Kalɛ 21 - NYANMIƐN NDƐ'N 1998

Izraɛlfuɛ'm be kwlalɛ bɔ be fa kwlali Kanaanfuɛ mun'n

¹ Kanaan famiɛn b'ɔ tran Arad b'ɔ o mɛn i gua lɔ'n, ɔ tili i kɛ Izraɛlfuɛ'm b'a fa Atarim atin'n su be su ba. Ɔ nin be kunnin, kpɛkuun ɔ trali wie mun lomuɛn.

² Yɛ Izraɛlfuɛ'm be tali Anannganman i nda, be seli kɛ: «Sɛ a fa nvle nga nunfuɛ mun wla é sa nun nan e kwla be'n, e ´saci be klɔ mun mlɔnmlɔn, e su yaci-man like fi lɛ.»

³ Anannganman tili ndɛ nga Izraɛlfuɛ'm be kannin'n nan ɔ'a fa Kanaanfuɛ mun ɔ'a wla bé sa nun. Izraɛlfuɛ'm be nunnunnin be, yɛ be sacili be klɔ mun mlɔnmlɔn. Be flɛli lika sɔ'n kɛ Ɔrma, i bo'n yɛlɛ Sacilɛ.

Wuo bɔ be lɛ bɔyre tɛtɛ kpa'n

⁴ Izraɛlfuɛ'm be jasoli Ɔr oka'm be wun lɛ, be ɔli ndɛma jenvie'n i wun lɔ kɛ ɔ ´yo nan b'a kwla san Edɔm mɛn'n i wun'n ti. Kɛ be juli atin afiɛn'n, sran'm b'a kwla-man be anwlɛn tra kun,

⁵ yɛ be tɔli Moiz nin Nyanmiɛn bé wun ndɛ tɛtɛ kanlɛ'n su-ɔ. Be waan: «?Nzu ti yɛ amun fali e Ezipt lɔ bali wa-a? ?E kunlɛ ti yɛ amun fali e bali aawlɛ flɛnnɛn'n nun wa-a? Be nyan-man aliɛ be di-mɛn i wa, yɛ be nyan-man nzue be nɔn-mɛn i wa, yɛ nyrɛnnɛn aliɛ nga ɔ'a flan ye .»

⁶ Yɛ Anannganman sunmannin wuo bo be lɛ bɔyre tɛtɛ kpa'n kɛ be wa ka be. Be kakali Izraɛlfuɛ kpanngban kpa, yɛ sran sɔ'm be wuli.

⁷ Be nga b'a wu-man wie'n be ɔli ndɛndɛ be ko toli Moiz, be seli i kɛ: «Y'a yo tɛ, afin e kannin Anannganman nin wɔ amún wun ndɛ tɛtɛ. Kpata Anannganman man e nan ɔ fuan wuo nga mun.» Yɛ Moiz tɔli Anannganman i kpatalɛ su-ɔ, i waan: «Anannganman, si Izraɛlfuɛ'm be aunnvuɛ.»

⁸ Anannganman tɛli i su kɛ: «Fa aaba yo wuo kun nan fa sie i waka kun su. Sran kwlaa nga wuo kɛ i nan ɔ nian aaba wuo sɔ'n, ɔ ´nyan nguan.»

⁹ Moiz fali aaba yoli wuo kun. Yɛ ɔ fa sieli i waka kun su-ɔ. Sran kwlaa nga wuo kɛ i'n, nan ɔ nian aaba wuo'n, ɔ nyan nguan .

Lika nga Izraɛlfuɛ'm be sinsinnin nan b'a ju Pisga oka'n wun lɔ'n

¹⁰ Izraɛlfuɛ'm be fali atin'n be ɔli Ɔbɔt.

¹¹ Kɛ be fɛli Ɔbɔt lɛ'n, be ɔli Ize-Abarim ɔ o Moab i wia afiliɛ lɔ aawlɛ flɛnnɛn kun nun.

¹² I sin'n, be ɔli Zerɛd nzue'n i nuan lɔ.

¹³ Kɛ be fɛ i lɛ'n, be ɔli nzue ba nga be flɛ i Arnɔn bɔ i ti'n wo Amɔrfuɛ'm be mɛn'n nun lɔ'n i sin lɔ. Nzue ba sɔ'n sin aawlɛ flɛnnɛn kun nun nan ɔ'a ju Moab mɛn'n nin Amɔrfuɛ'm be mɛn'n be anyialiɛ'n su.

¹⁴ I sɔ'n ti yɛ be klɛli i Anannganman i alɛ'm be wun ndɛ fluwa'n nun-ɔn. Be klɛli kɛ: «Vaɛb lika'n wo Sifa mɛn'n nun. Arnɔn nzue ba'n,

¹⁵ ɔ nin i sama mun, be cenje nga be o Ar klɔ'n i bue'n su lɔ'n, be ti Moab mɛn'n i nuan su.»

¹⁶ Kɛ be fɛ i lɛ'n, be ɔli Beɛr. Beɛr lɛ'n, Anannganman seli Moiz kɛ: «Yia nvlefuɛ mun, n wa man be nzue.»

¹⁷ Kpɛkuun Izraɛlfuɛ'm be sroli jue ng'ɔ o yɛ'n: «Man nzue fin gbo'n nun ɔ nyrɛn fite wa, man be bo su ndɛ, be `to su jue!

