Kalɛ 31 - NYANMIƐN NDƐ'N 1998

Izraɛlfuɛ'm be Madianfuɛ'm be kwlalɛ

¹ Anannganman seli Moiz kɛ:

² «Tu Izraɛlfuɛ'm be klunngbɔ guɛ i Madianfuɛ'm bé su. I sin, a wa wu, a ´to ɔ́ si'm be lɔ.»

³ Moiz seli nvlefuɛ'm be kɛ: «Man amun nun sran wie'm be fa be alɛ ninnge mun nan be `ko tɔ Madianfuɛ'm bé su, nan be `tu Anannganman i klunngbɔ gua bé su.

⁴ Amun `fa akpasua'm be kwlaa bé su sran, amun `fa akpasua kun su sran akpi trilili sin yia nun.»

⁵ Be kpali akpasua'm be kwlaa be su sran. Be kpali akpasua kun su sran akpi lele sin yiali nun, kpɛkuun be sonja'm be kwlaa be yoli akpi-akpi blu-nin-nnyɔn.

⁶ Moiz sunmannin be kɛ be wɔ alɛ'n i kunlɛ. Nyanmiɛn nyrun jranfuɛ Fine b'ɔ ti Eleazar i wa'n ɔ ɔli be sunmanlɛ. Kɛ be ´kɔ'n, Fine yɛ ɔ sua Nyanmiɛn i ninnge mun nin awɛ nga kɛ be kɔ alɛ kunlɛ'n be bo nin-ɔn.

⁷ Ndɛ nga Anannganman seli Moiz kɛ ɔ kan kle be'n, be niannin su be yoli i su sa'n. Be ko tɔli Madianfuɛ'm be mɛn'n su, be kunnin i nun sran mun sekeseke kpan.

⁸ Be kunnin Madian lɔ famiɛn nnun'n mun. Be dunman mun yɛ: Evi, Rekɛm, Zir, Ir, yɛ Reba. Be kunnin Bɛɔr i wa Balaam wie .

⁹ Izraɛlfuɛ'm be trali Madian lɔ bla mun nin ba kanngan mun be fa be yoli be kanga. Be fali be nnɛn nga be sua trɔ'n nin be nnɛn nga be ta be'n, ɔ nin bé bo ninnge mun.

¹⁰ Be wɔli be klɔ mun nin be nanmue'm be kwlaa be nun.

¹¹ Be fali ninnge nga be nyɛnnin i'n. Sran mun o, nnɛn mun o, be fali be ɔli.

¹² Sran nga be trali be bɔ b'a kaci be kanga'n nin ninnge nga be nyannin be alɛ'n nun lɔ'n, be fali be blɛli Moiz nin Nyanmiɛn nyrun jranfuɛ Eleazar, ɔ nin Izraɛlfuɛ'm be kwlakwla. Kɛ ɔ ´yo sɔ'n, wuun Moiz'm be o Moab lika kpɛtɛkplɛɛ'n nun lɔ Zurdɛn'n wun lɛ Zeriko klɔ'n nyrun lɛ.

¹³ Moiz nin Eleazar, ɔ nin Izraɛl kpɛnngbɛn nga'm be fin ngblaliɛ'n nun lɛ be ɔli be atin kpalɛ.

¹⁴ Moiz fali sonja'm be su kpɛnngbɛn mun nin sonja akpi su kpɛnngbɛn mun, ɔ nin sonja ya su kpɛnngbɛn mun bɔ be fin alɛ'n i kunlɛ'n bé wun ya.

¹⁵ Moiz usali be kɛ: «?Nzu yɛlɛ nga? ?Amun yacili bla'm be kwlaa be lɛ amu'an kun-man be?

¹⁶ Amun si jrɛiin kɛ Madian bla mun yɛ Pɛɔr ndɛ'n nun'n Balaam mannin be afɔtuɛ yɛ be suli Izraɛlfuɛ'm bé bo bɔ be yoli sa tɛtɛ kpa Anannganman i wun nin-ɔn. Kɛ ɔ yoli sɔ'n yɛ nyrɛnnɛn'n wa tɔli Anannganman i nvle'n su nin-ɔn.

