'n

¹ Ribɛn osu'n nin Gad osu'n be nunfuɛ'm be lɛ nnɛn kpanngban kpa. Be wunnin kɛ Zaɛzɛr mɛn'n nin Galaad mɛn'n be ti nnɛn tawlɛ klanman.

² I sɔ ti be ko toli Moiz nin Nyanmiɛn nyrun jranfuɛ Eleazar, ɔ nin Izraɛlfuɛ'm be kwlakwla nan b'a se be kɛ:

³ «Klɔ nga mun: Atarɔt, Dibɔn, Zaɛzɛr, Nimra, Ɛsbɔn, Eleale, Sɛbam, Nɛbo yɛ Bɛɔn, be o

⁴ lika nga Anannganman yoli man Izraɛlfuɛ'm be nyɛnnin i'n nun. Lika bɔ klɔ sɔ'm be o su'n, sɛ be ta nnɛn nun-ɔn ɔ ´yo kpa, yɛ e kusu e lɛ nnɛn.»

⁵ Be seli Moiz kɛ: «Sɛ ɔ ti ɔ klun su'n, e ´srɛ wɔ kɛ a fɛ i sɔ asiɛ liɛ'n man ye. Nán fa e kɔ Zurdɛn nzue ba'n i bue kun'n su lɔ.»

⁶ Moiz tɛli be su kɛ: «Ai! ?Amun niaan'm be ´ko kun alɛ'n kpɛkuun amun ´ka amun liɛ wa?

⁷ ?Nzu ti yɛ amun waan amun ´bubu Izraɛlfuɛ'm bé sa sin nan nán man be wɔ mɛn nga Anannganman fa mannin be'n nun lɔ nin-ɔn?

⁸ ?Nán like kunngba nga amún si'm be yoli i Kadɛs-Barnea lɔ'n yɛlɛ nga amun su yo i yɛ'n? N sunmannin be kɛ be ko nian Kanaan mɛn'n.

⁹ Be ɔli lele be juli Ɛskɔl kongo'n nun lɔ, be wunnin kɛ ɔ fa ti'n. Kɛ be sali bé sin bali'n, be wa bubuli Izraɛlfuɛ'm bé sa sin kɛ nán man be wɔ mɛn nga Anannganman fa mannin be'n nun kun.

¹⁰ I cɛn sɔ'n nun'n, Anannganman fali ya dan kpa nan ɔ'a ta nda ɔ'a se kɛ:

¹¹ ‹Be nga be fin Ezipt lɔ be bali bɔ be lɛ afuɛ ablaɔn nin afuɛ ablaɔn gua su'n, be nun kun sa su wun-man mɛn nga min waan n ´fa man Abraam, nin Izaak, nin Zakɔb'n. Afin bé nyin a yi-man min.

¹² San Zɛfine i wa Kalɛb b'ɔ fin Kɛnaz osu nun'n nin Nɛn wa Zozie yɛ be ´ju lɔ-ɔ. Afin be liɛ'n be fali mín nuan ndɛ'n su.› »

¹³ Moiz kɛnnin i ekun kɛ: «Ya bɔ Anannganman fɛli i Izraɛlfuɛ'm bé wun'n ti ɔ miannin be man be dili aawlɛ flɛnnɛn'n nun lɔ afuɛ ablanan, lele san be nga be yoli nyin kekle i su'n be blɛ sufuɛ'm be kwlaa be wieli wu.

¹⁴ ?Siɛn'n, amun bɔ amun ti sa tɛ yofuɛ'n, amun waan amun ´fa amún si'm be ajalɛ kunngba sɔ'n nan amun ´yo nan Anannganman fa ya dan Izraɛlfuɛ'm bé wun?

¹⁵ Sɛ amun Ribɛnfuɛ nin Gadfuɛ mun, amun waan amun su-man Anannganman i su kun'n, Anannganman wa yo man Izraɛlfuɛ'm be wa cɛ aawlɛ flɛnnɛn'n nun wa ekun'n, wuun mlinlɛ yɛ amun mlinnin be-ɔ.»

¹⁶ Be wunngeli Moiz wun lɛ nan b'a se i kɛ: «E ´kplan e nnɛn'm be klangla mun nin e awlofuɛ'm be klɔ mun, e si bé wun wa.

¹⁷ I sin e ´fa e alɛ ninnge mun e dun mmua Izraɛlfuɛ'm be nyrun lele e ´fa be kɔ be lika liɛ'm be nun. Kɛ ɔ ´yo sɔ'n, wuun é yi nin e mma'm be o klɔ nga e sisili bé wun'n be nun, sran fi sa su kan-man be.

¹⁸ Sɛ Izraɛlfuɛ kun nga mun be nian nyan-man be lika liɛ'n, e nian sa-man é sin e lika liɛ'n nun.

¹⁹ E su fa-man asiɛ bé wun lɔ Zurdɛn'n i sin lɔ bue liɛ'n su annzɛ be sin mmua lɔ, afin e asiɛ liɛ'n yɛlɛ ng'ɔ o Zurdɛn'n i wia afiliɛ bue liɛ'n su wa yɛ'n.»

