Kalɛ 28 - NYANMIƐN NDƐ'N 1998

Tɛ yilɛ'n i su mmla Cɛn kun nun sraka liɛ'n

¹ Anannganman seli Moiz kɛ

² ɔ `kan ndɛ yɛ mun kle Izraɛlfuɛ mun. I waan: «Amun `nian su kpa nan sɛ i blɛ'n ju'n, amun `fa tɛ ng'ɔ ti min liɛ'n i aliɛ nga be yrɛ i b'ɔ bɔn min bue nun fannin be man min.

³ Cɛn kwlakwla amun `fa bua nga b'a kpɛ cro'n bɔ b'a di afuɛ kun'n, i sɔ nnyɔn be blɛ min. Bua nga b'a kpɛ cro'n sɔ'n, bɔ lɛ fi nun-man bé wun'n, man be yra be wunmuan'n. Ɔ ti tɛ kun bɔ be yrɛ i nnɛn'n kɔlikɔli'n. Man be yi i tititi be man min.

⁴ Man be fa bua bɔ ɔ'a kpɛ cro klikli'n be yi tɛ nglɛmun, yɛ i nnyɔn su'n, be `fa yi tɛ nnɔsua.

⁵ Man be sie su ble sanmlɛn mlɛnnɛnnɛn kpa, be fa olivie ngo b'ɔ ti litri kun nin sin'n be fa fɔtɔ i.

⁶ Tɛ nga be yrɛ i nnɛn'n kɔlikɔli'n bɔ be yili i Sinai oka'n su lɔ'n, i kunngba nin-ɔn. Ɔ ti tɛ kun bɔ be yrɛ i nnɛn'n kɔlikɔli, kpɛkuun ɔ bɔn min bue nun fannin.

⁷ Man be fa nzan litri kun nin sin be `uka bua bɔ ɔ'a kpɛ cro nga be fa yi nglɛmun nun tɛ'n i su. Nzan sɔ'n, man be guɛ i ase man min, be guɛ i ase min lika kpa i nun.

⁸ Yɛ man be `fa bua'n i nnyɔn su'n be man min nnɔsua nun. Cɛlɛ ninnge kunngba nga be fa ukali nglɛmun bua'n su'n, yɛ be `fa uka nnɔsua nun liɛ'n su-ɔ, ɔ ti tɛ bɔ be yrɛ i nnɛn'n kɔlikɔli b'ɔ bɔn min bue nun fannin.»

Wunmiɛn-delɛ-cɛn'n i nun tɛ yilɛ'n

⁹ «Wunmiɛn-delɛ-cɛn'n nun'n, man be fa bua nga b'a kpɛ cro'n bɔ b'a di afuɛ kun'n, bɔ lɛ fi nun-man bé wun'n, i sɔ nnyɔn, be `fa yi tɛ be man min. Man be sie su ble sanmlɛn mlɛnnɛnnɛn kpa kilo nsiɛn bɔ be fɔtɔli i nin ngo'n, yɛ man be sie su nzan nga be guɛ i ase'n.

¹⁰ Wunmiɛn-delɛ-cɛn'n nun tɛ nga be yrɛ i nnɛn'n kɔlikɔli'n yɛ ɔ o lɛ-ɔ. Be `fa tɛ sɔ'n uka tɛ nga be yrɛ i nnɛn'n kɔlikɔli'n cɛn'n kwlakwla'n nin nzan nga be guɛ i ase cɛn kwlakwla nun'n be su.»

Anglo le kun'n i nun sraka

¹¹ «Anglo kwlakwla i cɛn ba klikli'n, amun `fa nannin tola bɔ b'a kpɛ cro'n sɔ nnyɔn, bua nene kun, yɛ bua nga b'a kpɛ cro'n bɔ b'a di afuɛ kun bɔ lɛ fi nun-man bé wun'n, i sɔ nso, amun `fa yi tɛ nga be yrɛ i nnɛn'n kɔlikɔli'n be man min.

¹² Kɛ be man nnɛn kun'n, man be fa ble sanmlɛn mlɛnnɛnnɛn kpa nga be fa ngo be fɔtɔli i'n be sie su, nannin tola kun liɛ'n ti kilo mɔcuɛ, bua nene kun liɛ'n ti kilo nsiɛn.

¹³ Bua nga ɔ'a kpɛ cro'n kun liɛ'n ti kilo nsan. Yɛ ɔ ti tɛ nga bɔ be yrɛ i nnɛn'n kɔlikɔli'n b'ɔ bɔn min bue nun fannin nin-ɔn.

¹⁴ Nzan nga be guɛ ase'n kusu, litri nsan yɛ be `fa sie i nannin tola kun su-ɔ, litri nnyɔn yɛ be `fa sie i bua nene kun su-ɔ, yɛ litri kun yɛ be `fa sie i bua nga ɔ'a kpɛ cro'n kun su-ɔ. Kɛ amun wlu anglo uflɛ kwlaa nun'n, tɛ ng'ɔ fata kɛ amun yi'n yɛ ɔ o lɛ-ɔ. Amun `yi i sɔ afuɛ nuan kun nun anglo'n kwlaa nun.

