Kalɛ 30 - NYANMIƐN NDƐ'N 1998

¹ Moiz kannin Anannganman i nuan su ndɛ'n kwlaa kleli Izraɛlfuɛ mun.

Nda talɛ'n i su mmla

² Moiz kannin Anannganman i nuan su ndɛ mun kleli Izraɛl akpasua-akpasua'm bé su kpɛn mun. Ɔ seli be kɛ Anannganman wan yoo:

³ «Sɛ sran kun ta Anannganman nda kɛ ɔ ´cɛ i like annzɛ ɔ tɛ i nda kɛ ɔ yo-man like wie'n, ng'ɔ kannin'n, man ɔ nian su yo. Nán man ɔ `yaci i lɛ sa ngbɛn .

⁴ Sɛ talua wie tɛ o i si awlo, kpɛkuun ɔ se Anannganman kɛ ɔ ´yo like wie mɛn i annzɛ ɔ tɛ i nda'n,

⁵ sɛ i si ti ndɛ'n nan ɔ'a tɛ-man su'n, ndɛ nga talua'n kannin'n, man ɔ nian su yo i su sa'n.

⁶ Sɛ i si ti nan i cɛn kunngba sɔ'n nun ɔ se kɛ nán man i su ti'n, talua'n su yo-mɛn i su sa'n kun. Anannganman ´yaci cɛ i, afin i si ɔ'a kplin-man su i ti yɛ man ɔ'a yia-man nda ng'ɔ tali'n i nuan-an.

⁷ Sɛ talua wie kusu ta nda wie nan ɔ'a bu-mɛn i akunndan kpɛkuun i sin ɔ'a ko ja bian'n,

⁸ sɛ cɛn nga i wun ti ndɛ'n nan ɔ'a tɛ-man su'n, nga talua'n kannin'n, man talua sɔ'n yiɛ i nuan.

⁹ Sɛ kusu cɛn kunngba nga bian'n ti'n nan ɔ se kɛ nán man i su ti'n, wuun nda nga talua'n tali i sɔ'n yɛ yasua'n ɔ'a nunnun su lɛ-ɔ. Anannganman ´yaci bla'n i wun sa'n cɛ i.

¹⁰ Sɛ angboti bla kun annzɛ bla bɔ be yrɛli i'n ɔ ta nda'n, man ɔ yiɛ i nuan.

¹¹ Sɛ bla kun b'ɔ lɛ bian'n, ɔ ta nda annzɛ ɔ se kɛ ɔ ´yo like kun'n,

¹² sɛ i wun ti nan ɔ'a tannin-mɛn i atin'n, man ɔ yiɛ i nuan.

¹³ Sɛ kusu cɛn kunngba nga i wun'n ti'n nan ɔ nunnun su'n, bla'n su yia-man nda ng'ɔ tali'n i nuan kun. Anannganman ´yaci i wun sa'n cɛ i, afin i wun'n yɛ ɔ nunnunnin su-ɔ.

¹⁴ Sɛ bla kun ta nda annzɛ ɔ se kɛ ɔ yo-man like wie'n, i wun kwla kplin su annzɛ ɔ kwla nunnun su.

¹⁵ Sɛ i wun ti nan ɔ'a kan-man ndɛ'n, wuun ɔ kle kɛ i klun su-ɔ.

¹⁶ Sɛ kusu ɔ cɛ lele kpɛkuun ɔ wa kpiti kpli kpɛkuun i waan ɔ su nunnun su'n, kusu wuun ɔ'a dun mmua ɔ'a ti i laa'n, i bɔbɔ yɛ ɔ'a fɔn siɛn nin-ɔn, i yɛ ɔ wa sua i yi i sa'n i su afɛ nin-ɔn.»

¹⁷ Nda nga bla ng'ɔ lɛ bian annzɛ bla ng'ɔ nian ja-man bian b'ɔ tɛ o i si i awlo'n ɔ ta'n, i su mmla nga Anannganman fa mannin Moiz'n yɛ ɔ o lɛ-ɔ.