Kalɛ 22 - NYANMIƐN NDƐ'N 1998

IZRAƐLFUƐ'M BE O MOAB MƐN'N NUN Balaam i ndɛ'n

¹ Izraɛlfuɛ'm be ɔli be ko kpɛli be ngblaliɛ Moab i lika kpɛtɛkplɛɛ'n nun. Be kpɛli i Zurdɛn nzue ba'n i bue kun ng'ɔ o wia afiliɛ lɔ'n Zeriko klɔ'n i nyrun ndɛnman su lɛ.

^2-4 Zipɔr i wa Balak b'ɔ i blɛ sɔ'n nun i yɛ ɔ ti Moab famiɛn'n, ɔ tili like nga Izraɛlfuɛ'm be fa yoli Amɔrfuɛ mun'n. Moab famiɛn'n nin i nvle'n nun sran'm be kwlaa, srɛ bɔ kunnin be dan'n ti be usuli. Afin be wun kɛ Izraɛlfuɛ'm be sɔnnin kaka kpa. Moabfuɛ'm be seli Madian lɔ kpɛnngbɛn'm be kɛ: «Sran kaka nga'm be su wa saci like ng'ɔ sin yia ye'n kwlaa kɛ nannin bɔ be di aawlɛ kun nun ijre'n kwlaa'n sa.»

⁵ Famiɛn'n ɔ yili sran kɛ be `ko yia Bɛɔr i wa Balaam b'ɔ o Pɛtɔr lɔ'n kɛ ɔ bla. Pɛtɔr klɔ'n ɔ o Efrat nzue ba'n i nuan. I waan be `se i kɛ: «Nvle kun fin Ezipt lɔ bali. I nun sran'm be sɔnnin kpa, be de asiɛ wunmuan'n. Be tranwlɛ'n wo mín liɛ'n i wun koko kpa .

⁶ I sɔ'n ti, n ´srɛ wɔ kɛ a bla nan a wa bo nvle sɔ'n i sannzan man min. Yɛlɛ kɛ be wunmiɛn liɛ'n tra min nvle'n i liɛ'n. Sɛ a kplin su'n, wie nun-ɔn n ´kwla be yɛ n ´fuan be min mɛn'n nun. Afin n si kɛ sran nga a yra ɔ́ nuan a mɛn i'n, ɔ nyan muae klanman, yɛ sran nga kusu bɔ a bo i sannzan'n, nyrɛnnɛn tɔ i su.»

⁷ Kɛ Moab kpɛnngbɛn nin Madian kpɛnngbɛn'm be ´kɔ'n, be fali like kɛ be ´ko di Balaam b'ɔ ti wunnzue yifuɛ'n i nɛnnɛn. Kɛ be toli Balaam lɔ'n, be kannin Balak i nuan su ndɛ'n kleli i.

⁸ Balaam seli be kɛ: «Amun `la, ainman'n, nga Anannganman bua min'n, n ´kan kle amun.» Moab famiɛn i awlo lɔ sran dandan'm be kali Balaam wun lɛ.

⁹ Nyanmiɛn wa usali Balaam kɛ: «?Sran onin mun yɛ a sikeli be ɔ lika lɔ nin-ɔn?»

¹⁰ Balaam tɛli i su kɛ: «Zipɔr i wa Balak b'ɔ ti Moab famiɛn'n i sran mun-ɔn. Ɔ sunmannin be kɛ be wa se min kɛ:

¹¹ ‹Nian, nvle kun fin Ezipt lɔ bali. Nvle sɔ'n i nun sran'm be sɔnnin kpa, be kpanngban bɔ be ti ti'n, be de asiɛ wunmuan'n. Bla nan bo be sannzan man min. Wie nun-ɔn sɛ n wa kwla be nan n ´kan bé bo o.› »

¹² Nyanmiɛn seli Balaam kɛ: «Nán a nin be wɔ. Nán bo nvle sɔ'n i sannzan afin m'an dun mmua m'an yo i nunfuɛ'm be ye.»

