Kalɛ 23 - NYANMIƐN NDƐ'N 1998

¹ Balaam seli Balak kɛ ɔ `kplan tɛ yiwlɛ nso mɛn i, nan ɔ kunndɛ i su nannin tola nso nin bua nene nso.

² Balak niannin Balaam i nuan ndɛ'n su yoli. Be fali nannin tola kun nin bua nene kun be fa yili tɛ tɛ yiwlɛ'm be su sɔ kunngun lele kpɛnnin lɔ.

³ Balaam seli Balak kɛ: «Jran ɔ tɛ'm bé wun wa, n cia mín wun kan. Wienun-ɔn, sɛ Anannganman wa yi i wun nglo kle min o. I nuan su ndɛ kwlaa ng'ɔ kan kle min'n, n ´kan kle wɔ.» Yɛ Balaam ko fuli kpɔlɛ kun ti su-ɔ.

⁴ Nyanmiɛn bali Balaam wun lɛ, nan Balaam ɔ'a se i kɛ: «M'an kplan tɛ yiwlɛ nso yɛ m'an yi be su tɛ, kun su nannin tola kun, nin bua kun, kun su nannin tola kun nin bua kun.»

⁵ Ndɛ ng'ɔ fata kɛ Balaam kan'n, Nyanmiɛn fa wlɛli i nuan, nan ɔ'a se i kɛ ɔ `sɛ i sin Balak wun lɔ.

⁶ Yɛ Balaam ko toli Balak lɔ-ɔ. Kɛ ɔ ´to i lɔ'n, wuun ɔ tɛ jin nglo, nnɛn nga be fa yili tɛ'n bé wun lɛ, ɔ nin Moab famiɛn i awlo lɔ sran dan mun yɛ be o lɛ-ɔ.

⁷ Balaam seli kɛ: «Moab famiɛn Balak ko flɛli min Siri mɛn'n nun lɔ oka-oka lika'n nun lɔ kɛ m bla wa. Ɔ seli min kɛ: Bla nan w'a bo Izraɛlfuɛ'm bɔ be ti Zakɔb i osu'n nunfuɛ'm be sannzan. Yo nan nyrɛnnɛn `tɔ bé su.

⁸ ?N ´sin nin yɛ n ´kwla bo nvle kun i sannzan b'ɔ ´yo ye-ɔ, sɛ Nyanmiɛn bɔbɔ ɔ'a bo-mɛn i'n? ?N ´sin nin yɛ n ´kwla se kɛ man nyrɛnnɛn tɔ nvle kun bɔ Anannganman bɔbɔ kle-mɛn i nyrɛnnɛn'n i su-ɔ?

⁹ Kɛ n wo kpɔlɛ'n su wa'n, n nian nvle sɔ'n i nun sran mun. Kɛ n wo kpɔlɛ'm bé ti su wa bɔ n nian be'n, be ti nvle kun bɔ be o be ngunmin, be nin nvle kun nga'm be ti-man kun.

¹⁰ ?Wan yɛ ɔ kwla ka Izraɛlfuɛ kpanngban nga mun-ɔn? ?Wan yɛ ɔ kwla si Zakɔb i osu'n nunfuɛ'm bé nuan-an? Sɛ Nyanmiɛn di su nan n wu kɛ sran kpa sɔ'm be wie wulɛ liɛ'n sa'n, sɛ min awieliɛ'n gua min kɛ be liɛ'n sa'n, ɔ ´yo min fɛ o!»

¹¹ Balak seli Balaam kɛ: «?Nga a yoli min yɛ'n i bo yɛlɛ onin? N yiali wɔ kɛ a wa bo min kpɔfuɛ'm be sannzan kpɛkuun a su yra be nguan.»

¹² Balaam tɛli i su kɛ: «?Min liɛ nga n yo'n, nán i yɛlɛ ndɛ nga Anannganman fa wla mín nuan'n i kanlɛ?»

Muae'n i nnyɔn su bɔ Balaam boli mannin Izraɛlfuɛ mun'n

¹³ Balak seli Balaam ekun kɛ: «Bla e wɔ lika uflɛ. Lɔ liɛ'n a ´kwla wun Izraɛlfuɛ'm be kwlakwla. Afin wa liɛ'n, be bue yɛ a wun i-ɔ. Lɔ sa liɛ'n, a wa bo be sannzan a ´man min.»