¹⁷ I sɔ'n ti, amun `kun yasua kanngan'm be kwlaa nin bla nga b'a si bian mun.

¹⁸ Amun `yaci bla nga be nian si-man bian'm be lɛ nan be yo amun liɛ.

¹⁹ Amun nun sran nga be kunnin sran'n annzɛ be kannin fuɛn'n, man be tran ngblaliɛ'n sin lɔ lele cɛn ba nso. Man be kplo be wun fiɛn cɛn ba nsan'n su nin cɛn ba nso'n su. Be nga amun trali be'n, bɔ b'a yo amun kanga'n, be kusu be `yo i sɔ'n wie.

²⁰ Amun `kpu amún wun ninnge mun, ɔ nin ninnge nga be fali kplo annzɛ boli ndrɛ be yoli'n be kwlaa, yɛ amun wunnzin ninnge nga be fa waka be yoli'n.»

²¹ I sin Nyanmiɛn nyrun jranfuɛ Eleazar seli be nga be ko kunnin alɛ'n be kɛ: «Mmla nga Anannganman fa mannin Moiz'n yɛ.

²² Ninnge nga be fali sika ɔkwlɛ nin jɛtɛ ufue, nin aaba, nin blalɛ, nin etɛn, ɔ nin sunmun be yoli'n,

²³ ninnge sɔ mun bɔ be kwla yra-man'n, amun `gua be sin nun nan be yo saun, kpɛkuun amun `wla be fiɛn kplolɛ nzue'n nun.

²⁴ Amún cɛn ba nso su'n, kɛ amun ko kpu amún wun ninnge mun'n, wuun amu'an yo saun siɛn'n, kpɛkuun amun su wlu ngblaliɛ'n nun lɔ.»

Ninnge nga be nyannin be alɛ kunwlɛ lɔ'n be nun cɛlɛ

²⁵ Anannganman seli Moiz kɛ:

²⁶ «Eleazar nin wɔ, yɛ man Izraɛl awlobo kpɛnngbɛn'm be uka amun nan amun `ka ninnge nga amun ko fali be alɛ kunwlɛ lɔ'n, i sran o, i nnɛn o.

²⁷ Bu ninnge nga amun nyɛnnin i alɛ kunlɛ nun'n i nun nnyɔn sɛsɛ, i bue kun ti be nga be ko kunnin alɛ'n be liɛ, yɛ i bue kun ti be nga b'a ɔ-man wie'n be liɛ.

²⁸ Be nga be ko kunnin alɛ'n, be ninnge liɛ'm be nun'n, man be yi min liɛ lika'n be man min. Sran ya nnun su'n, man be man min sran kun, nnɛn ya nnun su'n, man be man min nnɛn kun. Sɛ nannin o, sɛ aflunmun o, sɛ bua o, sɛ boli o, min liɛ o nun.

²⁹ Min liɛ lika nga be yi'n, fa man Eleazar b'ɔ ti min nyrun jranfuɛ'n.

³⁰ Izraɛlfuɛ'm bé onga'm be liɛ lika'n nun kusu'n, min liɛ ng'ɔ o nun'n yɛlɛ nga: sran ablenun su'n, min liɛ ti kun, nnɛn ablenun su'n, min liɛ ti kun. Sɛ nannin o, sɛ aflunmun o, sɛ bua o, sɛ boli o, nnɛn uflɛ kwlaa o, sɛ be fa ablenun'n, min liɛ kun o nun. Fa min liɛ lika sɔ'n man Levifuɛ nga be di mín sua bɔ n yi min wun nglo nun'n i nun junman'n.»

³¹ Moiz nin Eleazar be yoli nga Anannganman seli be kɛ be `yo'n i kwlaa.

³² Ninnge nga Izraɛl alɛ kunfuɛ'm be ko fɛli i be kpɔfuɛ'm bé sa nun'n, kɛ be kali'n, bé nuan'n yɛ: bua nin boli'm be ti akpi-akpi ya nsiɛn akpi-akpi ableso-nin-nnun (675.000),

³³ nannin akpi-akpi ableso-nin-nnyɔn (72.000),

³⁴ aflunmun akpi-akpi ablesiɛn-nin-kun (61.000), nnɛn kpanngɔ akpi.

