Kalɛ 25 - NYANMIƐN NDƐ'N 1998

Amuɛn bɔ Izraɛlfuɛ'm be wa sɔli i Moab mɛn'n nun'n i ndɛ

¹ Izraɛlfuɛ'm be trannin Sitim lɛ, be nin Moab bla'm be trannin tekle bolɛ'n nun.

² Bla sɔ'm be yoli man Izraɛlfuɛ'm be sɔli be amuɛn mun. Be dili be amuɛn su aliɛ'n wie, yɛ be kotoli be amuɛn sɔ'm be bo, be suli be.

³ Be nin be bé bo yoli kun be sɔli amuɛn nga be flɛ i Baal-Pɛɔr'n, ɔ man Anannganman fali bé wun ya dan kpa.

⁴ Anannganman seli Moiz kɛ: «Tra Izraɛl kpɛnngbɛn nga be o Izraɛlfuɛ'm bé su'n be kwlaa, man be kpɛ bé nyin wia'n su lɔ, yɛ man be bo be kɔmin min nyrun. Kɛ ɔ ko yo sɔ liɛ'n, n ´gua min ya dan nga n fɛli amún wun'n i ase.»

⁵ Moiz seli be nga be dun mmua Izraɛlfuɛ'm be nyrun'n be kɛ: «Man sran kun ɔ kun i sran liɛ'm be nun sran nga be sɔli amuɛn nga be flɛ i Baal-Pɛɔr'n.»

⁶ Be ´nian-an, Izraɛlfuɛ kun nin Madian bla kun yɛ be su ba i niaan Izraɛlfuɛ'm be afiɛn yɛ. Moiz nin Izraɛlfuɛ nga be yiali bɔ be su sun tannin sua bɔ Anannganman yi wun i nglo nun'n nun'n, be wunnin be.

⁷ Nyanmiɛn nyrun jranfuɛ Fine b'ɔ ti Eleazar i wa b'ɔ ti Aarɔn i osu'n nunfuɛ'n, ɔ jasoli sran'm be afiɛn, kpɛkuun ɔ fali cua,

⁸ ɔ fa wluli sran sɔ'n i sin i tannin sua'n nun kan ɔ nin Madian bla'n be ɔli lɔ'n, nan ɔ'a fa cua'n ɔ'a wɔwɔ be nnyɔn'n be klun nan ɔ'a kun be. Kɛ ɔ yoli sɔ'n, yɛ nyrɛnnɛn ng'ɔ tɔli Izraɛlfuɛ'm bé su'n ɔ kpɛli-ɔ.

⁹ Sanngɛ be nga be wuli nyrɛnnɛn sɔ'n ti'n be ti sran akpi-akpi ablaɔn-nin-nnan (24.000).

¹⁰ Anannganman seli Moiz kɛ:

¹¹ «Eleazar i wa Fine b'ɔ ti Nyanmiɛn nyrun jranfuɛ'n b'ɔ ti Aarɔn i osu'n nunfuɛ'n, i dunman nun ti min ya nga n fɛli Izraɛlfuɛ'm bé wun ɔ'a wie. Ɔ kplili mín ti amun afiɛn. I sɔ'n ti yɛ man m'an nunnun-man Izraɛlfuɛ mun kɛ n fali ya nin-ɔn.

¹² Siɛn'n, se i kɛ e nin i e wa tra aenguɛ kun b'ɔ ti aunjuɛ aenguɛ.

¹³ Aenguɛ sɔ'n, ɔ ti kɛ e nin i nin i osu'n nunfuɛ'm be kwlaa yɛ e trali-ɔ. Ɔ ´yo man be ´yo min nyrun jranfuɛ manndimaan. Afin i wun mantanlɛ ng'ɔ fa mantan min Nyanmiɛn'n, ɔ yili i nglo weiin. Ɔ ti kɛ ɔ kpatali Izraɛlfuɛ'm bé ti, ɔ man n yacili.»

¹⁴ Izraɛlfuɛ nga be kunnin i nin Madian bla'n likawlɛ'n, be flɛ i Zimri, Sali i wa-a. Ɔ ti Simeɔn akpasua'n su awlobo kpɛn.

¹⁵ Madian bla'n kusu be flɛ i Kɔzbi, be flɛ i si'n kɛ Sir. Sir sɔ'n ti Madian mɛn'n nun lɔ akpasua kun su awlobo kpanngban kpa bé su kpɛn.

¹⁶ Anannganman seli Moiz kɛ:

¹⁷ «Amun `utu Madianfuɛ mun, amun `nunnun be.

¹⁸ Pɛɔr ndɛ'n nun'n, be yoli amun kpɔfuɛ bɔ be toli amun gblɛ, yɛ Kɔzbi b'ɔ ti be kpɛnngbɛn kun'n i wa talua'n i ndɛ liɛ'n nun kusu'n be yoli sɔ ekun. Kɔzbi sɔ'n yɛ kɛ nyrɛnnɛn'n bali Pɛɔr lɔ'n, be kunnin i nin-ɔn.»

Izraɛlfuɛ'm be dunman klɛlɛ i nnyɔn su'n

¹⁹ Kɛ nyrɛnnɛn sɔ'n kwlaa wieli'n,