Kalɛ 3 - NYANMIƐN NDƐ'N 1998

Levifuɛ'm be junman ng'ɔ fata kɛ be di'n

¹ I nun bɔ Anannganman ´kɛn i nuan su ndɛ kle Moiz Sinai oka'n su lɔ'n, wuun Aarɔn nin Moiz be awlo'n nunfuɛ nga be o lɛ'n be yɛ.

² Aarɔn lɛ ba yasua nnan. Be kpɛnngbɛn'n suan Nadab, yɛ be nsan nga'm be kusu be flɛ kun Abii, be flɛ kun Eleazar, yɛ Itamar.

³ Aarɔn i mma mun yɛ be o lɛ-ɔ, be guali bé ti su ngo, yɛ be sieli be ngunmin kɛ be `yo Nyanmiɛn i nyrun jranfuɛ. Be wluli junman sɔ'n nun.

⁴ Kɛ bɔ be o Sinai aawlɛ flɛnnɛn'n nun lɔ'n, Nadab nin Abii be ko fali sin b'ɔ ti-man Anannganman'n liɛ, bɔ nán ng'ɔ kleli kɛ be fa'n, be fa ɔli Anannganman sua'n nun lɔ. I ti man be kali lɛ be wuli sua sɔ'n nun lɛ Anannganman i nyrun lɛ. B'a wu-man ba. Eleazar nin Itamar yɛ be kali lɛ bé si Aarɔn i nyin su, yɛ be dili Nyanmiɛn i nyrun jranlɛ junman nin-ɔn .

⁵ Anannganman seli Moiz kɛ:

⁶ «Fa Levifuɛ mun wunnge wa man min nyrun jranfuɛ Aarɔn nian bé su, nan be `di junman be `mɛn i.

⁷ Man be di junman min tannin sua bɔ n yi mín wun nglo nun'n i nyrun lɛ. Be `di junman sɔ'n be `man Aarɔn nin Izraɛlfuɛ'm be kwlaa. Man be `di min tannin sua'n i wun junman.

⁸ Man be nian tannin sua'n i nun ninnge'm be lika. Man be di mín tannin sua'n i wun junman man Izraɛlfuɛ mun.

⁹ Fa Levifuɛ mun fa man Aarɔn nin i mma mun. Man be yo i liɛ mlɔnmlɔn, yɛ man be di Izraɛlfuɛ kun nga'm bé nuan junman.

¹⁰ Sie Aarɔn nin i mma'm be ngunmin, man be di min nyrun jranlɛ junman'n. Sɛ sran kun ti-man min nyrun jranfuɛ, nan ɔ fɛ i wun wla be nun'n, man be kun i.»

¹¹ Anannganman seli Moiz kɛ:

¹² «Nian, m bɔbɔ min yɛ n fali Levifuɛ mun Izraɛlfuɛ'm be nun-ɔn. Be yɛ be ´sin Izraɛl talua ba'm be ajalɛ nun be ´di n sua'n nun junman nin-ɔn.

¹³ Afin talua ba'm be kwlaa be ti min liɛ, kɛ ɔ fin cɛn bɔ n yoli man Eziptfuɛ'm be wa klikli'm be kwlaa be wuli'n, n sieli Izraɛlfuɛ'm be talua ba liɛ'm be nin be nnɛn'm be wa klikli liɛ'm be ngunmin kɛ be `yo min liɛ. Min yɛ n ti Anannganman nin-ɔn.»

Levi akpasua sufuɛ'm be dunman klɛlɛ klikli su'n

¹⁴ Sinai aawlɛ flɛnnɛn nun lɔ'n, Anannganman seli Moiz kɛ:

¹⁵ «Klɛ Levifuɛ'm be dunman kɛ be awlobo, nin be afiliɛ'n fa ti'n. Klɛ yasua'm be kwlaa nga b'a di anglo kun nin anglo kun gua su'n be dunman.»

¹⁶ Kɛ Anannganman fa kannin'n, yɛ Moiz niannin su klɛli be dunman nin-ɔn.

¹⁷ Levi i mma'm be dunman mun yɛ: Gɛrsɔn, Keat, ɔ nin Mɛrari.

¹⁸ Gɛrsɔn i wa Libni nin Simɛi yɛ be yoli akpasua nga be dunman o bé su'm be nannan mun-ɔn.

¹⁹ Levi osu nun'n, Keat i wa Amram, nin Zizear, nin Ebrɔn nin Iziɛl be kusu be ti be akpasua liɛ'm bé nannan.

