Kalɛ 27 - NYANMIƐN NDƐ'N 1998

Aja'n i su mmla

¹ Zɛlɔfsad lɛ ba bla mun, be yɛlɛ: Makla, nin Nɔa, nin Ɔgla, nin Milka, ɔ nin Tirza, be fin Manase osu'n nun. Osu sɔ'n fin Zozɛf i osu'n nun. Zɛlɔfsad i si'n yɛlɛ Efɛr, Efɛr kusu si'n yɛlɛ Galaad, Galaad i si'n yɛlɛ Makir, Makir i si'n yɛlɛ Manase, Manase kusu i si'n yɛlɛ Zozɛf.

² Bla nnun sɔ'm be ko toli Moiz nin Nyanmiɛn nyrun jranfuɛ Eleazar, nin wlengbi mun ɔ nin sran'm be kwlaa tannin sua'n i nyrun lɛ. Be seli kɛ:

³ «E si wuli aawlɛ flɛnnɛn'n nun lɔ. Ɔ nun-man be nga be nin Kɔre i minniɛn'm be jasoli Anannganman i wun'n be nun wie. I bɔbɔ i sa tɛ b'ɔ yoli'n ti yɛ ɔ wuli-ɔ. Ɔ'a wu-man ba yasua yɛ ɔ fa wuli-ɔ.

⁴ ?Ɔ yo sɛ ti yɛ é si liɛ'n i dunman'n wa nunnun i osu liɛ'n nun sa-a? ?Ba yasua b'ɔ lɛ-mɛn i'n ti-ɔ? Man e tranwlɛ liɛ é si i niaan'm be wun lɛ.»

⁵ Moiz kannin ndɛ sɔ'n kleli Anannganman.

⁶ Yɛ Anannganman seli Moiz kɛ:

⁷ «Zɛlɔfsad i mma mmla'm be ndɛ yo fɛ. Man be asiɛ liɛ bé si niaan bian'm be afiɛn. Man bé si i asiɛ liɛ'n ɔ yo be liɛ.

⁸ I sin, kan ndɛ nga kle Izraɛlfuɛ mun: ‹Sɛ sran kun ´wu kɔ'n nan ɔ'a yaci-man ba yasua lɛ'n, amun `fɛ i aja'n be `mɛn i wa bla'n.

⁹ Yɛ sɛ ɔ lɛ-man ba bla'n, amun `fɛ i aja'n be mɛn i niaan yasua mun.

¹⁰ Sɛ kusu ɔ lɛ-man niaan bian'n, amun `fɛ i aja'n be mɛn i si i niaan yasua mun.

¹¹ Sɛ i si lɛ-man niaan yasua'n, amun `fɛ i aja'n be mɛn i osufuɛ ng'ɔ mɛntɛn i koko b'ɔ nin i be awlobo ti kun'n. Man Izraɛlfuɛ'm be fa mmla sɔ'n su tititi kɛ n fa kleli wɔ'n sa.› »

Zozie yɛ Anannganman kpɛli i kɛ ɔ kaci Moiz-ɔ

¹² Anannganman seli Moiz kɛ: «Fu Abarim oka nga su nan nian mɛn nga n su fa man Izraɛlfuɛ mun'n.

¹³ Niɛn i kpa, sanngɛ ɔ kusu a wa wu kɛ ɔ niaan bian Aarɔn sa.

¹⁴ Sa ti b'ɔ ´yo sɔ'n yɛlɛ kɛ amun kacili mín nuan su ndɛ nga n kɛnnin i Zin aawlɛ flɛnnɛn'n nun lɔ'n. Amun kacili min nuan ndɛ'n blɛ nga Izraɛlfuɛ'm be kwlaa be kunndɛli min nin utre'n nun. Amu'an yo-man man min dunman'n ɔ'a fu-man be nyrun blɛ bɔ be waan be `man be nzue Kadɛs lɔ'n. Amun ti man n dunman ɔ'a fu-man Zin aawlɛ'n nun lɔ Mɛriba nzue bɔ be flɛ i Utre nzue'n i ndɛ'n su .»

¹⁵ Moiz seli Anannganman kɛ:

¹⁶ «Anannganman, ɔ bɔ a man like kwlaa nga a yili be'n be nguan'n, fa sran kun sie nvle'n i ti su.

¹⁷ Man ɔ yo sran'm bé su kpɛnngbɛn kun b'ɔ kwla ´sie bé sa kwlaa nun kɛ ɔ ´yo nan ɔ nvle'n ɔ'a yo-man kɛ nnɛn wie bɔ be lɛ-man sunianfuɛ sa'n ti.»

¹⁸ Anannganman seli Moiz kɛ: «Flɛ Nɛn i wa Zozie b'ɔ ti yasua kun bɔ min Wawɛ'n wo i nun'n, nan fa ɔ́ sa'n fuɛ i su.

¹⁹ Fɛ i kɔ min nyrun jranfuɛ'n i nyrun sran'm be kwlaa be nyrun. Fɛ i yo ɔ kacifuɛ'm be kwlaa be nyrun.

²⁰ Nyrun nga bɔ a lɛ i bɔ a fa sie Izraɛlfuɛ mun'n, man ɔ nyan wie nan bé nyin yi i.

²¹ Sanngɛ man i bɔbɔ wɔ min nyrun jranfuɛ Eleazar sin. I yɛ ɔ wa fa like nga be fa si min klun sa'n ´fa usa min klun sa mun ´mɛn i-ɔ. Zozie nin Izraɛlfuɛ'm be kwlaa be `fɛ i nuan ndɛ'n su sa kwlaa nun.»

²² Moiz fali Anannganman i ndɛ'n su. Ɔ flɛli Zozie yɛ ɔ fɛli i jrannin Nyanmiɛn nyrun jranfuɛ Eleazar nin nzrafuɛ'm be kwlaa be nyrun.

²³ Ɔ fɛli i sa'n sieli i su, yɛ ɔ fɛli i kacili i wun kɛ Anannganman fa seli i kɛ ɔ `yo'n sa.