Kalɛ 17 - NYANMIƐN NDƐ'N 1998

Kɔre i minniɛn'm be sɛnmlɛn guawlɛ ninnge'm be ndɛ

¹ Anannganman seli Moiz kɛ:

² «Se min nyrun jranfuɛ Aarɔn i wa Eleazar kɛ ɔ `yiyi sɛnmlɛn guawlɛ ninnge bɔ be o sin'n i afiɛn'n nan ɔ `sanndi sɛnmlɛn ng'ɔ o be nun'n guɛ i mmua lɔ. Afin sɛnmlɛn guawlɛ ninnge'm bé ti min liɛ klonglo.

³ Yɛlɛ kɛ be fa be mannin min, kannzɛ bɔ be ti sran nga be yoli sa tɛ bɔ be wuli'n be liɛ'n, man be fa yo like paplaapla mun, bɔ be ´fa kata min sɔwlɛ'n i wun, kpɛkuun i sɔ'n ɔ ´yo Izraɛlfuɛ'm be wla kpɛnlɛ like.»

⁴ Sɛnmlɛn guawlɛ ninnge bɔ be fali aaba yɛ be yoli'n, bɔ be nga sin yrali be'n be fa bali Anannganman i manlɛ'n, Nyanmiɛn i nyrun jranfuɛ Eleazar fa yoli like paplaapla mun bɔ be ´fa kata Nyanmiɛn sɔwlɛ'n i wun'n.

⁵ I sɔ'n, ɔ ´kpɛn Izraɛlfuɛ'm bé wla kɛ sran ng'ɔ ti-man Aarɔn i osu'n nun sran'n, ɔ lɛ-man atin kɛ ɔ yra ansans Anannganman i nyrun. Sran nga bɔ ɔ'a di-man su nan ɔ ko yo i sɔ sa'n, sa kunngba ng'ɔ juli Kɔre nin i minniɛn'm bé su'n, ɔ ´ju i su wie kɛ Anannganman man Moiz kan kleli Aarɔn'n sa.

Nvlefuɛ'm be kannin Moiz nin Aarɔn bé wun ndɛ tɛtɛ

⁶ Kɛ aliɛ'n cɛnnin cɛ'n, yɛ sran'm be kwlaa be tɔli Moiz nin Aarɔn be ndɛ tɛtɛ kanlɛ su-ɔ. Be kan se kɛ: «Amu'an kun Anannganman i sran mun.»

⁷ Izraɛlfuɛ'm be wa kpɛ sin yiali Moiz nin Aarɔn nan b'a fa ndɛnngan b'a wla bé sin. Kpɛkuun be ´nian tannin sua'n wun lɔ-ɔ, sin wɛnsrɛn'n ɔ'a kata su, kpɛkuun nyannyannyan Anannganman su yi i wun nglo.

⁸ Moiz nin Aarɔn be ɔli ko jrannin tannin sua'n i nyrun lɛ.

⁹ Anannganman seli Moiz kɛ:

¹⁰ «Amun `jaso sran nga'm be afiɛn man n nunnun be kpɛ kunngba.» Moiz nin Aarɔn be tɔli yɛ be utuli be nyin ase.

¹¹ Moiz seli Aarɔn kɛ: «Ko fa sɛnmlɛn guawlɛ'n nan fa sin Nyanmiɛn sɔwlɛ'n su lɔ nan gua nun sɛnmlɛn, kpɛkuun fa ansans sie su, nan kɔ sran'm bé wun lɔ trɛlɛlɛ ko yo like nga be yo bɔ Nyanmiɛn yaci bé wun sa tɛ'n cɛ be'n. Afin Anannganman i ya'n ɔ'a jaso, yɛ nyrɛnnɛn'n ɔ'a bo i bo.»

¹² Aarɔn fali sɛnmlɛn guawlɛ'n kɛ Moiz seli i'n sa, yɛ ɔ wanndi ɔli sran'm be afiɛn lɔ-ɔ. Ɔ ´ju lɔ o, sakpa nyrɛnnɛn'n ɔ'a bo i bo nvlefuɛ'm be afiɛn. Ɔ yili ansans sraka'n, yɛ ɔ yoli like ng'ɔ fata kɛ ɔ yo'n nan Nyanmiɛn ɔ'a yaci bé wun sa tɛ'n ɔ'a cɛ be'n.