¹⁴ Balak fali Balaam ɔli sasawlɛ sua'n nun lɔ Pisga oka'n su. Balak yoli tɛ yiwlɛ nso, ɔ yili be su tɛ ɔ nin nannin tola nin bua nene kunngun sɔ trilili sin yiali nun.

¹⁵ Balaam seli Balak kɛ: «Jran ɔ tɛ nga a yili be'n bé wun wa, n ´ko ti Nyanmiɛn i nuan su ndɛ'n.»

¹⁶ Anannganman yili i wun nglo kleli Balaam, ɔ fɛli i ndɛ'n wlɛli i nuan, nan ɔ'a se i kɛ ɔ `sɛ i sin Balak wun lɔ.

¹⁷ Kɛ Balaam ´to Balak lɔ'n, wuun ɔ tɛ jin nglo nnɛn ng'ɔ fa yili tɛ'n bé wun lɛ. Ɔ nin Moab famiɛn i awlo lɔ sran dan mun yɛ be o lɛ-ɔ. Balak usɛli i kɛ: «?Nguɛ ndɛ yɛ Anannganman kan kleli wɔ-ɔ?»

¹⁸ Balaam seli kɛ: «Zipɔr wa Balak, jaso nan sie ɔ su kpa,

¹⁹ Nán klɔ sran yɛlɛ Nyanmiɛn nan ɔ'a bua ato. Nán bla yɛ ɔ wuli i nan ɔ'a kaci aniɛn. ?Ndɛ ng'ɔ kan'n, ɔ su yo-mɛn i nuan sa? ?Like nga i waan ɔ ´yo'n, ɔ su yo-man?

²⁰ Nian, Nyanmiɛn waan n `yra Izraɛlfuɛ'm be nguan. Kɛ bɔ Nyanmiɛn mannin be muae klanman'n ti, n kusu n kan-man ndɛ uflɛ.

²¹ Anannganman wun-man sa tɛ fi Zakɔb wun. Ɔ wun-man sa nga Izraɛlfuɛ'm be yo b'ɔ ti-mɛn i su-ɔ. Ɔ ti be Nyanmiɛn, ɔ nin be yɛ ɔ tran-an yɛ be mɛnmɛn i kɛ be fa manman famiɛn sa.

²² I yɛ ɔ fali be Ezipt lɔ bali-ɔ, i fanngan bɔ like fi kwla jrɛn-mɛn i nyrun b'ɔ ti kɛ awɛ'n i fanngan sa'n ti.

²³ Wunnzue nin bae ninnge'm be ti-man Izraɛlfuɛ'm be nyrun like fi. Kɛ i blɛ ko ju'n, be ´fa ninnge nga Nyanmiɛn yo'n mun `kle be.

²⁴ Nvle sɔ'n, ɔ jaso kɛ asɔmɔli wie bɔ sɛ ɔ nian di-man nnɛn b'ɔ trɛli i'n, sɛ ɔ nian nɔn-mɛn i mmoja'n, wuun ɔ nian la-man'n sa.»

²⁵ Balak seli Balaam kɛ: «Sɛ ɔ li ɔ waan a bo-man be sannzan'n, nán bo muae klanman man be kusu e!»

²⁶ Balaam tɛli i su kɛ: «?M'an dun mmua kan kle-man wɔ kɛ Anannganman i nuan su ndɛ kwlaa ng'ɔ fa wla mín nuan'n yɛ n ´kan-an?»

Balaam i nuan yralɛ kpɛ nsan su'n

²⁷ Balak seli i ekun kɛ: «Bla man e wɔ lika uflɛ, sɛ wienun-ɔn lɔ liɛ'n, Nyanmiɛn ´kplin su kɛ a bo nvle sɔ'n i sannzan a man min o.»

²⁸ Ɔ fali Balaam ɔli Pɛɔr oka'n su lɔ kan lika'n ti kpɛtɛkplɛɛ lɔ'n.

²⁹ Balaam seli Balak kɛ: «Kplan tɛ yiwlɛ nso wa man min, nan kunndɛ bé su nannin tola nso nin bua nene nso bla.»

³⁰ Balak niannin nga Balaam kannin'n su yoli, i sin ɔ fali nannin tola nin bua nene mun yili tɛ. Ɔ yoli i sɔ tɛ yiwlɛ'm be kwlaa bé su kunngun sin yiali nun.