²⁰ Mɛrari i wa Makli, nin Misi be o Levi awlo'n nunfuɛ'm be nannan'm be nun wie. Sran sɔ mun yɛ be dunman'n wo Levi akpasua'n su-ɔ.

²¹ Gɛrsɔn yoli Gɛrsɔnfuɛ'm be nannan. Be buli Gɛrsɔnfuɛ'm be nun nnyɔn: Libnifuɛ mun ɔ nin Simɛifuɛ mun.

²² Blɛ bɔ be ´klɛ be dunman'n, be ti sran yasua akpi nso sran yasua ya nnun. (7.500) Yasua nga bɔ b'a di anglo kun nin anglo kun gua su'n be o nun wie.

²³ Gɛrsɔnfuɛ'm be akpasua'm be trantrannin sua'n i bue ng'ɔ kpɛ wia atɔliɛ lɔ'n i sin lɔ.

²⁴ Laɛl i wa Eliazaf yɛ ɔ ti Gɛrsɔnfuɛ'm be awlobo kpɛn nin-ɔn.

²⁵ Anannganman i tannin sua ng'ɔ yi i wun nglo nun'n, i lika nga be fa wlali Gɛrsɔnfuɛ'm bé sa nun kɛ be `nian su'n yɛ: tannin sua'n i klun nin i sin'n, ɔ nin like nga be fa kata tannin sua'n su'n, ɔ nin rido ng'ɔ o tannin sua'n i anuan'n nun'n,

²⁶ ɔ nin tanmue dandan nga be fa si awa'n, ɔ nin tannin sua'n nin Nyanmiɛn i sɔwlɛ'm be awlo klun'm be anuan nun rido'n, ɔ nin tannin sua'n i nyanman mun. Be yɛ be sieli be kɛ be `nian ninnge sɔ'm be lika-a.

²⁷ Keat yɛ ɔ ti Keatfuɛ'm be nannan nin-ɔn. Be bubuli Keatfuɛ'm be nun akpasua nnan: Amramfuɛ mun, nin Zizearfuɛ mun, nin Ebrɔnfuɛ mun, ɔ nin Iziɛlfuɛ mun.

²⁸ Kɛ be ka sran yasua'm be kwlaa, ɔ nin be nga b'a di anglo kun nin anglo kun gua su'n mun, be ti sran akpi mɔcuɛ sran ya nsiɛn (8.600). Be yɛ be nian Nyanmiɛn i ninnge'm be lika-a.

²⁹ Keatfuɛ'm be akpasua'n i ngblaliɛ'n wo Nyanmiɛn i lika'n i ngua lɔ.

³⁰ Iziɛl i wa Elizafan yɛ ɔ ti bé su kpɛn nin-ɔn.

³¹ Nyanmiɛn i alaka'n nin i tabli'n, ɔ nin kannin siewlɛ'n, ɔ nin Nyanmiɛn sɔwlɛ lika mun, ɔ nin ninnge nga be fa di junman Nyanmiɛn i lika'n nun'n, nin rido ng'ɔ o Nyanmiɛn i lika'n i klun lɔ'n, Keatfuɛ'm be yɛ be nian ninnge sɔ'm be lika-a.

³² Levifuɛ'm be kpɛn'n yɛlɛ Eleazar, Nyanmiɛn nyrun jranfuɛ Aarɔn i wa-a. I yɛ ɔ nian be kwlaa nga be di junman Nyanmiɛn i lika nun'n bé su-ɔ.

³³ Mɛrari yɛ ɔ ti Mɛrarifuɛ'm be nannan nin-ɔn. Be buli Mɛrarifuɛ'm be nun akpasua nnyɔn: Maklifuɛ mun, yɛ Misifuɛ mun.

³⁴ Kɛ be klɛli sran yasua mun ɔ nin ba yasua nga b'a di anglo kun nin anglo kun gua su'n be dunman'n, bɔ be kali be'n, be ti sran akpi nsiɛn sran ya nnyɔn. (6.200)

³⁵ Mɛrarifuɛ'm bé su kpɛnngbɛn'n yɛlɛ Abiail i wa Ziriɛl. Be ngblaliɛ liɛ'n wo Nyanmiɛn i lika'n i bue ng'ɔ kpɛ nglo lɔ'n i nun.

³⁶ Nyanmiɛn i lika'n i waka paplaapla nin waka nga be fa jaja nun'n, ɔ nin sua'n i ja'm be takawlɛ mun, yɛ ninnge'm bé onga'm be kwlaa, be yɛ be nian bé su-ɔ.