¹⁸ Famiɛn i awlo lɔ sran dan mun yɛ be kpɛli gbo sɔ nin-ɔn, nvle'n nun kpɛnngbɛn'm be yɛ be fuli nzue kunman sɔ nin-ɔn. Be fali be kpɔnman nga be fa sie sran'n, ɔ nin famiɛn kpɔnman mun yɛ be fa kpɛli-ɔ.» Kɛ be fɛ i aawlɛ flɛnnɛn'n nun lɔ'n, be ɔli Matana,

¹⁹ i sin be ɔli Naaliɛl, i sin be ɔli Bamɔt.

²⁰ Kɛ be fɛli i Bamɔt lɛ'n, be juli kongo ng'ɔ o Moab mɛn'n nun lɔ Pisga oka'n su aawlɛ flɛnnɛn'n i ndɛnman lɛ nun.

Izraɛlfuɛ'm be kwlali Siɔn nin Ɔg bɔ be ti famiɛn'n

²¹ Izraɛlfuɛ'm be sunmannin sran kɛ be ko se Siɔn b'ɔ ti Amɔrfuɛ'm be famiɛn'n kɛ:

²² «E waan e ´sin ɔ mɛn'n nun. E su yaci-man atin dan'n lɛ e su sin-man amun fie'm be nun. E su nɔn-man amun gbo'm be nun nzue'n. E ´fa atin dan'n su lele e ´kpɛ amun asiɛ'n.»

²³ Siɔn ɔ'a kplin-man su kɛ Izraɛlfuɛ'm be sin i mɛn'n nun. Ɔ yiɛli i sonja mun, be ko buli Izraɛlfuɛ'm be nyrun nan be nin be ´kun alɛ aawlɛ flɛnnɛn'n nun lɔ. Be juli Zaaz yɛ be nin Izraɛlfuɛ mun be kunnin-ɔn.

²⁴ Izraɛlfuɛ'm be kwlali be, be fali be mɛn wunmuan b'ɔ fɛ i Arnɔn nzue'n su fa ju Zabɔk nzue'n su'n, lele ɔ fa ju Amɔnfuɛ'm be anyialiɛ'n su lika ng'ɔ kpɛ wia afiliɛ lɔ'n b'ɔ ti talɛ tɛɛn'n su.

²⁵ Be fali Amɔrfuɛ'm be klɔ'm be kwlaa. Be fali Ɛsbɔn klɔ'n nin klɔ nga be o i asa'n su'n, nan b'a tran be su.

²⁶ Ɛsbɔn ti Siɔn b'ɔ ti Amɔrfuɛ'm be famiɛn'n i klɔ. Siɔn nin Moab famiɛn'n be kunnin. Siɔn deli Moab famiɛn'n i mɛn'n kwlaa i sa nun lele fa juli Arnɔn nzue ba'n su lɔ.

²⁷ I sɔ'n ti yɛ jue kpɛfuɛ'm be seli kɛ: «Amun `bla Ɛsbɔn wa, man be kplan Siɔn i klɔ'n i uflɛ nan ɔ kpɛn i osu laa'n nun.

²⁸ Afin sin kun fiteli Siɔn i klɔ'n su lɔ, sin taaman kun fiteli Siɔn i klɔ'n su lɔ. Ɔ yrali Ar-Moab. Ɔ yiali be nga be sie Arnɔn oka-oka lika'n.

²⁹ Ɔo, Moab yako! W'a mlin. Kɛmɔs i sufuɛ mun, amun lɛ-man manndran kun. Moab yacili i mma'm be lɛ be yoli Siɔn b'ɔ ti Amɔr famiɛn'n i bisuafuɛ mun.

³⁰ E toli e ta mma mun bé wun. Kɛ ɔ fɛ i Ɛsbɔn lele b'ɔ ´fa ju Dibɔn'n, ninnge'n kwlaa ɔ'a saci. E sacili i kwlaa lele fa juli Nɔfak, yɛ ɔ juli Medɛba lɔ.»

³¹ Izraɛlfuɛ'm be trannin Amɔrfuɛ'm be mɛn'n nun.

³² Moiz sunmannin sran kɛ be ko kpla Zaɛzɛr klɔ'n be nian. Izraɛlfuɛ'm be fali klɔ'n nin klɔ nga be o i asa'n su mun'n. Be kannin Amɔrfuɛ'm bé bo be klɔ sɔ'm bé su.

³³ Be fali atin uflɛ, be fali Bazan atin'n. Kpɛkuun Ɔg b'ɔ ti Bazan famiɛn'n, ɔ nin i sonja'm be kwlaa be buli Izraɛlfuɛ'm be nyrun. Be waan be nin be be ´kun alɛ Edrei lɛ.

³⁴ Anannganman seli Moiz kɛ: «Nán sro i. N wa yo man a ´kwlɛ nin i alɛ kunfuɛ mun, ɔ nin i mɛn wunmuan'n bɔbɔ. Kɛ a fa yoli Amɔrfuɛ'm be famiɛn'n b'ɔ tran Ɛsbɔn'n, i sɔ yɛ a wa fa yo i-ɔ.»

³⁵ Izraɛlfuɛ'm be kwlali Ɔg nin i bo mma mun, ɔ nin i alɛ kunfuɛ'm be kwlaa. B'a yaci-man ba kun sa nun, be fɛli i mɛn'n.