Kalɛ 19 - NYANMIƐN NDƐ'N 1998

Nannin ɔkwlɛ'n i nzuɛn

¹ Anannganman seli Moiz nin Aarɔn be kɛ: «Ndɛ kun yɛ min Anannganman n su kɛn i yɛ:

² amun `kan kle Izraɛlfuɛ'm be kɛ be `kunndɛ nannin bla ɔkwlɛ bɔ lɛ fi nun-mɛn i wun b'ɔ nian sua-man kɔmin su waka le'n,

³ amun `fa wla min nyrun jranfuɛ Eleazar sa nun. Man i kusu ɔ fɛ i wɔ ngblaliɛ'n i sin lɔ nan be `kpɛ i kɔmin i nyrun lɛ.

⁴ Man min nyrun jranfuɛ Eleazar fɛ i sama kun `fa nannin'n i mmoja'n kan, nan ɔ `fa kpɛntɛn-kpɛntɛn tannin sua'n i nyrun lika'n i ndɛnman.

⁵ Man be yra nannin'n i nyrun lɛ. Man be yrɛ i kplo'n nin i nnɛn ba'n, nin i mmoja'n, ɔ nin i wakasu'n.

⁶ Man min nyrun jranfuɛ'n fa sɛdri waka nin izɔp waka, ɔ nin bua ndrɛ tannin kun b'ɔ ti ɔkwlɛ youun, ɔ `fa be gua sin'n i afiɛn nannin bla'n su.

⁷ Man min nyrun jranfuɛ'n ɔ kpu i wun ninnge mun, yɛ man i bɔbɔ wunmuan kpa'n ɔ fa nzue `wunnzin. I sin, man ɔ sɛ i sin ngblaliɛ'n nun lɔ. Sanngɛ ɔ o fiɛn nun lele nnɔsua.

⁸ Man sran ng'ɔ yrali nannin'n ɔ kpu i wun ninnge'm be wie, yɛ ɔ `wunnzin. I kusu ɔ o fiɛn nun lele nnɔsua.

⁹ Man sran ng'ɔ ti-man fiɛn'n wie'n, ɔ isa nannin'n i nzuɛn'n guɛ i lika b'ɔ ti min liɛ klonglo'n kun nun ngblaliɛ'n sin lɔ. Be `sie nzuɛn sɔ'n lɛ, ɔ ti Izraɛlfuɛ'm be kwlaa be liɛ, be fa gua nzue bɔ be fa kplo bé wun fiɛn'n i nun. I sɔ nzue'n ti kɛ tɛ bɔ be yi be fa kpata min'n sa.

¹⁰ Sran ng'ɔ isa nannin'n i nzuɛn'n, man ɔ kpu i wun ninnge'm be wie, ɔ o fiɛn nun lele nnɔsua. Man Izraɛlfuɛ'm be nin aofuɛ nga be tran be afiɛn'm be di mmla sɔ'n su titi.»

Bé wun fiɛn kplolɛ'n i su mmla'n

¹¹ «Sran kwlaa ng'ɔ kan fuɛn'n, ɔ ´yo fiɛn lele cɛn ba nso.

¹² Man ɔ fa nzue sɔ'n wie fa kplo i wun fiɛn'n cɛn ba nsan'n su nin cɛn ba nso'n su, yɛ ɔ ´yo saun-ɔn. Sɛ ɔ'a kplo-mɛn i wun fiɛn'n cɛn ba nsan'n su'n nin cɛn ba nso'n su'n, ɔ su yo-man saun.

¹³ Sran ng'ɔ kan fuɛn nan i waan ɔ wunnzin-man'n, ɔ yo min tranwlɛ'n i fiɛn. Be `kɛn i sɔ sran'n i bo Izraɛlfuɛ'm be afiɛn. Afin kɛ b'a fa-man nzue ng'ɔ tu fiɛn'n wie b'a guɛ-mɛn i su'n ti ɔ tɛ o fiɛn nun.

¹⁴ Mmla uflɛ wie mun ekun yɛ: sɛ sran kun wu i tannin sua'n nun'n, sran kwlaa ng'ɔ wlu i sin lɔ'n, wuun ɔ'a yo fiɛn, ɔ ´ka sɔ lele cɛn ba nso.

¹⁵ Like kwlaa nga be tikeli su bɔ i su tre'n nun-man su'n, ɔ ´yo fiɛn wie.

¹⁶ Sran kwlaa ng'ɔ kɔ blo b'ɔ ko kan sran wie bɔ be kunnin i'n annzɛ sran wie b'ɔ wuli i sa su'n, annzɛ b'ɔ kan sran owie'n annzɛ asieliɛ'n, sran sɔ'n ɔ ´yo fiɛn lele cɛn ba nso.

¹⁷ Sɛ be waan be ´tu sran ng'ɔ yoli fiɛn'n i wun fiɛn'n, man be fa nannin nga be fa yili tɛ'n i nzuɛn'n wie be gua kpongbo kun nun, nan be `fa nzue ng'ɔ fin nzue ti kun nun'n wie be `gua su.

¹⁸ Sɛ sran yɛ ɔ wuli'n, man sran saun kun fa waka nga be flɛ i izɔp'n i sama kun fa wla nzue'n nun, nan ɔ `fa kpɛntɛn-kpɛntɛn tannin sua nga sran'n wuli nun'n i su. Man ɔ fa nzue sɔ'n wie kpɛntɛn-kpɛntɛn tannin sua sɔ'n i nun ninnge'm be kwlaa nin sran nga be o nun lɛ'm bé su. Sran ng'ɔ kannin sran owie'n annzɛ fuɛn annzɛ asieliɛ'n, man sran ng'ɔ ti saun sɔ'n ɔ fa kpɛntɛn-kpɛntɛn i wun nan ɔ tu i wun fiɛn'n wie.

¹⁹ Man sran b'ɔ ti saun'n ɔ tu sran ng'ɔ ti fiɛn'n i wun fiɛn'n, cɛn ba nsan'n su nin cɛn ba nso'n su. I sin, man sran ng'ɔ ti fiɛn'n ɔ kpu i tralɛ mun nan ɔ `wunnzin, kpɛkuun nnɔsua ɔ'a yo saun.

²⁰ Sran ng'ɔ yo fiɛn nan ɔ'a yo-mɛn i wun saun'n, be `kɛn i bo min sran'm be afiɛn. Afin ɔ sacili min sua'n. Kɛ bɔ nzue bɔ be fa kplo fiɛn'n ɔ'a kɛn-mɛn i kplo'n ti, ɔ tɛ o i fiɛn'n nun.

²¹ Man Izraɛlfuɛ'm be di mmla nga su tititi. Sran ng'ɔ fa fiɛn kplolɛ nzue fa kplo sran ng'ɔ o fiɛn nun'n i fiɛn'n, man i bɔbɔ kusu ɔ kpu i wun ninnge mun. Sran ng'ɔ kan nzue nga be fa tu fiɛn'n, ɔ ´yo fiɛn lele fa ju nnɔsua.

²² Like kwlaa nga bɔ sran ng'ɔ ti fiɛn'n kɛn i'n, like sɔ'n ɔ ´yo fiɛn. Sran ng'ɔ ko kɛn i sɔ like liɛ'n, ɔ ´yo fiɛn lele fa ju nnɔsua.»