³⁷ Awlo klun'n i awa'n ja mun nin be takawlɛ mun, ɔ nin kpɛngbɛ mun, yɛ nyanman mun, be nian bé su wie.

³⁸ Moiz, nin Aarɔn nin i mma'm be ngblaliɛ liɛ'n wo wia afiliɛ lɔ kan be sin be wlu Anannganman i tannin sua ng'ɔ yi i wun nglo nun'n nun lɔ'n. Be yɛ be ´di Nyanmiɛn i lika'n i nun junman Izraɛlfuɛ'm be kwlaa be dunman nun-ɔn. Sɛ sran wie b'ɔ ti-man Nyanmiɛn i nyrun jranfuɛ'n, i waan ɔ ´di i sɔ junman'n wie'n, be `kun i.

³⁹ Levifuɛ nga Moiz nin Aarɔn be kali be'n, sran yasua mun ɔ nin ba yasua bɔ b'a di anglo kun nin anglo kun gua su'n, be ti sran akpi-akpi ablaɔn-nin-nnyɔn (22.000). Nyanmiɛn yɛ ɔ mannin mmla kɛ be ka be akpasua-akpasua sɔ mun-ɔn.

Talua ba mun bé ti kpɔlɛ

⁴⁰ Anannganman seli Moiz kɛ: «Ka Izraɛl talua ba nga be ti yasua'n, bɔ b'a di anglo kun nin anglo kun gua su'n, nan be klɛ be dunman.

⁴¹ I sin, sie Levifuɛ'm be ngunmin man be yo min Anannganman min liɛ klonglo. Man be sin Izraɛl talua ba'm be ajalɛ nun. Kpɛkuun man Levifuɛ'm be nnɛn'm be sin Izraɛlfuɛ'm be nnɛn'm bé wa klikli'm be ajalɛ nun.»

⁴² Anannganman i nuan su ndɛ ng'ɔ kan kleli Moiz kɛ ɔ `yo'n, yɛ Moiz niannin su yoli-ɔ. Ɔ man ɔ kali Izraɛl talua ba yasua'm be kwlakwla.

⁴³ Kɛ be klɛli talua ba nga be ti yasua bɔ b'a di anglo kun nin anglo kun gua su be dunman'n, bé nuan ti akpi-akpi ablaɔn-nin-nnyɔn sran ya nnyɔn sran ableso-nin-nsan (22.273).

⁴⁴ Anannganman seli Moiz kɛ:

⁴⁵ «Sie Levifuɛ'm be ngunmin man be yo min Anannganman min liɛ klonglo. Man be sin Izraɛl talua ba'm be ajalɛ nun. Man Levifuɛ'm be nnɛn'm be kusu be sin Izraɛlfuɛ'm be nnɛn'm be mma klikli'm be ajalɛ nun.

⁴⁶ Kɛ bɔ Izraɛlfuɛ'm be mma klikli'm be sɔnnin tra Levifuɛ'm be lele sran ya nnyɔn sran ableso-nin-nsan'n ti, man be kpɔ sran ya nnyɔn sran ableso-nin-nsan sɔ'm be ti.

⁴⁷ I sɔ'n ti, fa sran sɔ'm be kwlaa be ti sika jɛtɛ ufue mma nnun-nnun. Jɛtɛ mma kun ti gram blu. Man bé sunnzun sika sɔ'n min sua'n nun lɔ like sunnzunliɛ'n nun.

⁴⁸ Fɛ i sɔ sika'n fa man Aarɔn nin i mma mun. Ɔ ti be nga be tɔli su'n be ti kpɔlɛ sika.»

⁴⁹ Moiz man be yili sran nga be tɔli su bɔ Levifuɛ'm b'a kwla sin-man be ajalɛ nun'n bé ti kpɔlɛ sika.

⁵⁰ Sika ng'ɔ fɛli i Izraɛl talua ba'm bé sa nun'n, ɔ ti jɛtɛ ufue akpi kun jɛtɛ ya nsan jɛtɛ ufue ablesiɛn-nin-nnun (1.365). Be niannin Nyanmiɛn i tannin sua'n nun lɔ sika sunnzunliɛ'n su yɛ be sunnzunnin-ɔn.

⁵¹ Moiz fali ti kpɔlɛ sika'n wlali Aarɔn nin i mma'm bé sa nun kɛ Anannganman fa kan kleli i kɛ ɔ yo'n sa.