¹⁵ Man be fa boli kpakpuɛ kun be yi tɛ be fa kpata min. I li nun-man tɛ nga be yrɛ i titi'n nin nzan nga be guɛ i ase manndimaan'n be nun wie.»

Tɛ nga be yi i Delɛ-cɛn'n nun'n

¹⁶ «Anglo klikli'n, i cɛn ba blu-nin-nnan su'n ɔ ti Delɛ-cɛn'n b'ɔ ti min liɛ'n i dilɛ blɛ.

¹⁷ Anglo kunngba sɔ'n, i le blu-nin-nnun su'n, ɔ ti cɛn dilɛ'n i le kun. Be `di kpaun bɔ b'a gua-man nun kpaun ayre'n sɔ lele cɛn ba nso.

¹⁸ Cɛn ba klikli'n su'n, amun `yia nan amun `su min. Nán amun di amun junman nga amun di i titi'n.

¹⁹ Amun `fa nannin tola nga b'a kpɛ cro'n sɔ nnyɔn, nin bua nene kun, ɔ nin bua nga b'a kpɛ cro'n bɔ b'a di afuɛ kun'n i sɔ nso bɔ lɛ fi nun-man be wun. Amun `fa be yi tɛ nga be yrɛ i nnɛn'n kɔlikɔli'n man min.

²⁰ Nnɛn nga be ´fa yi tɛ'n, man be sie su ble sanmlɛn mlɛnnɛnnɛn kpa bɔ be fa ngo fɔtɔli'n, nannin tola kun su ble sanmlɛn kilo ngwlan, bua nene kun su kilo nsiɛn,

²¹ yɛ bua nga ɔ'a kpɛ cro kun su kilo nsan.

²² Amun `fa boli kpakpuɛ kun be `yi tɛ fa kpata min, nan be yo nzɔliɛ b'ɔ kle kɛ m'an yaci amún wun sa'n m'an cɛ amun'n.

²³ Man be yi tɛ sɔ'n be fa uka nglɛmun kwlaa tɛ nga be yrɛ i nnɛn'n kɔlikɔli'n su.

²⁴ Amun `yi tɛ sɔ'n lele cɛn ba nso, ɔ ti aliɛ bɔ be fa yi sraka nga be yrɛ i kɔlikɔli'n b'ɔ bɔn min bue nun fannin'n. Man be yi tɛ sɔ'n be fa uka tɛ nga be yi i titi bɔ be yrɛ i'n, ɔ nin nzan nga be guɛ i ase manndimaan'n bé su.

²⁵ Cɛn ba nso'n su'n, amun `yia ekun, yɛ amun `manman min, nán amun di junman fi.»

Ble kpɛlɛ i cɛn dilɛ cɛn'n nun tɛ'n

²⁶ «Cɛn ng'ɔ ti ninnge'm be mma klikli'n i cɛn'n, bɔ i nun yɛ amun fa amun fie'n su ninnge'm be mma uflɛ-uflɛ'm be man min'n, amun le mɔcuɛ cɛn dilɛ blɛ'n nun'n, amun `yia nan amun `su min, nán amun di junman fi.

²⁷ Amun `fa nannin tola nga b'a kpɛ cro'n sɔ nnyɔn, nin bua nene kun, ɔ nin bua nga b'a kpɛ cro'n bɔ b'a di afuɛ kun'n, i sɔ nso, amun `fa yi tɛ nga be yrɛ i nnɛn'n kɔlikɔli'n b'ɔ bɔn min bue nun fannin'n.

²⁸ Kɛ amun yi nnɛn kun'n, amun `sie su ble sanmlɛn mlɛnnɛnnɛn kpa bɔ be fa ngo be fɔtɔli'n. Man be sie nannin tola kun su ble sanmlɛn mlɛnnɛnnɛn kpa kilo ngwlan, be `sie bua nene kun su ble sanmlɛn mlɛnnɛnnɛn kpa kilo nsiɛn.

²⁹ Kpɛkuun man be sie bua nga b'a kpɛ cro'n kun su kilo nsan.

³⁰ Amun `fa boli kpakpuɛ kun be yi tɛ man min, nan be `yo nzɔliɛ b'ɔ kle kɛ m'an yaci amun wun sa'n m'an cɛ amun'n.

³¹ Tɛ sɔ nga amun yi be lɛ'n be uka tɛ nga amun yrɛ i nnɛn'n titi'n, nin sraka nga amun fa ble annzɛ like ng'ɔ ti kɛ ble sa be yi'n be su. Nnɛn nga amun fa yi tɛ'n, nán lɛ fi tran bé wun, yɛ amun fa nzan nga be kleli'n amun `fa uka bé su.»