Kalɛ 20 - NYANMIƐN NDƐ'N 1998

Mɛriba nzue'n i ndɛ

¹ Anglo klikli'n nun'n, Izraɛlfuɛ'm be kwlakwla be juli Zin aawlɛ flɛnnɛn'n nun, be trannin Kadɛs lɛ. Lɛ yɛ Mari wuli-ɔ, be sieli i lɛ.

² Kɛ bɔ nvlefuɛ'm be nyan-man nzue'n, be kpɛ sin yiali Moiz nin Aarɔn, nan b'a fa ndɛnngan b'a wla bé sin.

³ Be kunndɛli Moiz i utre, be seli i kɛ: «Sɛ ɔ ti kɛ kɛ Anannganman ´kun e niaan mun'n yɛ ɔ ka lɛ kunnin e kwlakwla'n, wuun man i li flunman.

⁴ ?Nzu ti yɛ amun fali e bɔ e ti Anannganman i sran mun'n bali aawlɛ flɛnnɛn nga nun wa-a? ?E nin e nnɛn mun e kunlɛ ti yɛ amun fali ye bali wa-a?

⁵ ?Nzu ti yɛ amun fali ye Ezipt lɔ bali lika tɛ kain nga nun wa-a? Be kwla lua-man like wa, be nyan-man figie wa, be nyan-man vinyi, ɔ nin grenadie wa. Be nyan-man nzue bɔbɔ be nɔn-mɛn wa.»

⁶ Moiz nin Aarɔn be cuɛnnin bé wun, be jasoli Izraɛlfuɛ'm be afiɛn lɛ be ɔli tannin sua'n nun lɔ. Be kotoli, be utuli bé nyin ase. Yɛ Anannganman i nyrun nyannyan'n fiteli be nyrun-ɔn.

⁷ Anannganman seli Moiz kɛ:

⁸ «Fa kpɔnman'n nan a nin ɔ niaan bian Aarɔn amun `yia sran'm be kwlaa. Yɛ be nyrun lɛ'n, amun `kan ndɛ kle yɛbuɛ nga nan ɔ `man amun nzue. A wa yo man nzue ´fin yɛbuɛ nga nun ´fite, kpɛkuun a ´fa man Izraɛlfuɛ'm be nin be nnɛn'm be ´nɔn.»

⁹ Kɛ Anannganman seli Moiz sa, Moiz kusu ko fali kpɔnman ng'ɔ o Anannganman i nyrun'n.

¹⁰ Moiz nin Aarɔn be yiali sran'm be kwlakwla yɛbuɛ'n i nyrun lɛ, kpɛkuun be seli be kɛ: «Amun `sie amún su, nyin keklefuɛ mun! ?E kwla yo man nzue fin yɛbuɛ nga nun ´fite man amun?»

¹¹ Moiz mɛnnin i sa'n su, ɔ fali kpɔnman'n finnin yɛbuɛ'n kpɛ nnyɔn, kpɛkuun kpu, piaa nzue fin yɛbuɛ'n nun fiteli dan kpa, nan Izraɛlfuɛ'm be nin be nnɛn mun b'a nɔn.

¹² Sanngɛ Anannganman seli Moiz nin Aarɔn be kɛ: «Amu'an lafi-man min su, amu'an yaci-man min lɛ nan m'an yi-man min wun nglo m'an kle-man Izraɛlfuɛ mun be kɛ min nzuɛn nin klɔ sran liɛ'n ti-man kun. I sɔ'n ti, nán amun yɛ amun ´fa min sran mun ´kɔ mɛn nga n ´fa man be'n nun lɔ-ɔ .»

¹³ Mɛriba nzue'n i bo'n yɛlɛ Utre, afin i blɛ sɔ'n nun yɛ Izraɛlfuɛ'm be kunndɛli Anannganman i utre, yɛ ɔ kleli be kɛ i nzuɛn nin klɔ sran liɛ'n ti-man kun nin-ɔn.