²⁰ Moiz seli be kɛ: «Sɛ amun yo i sɔ'n, sɛ amun fa amun alɛ ninnge mun nan amun kɔ alɛ'n i kunlɛ kɛ Anannganman fa kannin'n sa'n,

²¹ sɛ amun kwlaa nga amun wlawla amun alɛ ninnge mun'n nan amun kɔ Zurdɛn'n i bue kun'n su lɔ kɛ Anannganman klo su'n sa'n, nan amun ko kun alɛ'n lele nan Anannganman ɔ wie i kpɔfuɛ'm bé bo kan'n,

²² sɛ Anannganman fa lika wunmuan'n kwlaa ka nan amu'an sa amún sin'n, Anannganman nin amun su nyan-man ndɛ, yɛ Izraɛlfuɛ'm be kusu be nin amun su nyan-man ndɛ, kusu kpɛkuun lika nga ɔ ´yo amun liɛ kɛ Anannganman fa kannin'n sa.

²³ Sanngɛ sɛ amu'an yo-mɛn i sɔ'n, wuun amu'an fɔn Anannganman'n i wun. Kusu man amun si jrɛiin kɛ, sa tɛ nga amun yoli'n, amun wa fɛ i su afɛ'n.

²⁴ Amun `kplan klɔ mun `man amun mma mun, yɛ amun `si amun nnɛn'm be klangla mun. Like nga kusu bɔ amun kannin kɛ amun ´yo'n, amun `nian nun yo.»

²⁵ Gadfuɛ mun nin Ribɛnfuɛ'm be seli Moiz kɛ: «Nannan, kɛ a fa kannin'n i su yɛ e ´yo-ɔ.

²⁶ E mma mun, é yi mun, e nnɛn mun, yɛ e nnɛn kpanngɔ mun, nin e aflunmun'm be kwlaa be ´ka Galaad klɔ'm bé su wa,

²⁷ yɛ e bɔ e ti ɔ sufuɛ mun'n, e ´fa e alɛ ninnge mun, kpɛkuun kɛ a fa kannin'n sa yɛ kɛ Anannganman fa kannin'n sa, e ´kɔ alɛ'n i kunlɛ.»

²⁸ Moiz fali sran sɔ'm bé su mmla mannin Nyanmiɛn nyrun jranfuɛ Eleazar nin Nɛn i wa Zozie, ɔ nin awlobo kpɛnngbɛn mun.

²⁹ Ndɛ nga Moiz kan kleli be'n yɛ: «Sɛ Gadfuɛ nin Ribɛnfuɛ'm be fa alɛ ninnge mun nan be nin amun kpɛ Zurdɛn'n, nan be ko kun alɛ'n kɛ Anannganman fa kannin'n sa'n, sɛ be uka amun nan amun fa mɛn'n, amun `fa Galaad mɛn'n be `fa man be.

³⁰ Sanngɛ sɛ b'a yo-mɛn i sɔ'n, man be asiɛ liɛ nga be nyɛn i'n ɔ `tran amun afiɛn Kanaan mɛn'n nun lɔ.»

³¹ Gadfuɛ mun nin Ribɛnfuɛ'm be jrannin su kpa be kɛnnin i ekun kɛ: «E ´yo nga Anannganman seli ye kɛ e yo'n.

³² Kɛ ɔ ´yo nan y'a kwla nyan e lika liɛ'n Zurdɛn nzue ba'n i bue nga su wa'n ti'n, e ´fa alɛ ninnge mun e ´wlu Kanaan mɛn'n nun lɔ kɛ Anannganman fa kannin'n sa.»

³³ Moiz fali Amɔrfuɛ'm be famiɛn'n i lika'n nin Ɔg b'ɔ ti Bazan i famiɛn'n i lika'n, ɔ nin klɔ nga be mantan be lɛ'n, be nin be asiɛ mun, ɔ fa mannin Gadfuɛ mun nin Ribɛnfuɛ mun, ɔ nin Zozɛf i wa Manase i akpasua'n i bue kun.

³⁴ Gad i osu nunfuɛ'm be kplannin klɔ nga'm be uflɛ: Dibɔn, Atarɔt, Arɔɛr,

³⁵ Atrɔt-Sɔfan, Zaɛzɛr, Zɔgbea,

³⁶ Bɛt-Nimra, yɛ Bɛt-Aran. Be sisili klɔ sɔ'm bé wun kpa. Be sili be nnɛn'm be siewlɛ klangla mun.

³⁷ Ribɛn i osu'n nun sran'm be kplannin klɔ nga'm be uflɛ: Ɛsbɔn, Eleale, Kiriataim,

³⁸ Nɛbo, Baal-Mɛɔn, yɛ Sibma. Be tɔnnin wie'm be dunman uflɛ.

³⁹ Manase i wa Makir i osu'n nunfuɛ'm be nin Galaadfuɛ'm be kunnin, nan b'a fa be lika'n, yɛ be kannin Amɔrfuɛ nga be tran lɛ'n bé bo.

⁴⁰ I sɔ ti yɛ Moiz fali lika sɔ'n mannin Makir i osu'n nunfuɛ'm be kɛ be tran nun nin-ɔn.

⁴¹ Zair b'ɔ ti Manase i wa kun ekun'n, i osu nunfuɛ'm be ko fali Amɔrfuɛ'm be klɔ kanngan mun, nan b'a flɛ be kɛ «Zair i klɔ mun.»

⁴² Nɔbak ko fali Kɛnat klɔ'n nin klɔ kanngan nga be mɛntɛn i lɛ'n mun, ɔ fɛli i bɔbɔ i dunman sieli klɔ sɔ'n su. Ɔ flɛli i Nɔbak.