Kalɛ 2 - NYANMIƐN NDƐ'N 1998

Akpasua'm be ngblaliɛ nun tranlɛ ndɛ

¹ Anannganman seli Moiz nin Aarɔn be kɛ:

² «Man Izraɛlfuɛ'm be yo be ngblaliɛ kunngun mun be sonja akpasua'n i flanga'n wun koko lɛ, ɔ nin be akpasua'n i nzɔliɛ'n wun lɛ. Nán man ngblaliɛ'n mantan tannin sua bɔ n yi mín wun nglo nun'n bɔ min alaka'n wo nun'n i koko dan, sanngɛ man be yo ngblaliɛ'n sin yiɛ i.

^3-8 Man Zida sonja'm be akpasua'm be ngblaliɛ liɛ'n ɔ tran wia afiliɛ lɔ. Man be tran sin yia be flanga'n. Man akpasua kunngun'm be su kpɛn kunngun'm be yɛ be yo be nga be kali be'n, bɔ be kwla di sonja'n bé su kpɛn nin-ɔn. Zida akpasua liɛ'n su'n, be fali Aminadab i wa yasua Naksɔn, ɔ sie sran akpi-akpi ableso-nin-nnan sran ya nsiɛn (74.600). Isakar akpasua liɛ'n su, be fali Ziar i wa yasua Nɛtaneɛl, ɔ sie sran akpi-akpi ablenun-nin-nnan sran ya nnan (54.400). Zabilɔn akpasua liɛ'n su'n, be fali Elɔn i wa yasua Eliab, ɔ sie sran akpi-akpi ablenun-nin-nso sran ya nnan (57.400).

⁹ Zida sonja akpasua akpasua'm be kwlaa bé sonja'm be ti akpi-akpi ya sonja akpi-akpi ablaɔcuɛ-nin-nsiɛn sonja ya nnan (186.400). Be yɛ be dun Izraɛl nvle'n i nyrun mmua-a.

^10-16 Man Ribɛn i ngblaliɛ'n i flanga'n tran ngua lɔ nan i sonja'm be `tran sin yiɛ i. Akpasua kun su'n, man i nun kpɛnngbɛn'n kun yo be nga be kali be'n bɔ be kwla di sonja'n bé su kpɛn. Ribɛn akpasua liɛ'n su'n, be fali Sɛdeir i wa yasua Elizir, ɔ sie sran akpi-akpi ablanan-nin-nsiɛn sran ya nnun. (46.500) Simeɔn akpasua'n su'n, be fali Zirisadai i wa yasua Sɛlimiɛl, ɔ sie sran akpi-akpi ablenun-nin-ngwlan sran ya nsan (59.300) Gad akpasua'n su'n, be fali Deiɛl i wa Eliazaf, ɔ sie sran akpi-akpi ablanan-nin-nnun sran ya nsiɛn sran ablenun (45.650). Kɛ be kan sonja nga be o Ribɛn i akpasua'm be su'n be bo nun'n, bé nuan'n ti sonja akpi-akpi ya sonja akpi-akpi ablenun-nin-kun sonja ya nnan sonja ablenun. (151.450) Be yɛ be su Zidafuɛ'm bé su-ɔ.

¹⁷ I sin, kɛ Levifuɛ'm be ´kɔ'n, man be fa tannin sua bɔ n yi mín wun nglo nun'n. Kɛ be ´kɔ'n, man akpasua nnyɔn dun mmua be nyrun, yɛ akpasua nnyɔn `ka bé sin, be kusu be `ka afiɛn. Kɛ be fa trantrannin be ngblaliɛ'm be nun'n, i su yɛ be `nian be wɔ-ɔ, sran kun trɛn i lika liɛ nun, be su be akpasua'n i flanga'n su.

^18-23 Man Efraim ngblaliɛ'n i flanga'n tran wia atɔliɛ lɔ, nan i sonja'm be `tran sin yiɛ i. Akpasua kun su'n, man i nun kpɛnngbɛn'n kun yo be nga be kali be'n bɔ be kwla di sonja'n bé su kpɛn. Efraim akpasua liɛ'n su'n, be fali Amiid i wa yasua Elisama, ɔ sie sran akpi-akpi ablanan sran ya nnun (40.500). Manase akpasua liɛ'n su'n, be fali Pɛdazir i wa yasua Gamliɛl, ɔ sie sran akpi-akpi ablasan-nin-nnyɔn sran ya nnyɔn (32.200). Bɛnzamɛn akpasua liɛ'n su'n, be fali Gidɛɔni i wa yasua Abidan, ɔ sie sran akpi-akpi ablasan-nin-nnun sran ya nnan (35.400).

²⁴ Kɛ be kan be kwlaa be bo nun'n, be ti sran akpi-akpi ya sran akpi mɔcuɛ sran ya. (108.100) Kɛ be ´nanti'n, be yɛ be tran sonja akpasua'm be nsan su-ɔ, be su Levifuɛ'm bé su.

^25-30 Man Dan ngblaliɛ'n i flanga'n, ɔ tran nglo lɔ, man i sonja'm be tran sin yiɛ i. Akpasua kun su'n, man i nun kpɛnngbɛn'n kun `yo be nga be kali be'n bɔ be kwla di sonja'n bé su kpɛn. Dan akpasua liɛ'n su'n, be fali Amisadai i wa yasua Aiezɛr, ɔ sie sran akpi-akpi ablesiɛn-nin-nnyɔn sran ya nso (62.700). Azɛr i akpasua liɛ'n su'n, be fali Ɔkran i wa yasua Pagiɛl, ɔ sie sran akpi-akpi ablenun-nin-nsan sran ya nnun (53.500). Nɛftali akpasua liɛ'n su'n, be fali Enan i wa yasua Aira, ɔ sie sran akpi-akpi ablenun-nin-nsan sran ya nnan (53.400).

³¹ Kɛ be kan sonja nga be o Dan i akpasua'n su'm be bo nun'n, be ti sonja akpi-akpi ya sonja akpi ablenun-nin-nso sonja ya nsiɛn. (157.600) Be yɛ be cuɛn be kwlaa bé bo-ɔ. Be kwlaa be fali atin'n, kɛ be ´kɔ'n, be flanga'n wo be afiɛn.»

³² Izraɛlfuɛ'm be kwlaa nga be kali be akpasua'm be su'n, ɔ nin be sonja akpasua akpasua'm be nun'n, kɛ be kan be kwlaa be bo nun'n, bé nuan'n ti sran akpi-akpi ya nsiɛn sran akpi nsan sran ya nnun sran ablenun (603.550).

³³ Kɛ Anannganman fa kan kleli Moiz'n i su yɛ be niannin be yoli-ɔ. I sɔ'n ti, blɛ bɔ be ´ka Izraɛlfuɛ'm bé onga mun'n, b'a ka-man Levifuɛ'm be wie.

³⁴ Anannganman i nuan su ndɛ ng'ɔ kan kleli Moiz'n i su yɛ Izraɛlfuɛ'm be niannin be yoli i sɛsɛsɛ-ɔ. Ɔ man be yoli be ngblaliɛ'm be flanga'm bé wun lɛ, yɛ kɛ be ´kɔ'n, be kɔ nyanman su kɛ be seli be kɛ be yo'n sa, kpɛkuun kɛ be awlobo nin be afiliɛ be fa ti'n yɛ be fa kɔ-ɔ.