¹³ Balaam jasoli nglɛmun nan ɔ'a se Balak i sran dandan ng'ɔ sunmannin be'n be kɛ: «Amun `sa amun sin amún mɛn'n nun, afin Anannganman waan ɔ kplin-man su kɛ min nin amun e wɔ.»

¹⁴ Moab famiɛn i awlo lɔ sran dandan'm be sali be sin Balak wun lɔ, be ko seli i kɛ Balaam waan ɔ nin e ba-man.

¹⁵ Balak sunmannin sran uflɛ mun ekun. Kasiɛn liɛ'n be sɔnnin tra klikli liɛ mun, yɛ be nyrun ba nyan tra be.

¹⁶ Be toli Balaam, yɛ be seli i kɛ: Zipɔr i wa Balak i nuan su ndɛ yɛ, i waan: «Nán man sran fi tannin wɔ min wun wa balɛ'n i atin.

¹⁷ Afin n wa yo man a nyan nyrun dan kpa. Like kwlaa nga ɔ waan n `yo man wɔ'n, n ´yo. Bla, n ´srɛ wɔ, bla wa bo nvle nga i sannzan man min.»

¹⁸ Balaam tɛli Balak i sran'm be su kɛ: «Kannzɛ bɔ Balak fɛ i sua bɔ jɛtɛ ufue nin sika ɔkwlɛ yi i piɛ'n man min'n, n kwla yi-man Anannganman i ndɛ ng'ɔ kannin'n i wie fi ase.

¹⁹ Sanngɛ amun `la. Ndɛ kɔnguɛ'n, n wa ti ndɛ nga Anannganman wa kɛn i ekun kle min'n.»

²⁰ Kɔnguɛ Nyanmiɛn wa seli Balaam kɛ: «Kɛ bɔ sran nga'm be bali wɔ flɛlɛ'n ti, jaso nan a nin be wɔ. Sanngɛ like nga n se wɔ kɛ a yo'n yɛ yo-ɔ.»

²¹ Nglɛmun Balaam fɛli i aflunmun'n i wun ninnge wlɛwlɛli i, yɛ fuauun yɛ ɔ nin Moab famiɛn i awlo lɔ sran dan'm be ´kɔ-ɔ.

Balaam i aflunmun'n i ndɛ

²² Kannzu kɔlɛ ng'ɔ ɔli lɛ'n ɔ'a jɔ-man Nyanmiɛn klun mlɔnmlɔn, i sɔ'n ti Anannganman i anz kun ko jrannin atin'n nun kɛ ɔ kɛtɛ i atin. Balaam ti i aflunmun'n su yɛ i sufuɛ nnyɔn be nin i yɛ be kɔ-ɔ.

²³ Aflunmun'n wunnin Anannganman i anz b'ɔ jin atin'n nun'n, tokofi o i sa nun, ɔ nun-mɛn i bua nun. Aflunmun'n yacili atin i lɛ ɔ su sin bo'n nun. Balaam boli aflunmun'n, i waan o ´yo i sɔ nan ɔ `fa atin'n su.

²⁴ Anannganman i anz'n ko jrannin vinyi fie kun nun lika fii wie nun, awa o i bue nnyɔn'n su.

²⁵ Aflunmun'n wunnin Anannganman i anz'n, yɛ aflunmun'n ɔ fɛli i wun miannin talɛ'n fii, nan talɛ'n ɔ'a mian Balaam i ja'n. Balaam boli i ekun.

²⁶ Anannganman i anz'n ɔli i nyrun ekun. Ɔ ko jrannin lika kun b'ɔ ti mianwa fii kpa'n nun, be kwla nyan-man sinwlɛ bɛ su annzɛ fama su.

²⁷ Kɛ aflunmun'n wunnin Anannganman i anz'n, ɔ tɔli asiɛ wun gblo Balaam i bo. Balaam fali ya dan kpa, ɔ fɛli i waka'n nan ɔ'a bo i.