³⁵ Bla nga be nian si-man bian'n be ti akpi-akpi ablasan-nin-nnyɔn (32.000).

³⁶ Nga be fa mannin be nga be ko kunnin alɛ'n yɛ: bua nin boli akpi-akpi ya nsan akpi-akpi ablasan-nin-nso ɔ nin ya nnun (337.500).

³⁷ Anannganman liɛ nga be yili i nun be mɛnnin i'n ti ya nsiɛn ɔ nin ableso-nin-nso.

³⁸ Alɛ kunfuɛ'm be nannin'n be ti akpi-akpi ablasan-nin-nsiɛn (36.000). Anannganman liɛ ng'ɔ o nun'n ti ableso-nin-nnyɔn.

³⁹ Be aflunmun'm be ti akpi-akpi ablasan aflunmun ya nnun (30.500). Anannganman liɛ'n ti ablesiɛn-nin-kun.

⁴⁰ Be sran'm be yoli akpi-akpi blu-nin-nsiɛn (16.000). Anannganman liɛ ng'ɔ o nun'n ti ablasan-nin-nnyɔn.

⁴¹ Moiz fali Anannganman liɛ lika ng'ɔ o nun'n mannin Nyanmiɛn nyrun jranfuɛ Eleazar kɛ Anannganman kan kleli i kɛ ɔ `yo'n sa.

^42-43 Be nga b'a ɔ-man alɛ kunlɛ'n wie'n be liɛ nga be nyɛnnin i'n nin be nga be ɔli alɛ kunlɛ'n be liɛ'n sɛ. Bua nin boli'm be ti akpi-akpi ya nsan akpi-akpi ablasan-nin-nso ɔ nin ya nnun (337.500),

⁴⁴ nannin'm be ti akpi-akpi ablasan-nin-nsiɛn (36.000),

⁴⁵ aflunmun'm be ti akpi-akpi ablasan aflunmun ya nnun (30.500),

⁴⁶ klɔ sran'm be ti akpi-akpi blu-nin-nsiɛn (16.000).

⁴⁷ Izraɛlfuɛ'm be liɛ lika nga be nyɛnnin i'n, Moiz yili Anannganman liɛ ng'ɔ o nun'n: sran ablenun su sran kun, nnɛn ablenun su nnɛn kun. Ɔ fa mannin Levifuɛ'm bɔ be di Anannganman i tannin sua b'ɔ yi i wun nglo nun'n i nun junman'n, kɛ Anannganman fa kannin'n sa'n.

Sonja'm be tuli be klun be cɛli Anannganman i like

⁴⁸ Sonja su kpɛnngbɛn mun, nin sonja akpi su kpɛnngbɛn mun, be nin sonja ya su kpɛnngbɛn'm be ko toli Moiz.

⁴⁹ Be seli i kɛ: «Kɛ e kali sonja nga e sie be mun'n, be wie fi ɔ'a tu-man nun.

⁵⁰ I sɔ'n ti, e su fa like e wa cɛ Anannganman nan ɔ `sasa ye. E kwlaa e sika ɔkwlɛ ninnge nga e nyɛnnin i'n, e ´fa cɛ: kɔmin nyanman o, be sa nga o, bé sama ti nga o, asunmanndi o, be kɔmin afle o.»

⁵¹ Moiz nin Nyanmiɛn nyrun jranfuɛ Eleazar be sɔli sika ɔkwlɛ ninnge sɔ'm be nun.

⁵² Ninnge nga sonja'm bé su kpɛnngbɛn'm be fa blɛli Anannganman'n, i kwlaa yoli kilo kɔe ya kilo ableso.

⁵³ Sonja nga be lɛ-man sa su'n be liɛ nga be fali'n, ɔ kali bé sa nun.

⁵⁴ Moiz nin Eleazar be fali sika ɔkwlɛ ninnge sɔ bɔ sonja su kpɛnngbɛn'm be mannin'n, be ko sieli be tannin sua'n nun lɔ kɛ ɔ ´yo nan Anannganman i wla a fi-man Izraɛlfuɛ'm bé su'n ti.