Edɔm famiɛn'n waan nán Izraɛlfuɛ'm be sin i mɛn liɛ'n nun

¹⁴ Kɛ be tɛ o Kadɛs lɛ'n, Moiz sunmannin sran kɛ be `ko se Edɔm famiɛn'n kɛ: «Tie ɔ niaan Izraɛlfuɛ'm be ndɛ nga be kan'n. A si afɛ'n kwlaa nga e fɛli'n.

¹⁵ Laa, e nannan'm be ko trannin Ezipt mɛn'n nun lɔ, e nvle'n cɛli lɔ kpa. Eziptfuɛ'm be yoli é nannan mun nin e bɔbɔ e tɛtɛ.

¹⁶ E sun flɛli Anannganman kɛ ɔ wa de ye. Ɔ tili e sunlɛ'n, yɛ ɔ sunmannin anz kun ko fali e Ezipt lɔ-ɔ. Siɛn'n, e yɛ y'a ju Kadɛs yɛ, klɔ sɔ b'ɔ nin ɔ mɛn'n mantan koko yɛ'n su.

¹⁷ Yaci, man ye atin man e sin ɔ mɛn'n nun. E su sin-man fie nin vinyi fie'm be nun. E su nɔn-man amun gbo'm be nun nzue. Atin dan'n yɛ e ´sin su-ɔ. E su sin-man bɛ su e su sin-man fama su. E ´sin atin'n su trelele e ´fa kpɛ ɔ mɛn'n.»

¹⁸ Edɔm famiɛn'n tɛli be su kɛ: «Sɛ amun klo-man kɛ e nin amun e kun alɛ'n, nán amun sin min mɛn'n nun.»

¹⁹ Izraɛlfuɛ'm be jrannin su cinnjin kpa, be waan: «Atin'n nun yɛ e ´sin-ɔn! Sɛ e bɔbɔ e waan e ´nɔn nzue'n, annzɛ sɛ nzue we kun e nnɛn mun'n, e ´to nzue amún sa nun. Nga e ´srɛ wɔ'n yɛlɛ kɛ ɔli a `man e atin man e sin ɔ mɛn'n nun.»

²⁰ Edɔm famiɛn'n tɛli be su ekun kɛ: «Atin sin-man lɛ, amun su sin-man wa.» Kpɛkuun Edɔmfuɛ'm be fali be sonja'm be wa buli Izraɛlfuɛ'm be nyrun.

²¹ B'a kplin-man su kɛ be `sin be mɛn'n nun, yɛ Izraɛlfuɛ'm be sinnin lika uflɛ-ɔ.

Aarɔn i wulɛ ndɛ

²² Izraɛlfuɛ'm be kwlakwla be tuli bé bo Kadɛs be ko juli Ɔr oka'n su.

²³ Ɔr oka'n wo Edɔm mɛn'n i anyialiɛ'n su. Anannganman seli Moiz nin Aarɔn be kɛ:

²⁴ «Aarɔn su wa wu, afin ɔ su ju-man mɛn nga n ´fa man Izraɛlfuɛ mun'n i nun, yɛlɛ kɛ amún nyin a yi-man min Mɛriba nzue ti'n su lɔ.

²⁵ I sɔ'n ti wɔ Moiz, fa Aarɔn nin i wa Eleazar nan amun wɔ Ɔr oka'n i ti su lɔ.

²⁶ Yiyi Aarɔn i wun min nyrun jranlɛ tralɛ mun nan fa be wla i wa Eleazar wun. Lika sɔ'n nun lɛ yɛ Aarɔn wa wu-ɔ.»

²⁷ Moiz fali Anannganman i nuan ndɛ'n su. Sran'm be kwlaa be nyrun lɛ be sran nsan'n be fuli oka'n su.

²⁸ Moiz yili Aarɔn i wun Nyanmiɛn nyrun jranlɛ tralɛ'n, ɔ fa wlali i wa Eleazar wun. Oka'n ti su lɛ yɛ Aarɔn wuli-ɔ. Moiz nin Eleazar be fin oka'n su lɔ be jrali.

²⁹ Sran'm be kwlakwla be wunnin kɛ Aarɔn wuli. I sɔ'n ti nan Izraɛlfuɛ'm be kwlakwla b'a sun Aarɔn lele cɛn ba ablasan.