²⁸ Yɛ Anannganman man aflunmun'n ɔ ijɔli-ɔ, ɔ seli Balaam kɛ: «?Nzu like yɛ n yoli wɔ ti yɛ man a bo min lele kpɛ nsan nin-ɔn?»

²⁹ Balaam tɛli i su kɛ: «A beli min anwlɛn ti-ɔ. Sɛ ɔ ti kɛ tokofi o mín sa nun bɔbɔ'n, wuun n kpɛli ɔ kɔmin lalaa.»

³⁰ Aflunmun'n seli i kɛ: «?Sanngɛ wuun wɔ aflunmun yɛlɛ min, a fu mín su titi, m'an yo wɔ kɛ nga sa le?» Balaam tɛli i su kɛ: «Cɛcɛ.»

³¹ Bé ja nun lɛ, Anannganman tikeli Balaam i nyinma'n nan ɔ'a wun anz b'ɔ jin atin'n i afiɛn'n nin i sa nun tokofi b'ɔ nun-mɛn i bua nun'n. Kpɛkuun ɔ tɔli asiɛ wun, ɔ utuli i nyin ase.

³² Anz'n usɛli i kɛ: «?Nguɛ ti yɛ w'a bo wɔ aflunmun'n lele kpɛ nsan sɔ nin-ɔn? Nian m buli ɔ nyrun, yɛlɛ kɛ atin nga a fa su yɛ'n ɔ ´fa wɔ kɔ mlinlɛ nun.

³³ Aflunmun'n wunnin min, yɛ ɔ ciɛli i wun min nyrun kpɛ nsan. Sɛ ɔ ti kɛ ɔ'a ciɛ-mɛn i wun'n, wuun n kunnin wɔ lalaa n yacili i lɛ.»

³⁴ Balaam seli Anannganman i anz'n kɛ: «M'an fɔn, n si-man kɛ a jin min nyrun atin'n nun. I sɔ'n ti siɛn'n, sɛ ɔ waan nán n wɔ kun'n, n ´sa mín sin n ´kɔ min awlo.»

³⁵ Anannganman i anz'n seli Balaam kɛ: «Ɔ li a nin sran sɔ mun amun `wɔ. Sanngɛ ndɛ nga n se wɔ kɛ a kan'n yɛ kan-an.» Yɛ Balaam nin Balak i awlo lɔ sran dan'm be ɔli-ɔ.

Balaam nin Balak be nun yialɛ

³⁶ Balak tili i kɛ Balaam su ba. Ɔ ɔli i atin kpalɛ lele juli Moab klɔ ng'ɔ o Arnɔn nzue ba'n i wun lɛ'n. Klɔ sɔ'n wo be mɛn'n anyialiɛ'n su.

³⁷ Balak seli Balaam kɛ: «?M'an yi-man sran kɛ be ko flɛ wɔ? ?Nzu ti yɛ w'a ba-man nin-ɔn? ?A bu i kɛ n su kwlaa yo-man nan ɔ nyrun'n ɔ ba-man nyan ti-ɔ?»

³⁸ Yɛ ɔ tɛli i su kɛ: «?Siɛn'n bɔ m'an ba'n, nguɛ ndɛ yɛ n ´kan kle wɔ-ɔ? Ndɛ nga Nyanmiɛn fa wla mín nuan'n, yɛ n ´kan kle wɔ-ɔ.»

³⁹ Balaam nin Balak be ɔli yɛ be ko juli Kirzat-Izɔt.

⁴⁰ Balak kunnin nannin mun nin bua mun, ɔ fa yili tɛ. Yɛ ɔ mannin Balaam liɛ, nan ɔ'a man i awlo lɔ sran dan nga be su i su'n be liɛ.

Balaam boli muae klanman mannin Izraɛlfuɛ mun

⁴¹ Kɛ aliɛ cɛnnin nglɛmun'n, Balak nin Balaam be fu ɔli Bamɔt Baal lɔ. Kan be o lɔ'n, bé nyin ta Izraɛlfuɛ'm be bue.