Kalɛ 24 - NYANMIƐN NDƐ'N 1998

¹ Kɛ bɔ Balaam wunnin kɛ Anannganman klo kɛ ɔ ´yra Izraɛlfuɛ'm be nguan'n ti'n, ɔ'a ɔ-mɛn i sa usalɛ kɛ ɔ fa yo i titi'n sa. Ɔ kali lɛ kpɛli i nyin aawlɛ flɛnnɛn'n su lɔ.

² Kɛ ɔ niannin lɔ sɔ'n, ɔ wunnin Izraɛlfuɛ'm bɔ be o be ngblaliɛ'n nun lɔ'n, nan Nyanmiɛn Wawɛ'n ɔ'a jrɛ i su,

³ nan ɔ'a kan ndɛ nga mun: «Ndɛ nga m bɔbɔ Bɛɔr wa Balaam bɔ n wun aolia nun sa mun'n n kan'n yɛ ɔ o yɛ:

⁴ Min bɔ Nyanmiɛn kɛn i nuan su ndɛ mun kle min'n, bɔ kpɛkuun n kwla wun nvialiɛ nun sa mun'n, afin kɛ n su i'n, ɔ yi i wun nglo kle min, ndɛ nga n kan'n yɛ ɔ o yɛ:

⁵ Izraɛl nvlefuɛ mun, amun bɔ Zakɔb i osu'n nunfuɛ yɛlɛ amun'n, amún tannin sua nga amun tran nun'n be ti nglanman o!

⁶ Ɔ waan nzue wie yɛ ɔ su sonji kɔ-ɔ. Be ti kɛ fie b'ɔ o nzue ba nuan'n sa. Be ti kɛ waka bɔ be flɛ i aloɛs bɔ ɔ waan Anannganman yɛ ɔ tali'n sa. Be ti kɛ sɛdri waka bɔ ɔ waan Anannganman tali'n be nzue nuan'n sa.

⁷ A wun be-ɔ, ɔ waan nzue b'ɔ fin nzue ti lika wie nun lɔ ɔ wa lualua fie mun'n sa. Izraɛlfuɛ'm be famiɛn'n ɔ kwla Agag, be nvle liɛ'n ɔ su nyan wunmiɛn dan kpa.

⁸ Anannganman yɛ ɔ fali be Ezipt lɔ bali-ɔ, i fanngan bɔ like fi kwla jrɛn-mɛn i nyrun'n b'ɔ ti kɛ awɛ'n i fanngan'n sa'n ti. Be nunnun nvle nga be waan be nin be ´kun'n mun kpɛ kunngba, be bubu be owie mun, yɛ be fa be ta mma mun san-san be.

⁹ Be ti kɛ asɔmɔli mun sa, be koto, kpɛkuun b'a la. ?Wan yɛ ɔ kwla mian be kɛ be jaso-ɔ? Izraɛlfuɛ mun, man sran ng'ɔ yra amun nguan'n ɔ nyan muae klanman, yɛ sran ng'ɔ bo amun sannzan'n, man nyrɛnnɛn tɔ i su .› »

¹⁰ Balak fali Balaam i wun ya tɛtɛ kpa, ɔ boli ndɛ kplo, i sin ɔ seli Balaam kɛ: «N yiali wɔ kɛ a wa bo min kpɔfuɛ'm be sannzan kpɛkuun nian, i kpɛ nsan yɛ, muae klanman yɛ a bo a man be-ɔ.

¹¹ Kɔ siɛn'n, kɔ ɔ klɔ. N seli wɔ kɛ n wa man wɔ anyrunnyan, sanngɛ Anannganman ɔ'a kplin-man su kɛ a nyan nyrun sɔ'n.»

Balaam kannin nyrun nga Izraɛlfuɛ'm be wa nyɛn i'n i ndɛ

¹² Balaam tɛli Balak su kɛ: «?M'an kan-man ndɛ nga m'an kle-man ɔ sran nga a sunmannin be mín sin'n mun?