¹³ Ɔ jrannin be nga be wuli'n nin be nga be nyin tɛ o su'n be afiɛn. Kpɛkuun kpe yɛ nyrɛnnɛn'n kpɛli-ɔ.

¹⁴ Be nga be wuli'n, sɛ b'a fa-man be nga be wuli Kɔre i nyin kekle yolɛ blɛ nun'n b'a wla-man nun'n, be ti sran akpi-akpi blu-nin-nnan sran ya nso. Be kwlaa sɔ'm be wuli.

¹⁵ Nyrɛnnɛn'n ɔ jrannin, yɛ Aarɔn sɛli i sin ɔli Moiz wun lɔ tannin sua'n nyrun lɔ-ɔ.

Aarɔn i kpɔnman'n

¹⁶ Anannganman seli Moiz kɛ:

¹⁷ «Se Izraɛlfuɛ mun man akpasua su kpɛnngbɛn'm be man ɔ kpɔnman kunngun be tinun tinun. Kpɔnman'n kwlaa ɔ ´yo blu-nin-nnyɔn, klɛ akpasua kun dunman i kpɔnman liɛ'n su.

¹⁸ Levi akpasua'n i kpɔnman liɛ'n, Aarɔn i dunman yɛ fa klɛ su-ɔ. Akpasua su kpɛn kun i kpɔnman kun.

¹⁹ Fa kpɔnman sɔ mun sie be kan n yi mín wun nglo n kle amun lɛ'n. Sie be min alaka bɔ mmla blu'n wo nun'n i nyrun lɛ tannin sua'n nun lɔ.

²⁰ Sran nga n ´fɛ i'n, yɛlɛ sran nga i kpɔnman liɛ'n ɔ fɛfɛ'n. Kɛ ɔ ko yo sɔ'n, i liɛ'n, ijɔlɛ tɛtɛ nga Izraɛlfuɛ'm be ijɔ amun'n, ɔ ´wie.»

²¹ Moiz kannin ndɛ sɔ'n kleli Izraɛlfuɛ mun. Yɛ akpasua'm bé su kpɛn'm be fali be tinun kpɔnman kunngun be mɛnnin i-ɔ. Kpɔnman'n kwlaa ng'ɔ nyɛnnin i'n ti blu-nin-nnyɔn. Aarɔn liɛ'n wo nun wie.

²² Moiz fali be sieli tannin sua'n nun lɔ Anannganman i alaka'n i nyrun lɛ.

²³ Kɛ aliɛ'n cɛnnin bɔ Moiz fɛ i wa ´kɔ tannin sua'n nun lɔ'n, ɔ ´nian-an, Aarɔn b'ɔ ti Levi i akpasua sufuɛ'n i kpɔnman'n ɔ'a fɛfɛ ɔ'a bo nyrɛ yɛ ɔ'a su mma bɔbɔ.

²⁴ Moiz fali kpɔnman'm be kwlaa nan ɔ'a fa be ɔ'a kle Izraɛlfuɛ mun. Sran'm be kwlaa be wunnin be. Yɛ akpasua su kpɛn'm be fafali be kpɔnman mun kunngunngun-ɔn.

²⁵ Anannganman seli Moiz ekun kɛ: «Fa Aarɔn i kpɔnman liɛ'n sa ɔ́ sin, fa ko sie i min alaka'n i wun lɔ. Man be fa sie i lɛ nan kɛ Izraɛlfuɛ'm be wun i'n, bé wla kpɛn su kɛ bé nyin ti kekle. Kɛ a ko yo i sɔ'n, kpɛkuun be ijɔlɛ tɛtɛ nga be ijɔ mín'n ɔ ´wie, yɛ be su wu-man kun.»

²⁶ Moiz niannin nga Anannganman seli i kɛ ɔ `yo'n su yoli i sekeseke kpan.

Nyanmiɛn nyrun jranfuɛ'm be nin Levifuɛ'm be junman mun

²⁷ Izraɛlfuɛ'm be seli Moiz kɛ: «?A wun-man kɛ e su wa wie wu nan e kwlaa e su wa nunnun'n?

²⁸ Sran kwlaa ng'ɔ mantan sua nga Anannganman yi i wun nglo nun, ɔ wu. ?Nan kɛ awieliɛ'n wa wie e ngba kɛ nga sa?»