¹³ ?M'an se-man be kɛ sɛ bɔ Balak fa jɛtɛ ufue nin sika ɔkwlɛ bɔ ɔ'a yi i sua'n piɛ'n fa man min'n, m bɔbɔ n su kwla kpɛ-man mín ti nun n yo-man sa kun sa, sɛ ɔ ti tɛ o, sɛ ɔ ti kpa o, nan san ndɛ nga Anannganman kan kle min'n yɛ n ´kan-an?

¹⁴ Siɛn'n, n su sa mín sin n kɔ min mɛn'n nun, sanngɛ kwlaa nan m'an wɔ'n, bla nan n wa bo sa nga Izraɛlfuɛ'm be wa fa yo ɔ nvle'n cɛn kun'n su n kle wɔ.»

¹⁵ Nan Balaam ɔ'a se kɛ: «Ndɛ nga m bɔbɔ min Bɛɔr i wa Balaam bɔ n wun aolia nun sa mun'n n kan'n yɛ ɔ o yɛ:

¹⁶ Min bɔ Nyanmiɛn kɛn i nuan su ndɛ mun kle min b'ɔ tike aolia nun ninnge'm bé su kle min'n, bɔ kpɛkuun n kwla wun nvialiɛ nun sa mun'n, afin kɛ n su i'n, ɔ yi i wun nglo kle min, ndɛ nga n kan'n yɛ ɔ o yɛ:

¹⁷ N wun sa nga ɔ wa ju'n, sanngɛ nán ndɛkɛn yɛ i sɔ sa'n ɔ ´ju-ɔ. N wun kɛ sa dan kun su wa yo, sanngɛ i blɛ nian ju-man ka. Nzraama kun ´fite Zakɔb i osu'n nunfuɛ'm be afiɛn, famiɛn dan kun wa fite Izraɛlfuɛ'm be afiɛn. Famiɛn sɔ'n ɔ ´fɛ i kpɔnman'n fin Moabfuɛ'm be papla nun, ɔ ´fa fin Sɛt i mma'm be kwlaa bé ti'n su .

¹⁸ Ɔ fa Seir ekun, i kpɔfuɛ Edɔmfuɛ'm be klɔ sɔ'n. Izraɛlfuɛ be ´nyan kwlalɛ.

¹⁹ Zakɔb i osu'n nunfuɛ'n ɔ ´sie i kpɔfuɛ mun, ɔ ´nunnun klɔ'm be sufuɛ nga be kali'n mun.»

Balaam kannin Izraɛlfuɛ'm be kpɔfuɛ'm be sacilɛ ndɛ

²⁰ I sin Balaam wa wunnin Amalɛkfuɛ mun, ɔ seli be kɛ: «Amalɛk, nvle dan b'ɔ lɛ fanngan'n yɛ. Sanngɛ i agualiɛ'n yɛlɛ sacilɛ b'ɔ wa saci mlɔnmlɔn'n.»

²¹ Ɔ wunnin Kenfuɛ mun yɛ ɔ seli kɛ: «Kenfuɛ mun, kɛ amun wo amun mɛn'n nun'n, amun wun ti amun fɔuun, amun ti fiawa kɛ anunman bɔ i sua'n wo yɛbuɛ nun'n sa.

²² Sanngɛ sin wa saci amun tranwlɛ mun, Asirifuɛ'm be wa tra amun lomuɛn.»

²³ Balaam seli ekun kɛ: «?Kɛ Nyanmiɛn ko tin i wun ase'n, wan yɛ ɔ kwla tran nguan nun-ɔn?

²⁴ Kitim bue liɛ'n su lɔ alɛ mma'm be su ba Be nga be fa mɛn'n, be ´yo Asirifuɛ mun be nin Ebɛr i osu'n nunfuɛ'm be tɛtɛ, sanngɛ be bɔbɔ kusu be su kɔ mlinlɛ.»

²⁵ Kɛ Balaam wieli i sɔ ndɛ'n kan'n, ɔ sɛli i sin ɔli i mɛn'n nun, kɛ ɔ ´yo sɔ'n, wuun Balak kusu su kɔ i liɛ nun.