Kalɛ 16 - NYANMIƐN NDƐ'N 1998

Kɔre i nyin kekle yolɛ

¹ Zizear i wa Kɔre b'ɔ ti Levifuɛ, b'ɔ fin Keat akpasua'n su'n, ɔ suli Datan nin Abiram bɔ be ti Eliab i wa'n, ɔ nin Pelɛt i wa Ɔn bé bo kɛ be `jaso Moiz wun . Be nsan sɔ'm be fin Ribɛn akpasua'n su.

² Izraɛlfuɛ'm be nun sran ya nnyɔn sran ablenun bɔ be ti sran kaklaakla nin awlobo kpɛnngbɛn, bɔ be flɛ be be anyia'm bé bo'n, be jrannin bé sin.

³ Be wa kpɛ sin yiali Moiz nin Aarɔn yɛ be seli be kɛ: «Amun liɛ'n ɔ'a flan ye ngboko, sran nga be ti Izraɛlfuɛ'n be kwlaa be ti Anannganman liɛ klonglo, yɛ Anannganman o e kwlaa e afiɛn. ?Yɛ wuun ɔ yo sɛ ti yɛ amun bu amún wun kɛ amun kpa tra Anannganman i sran'm be kwlaa nin-ɔn?»

⁴ Kɛ Moiz tili ndɛ tɛtɛ sɔ mun'n, ɔ tɔli asiɛ wun, ɔ utuli i nyin ase

⁵ nan ɔ'a se Kɔre nin be nga be su i su'n be kɛ: «Ainman nglɛmun'n, Anannganman wa kle sran ng'ɔ ti i liɛ klonglo b'ɔ fata kɛ ɔ mɛntɛn i'n. Ɔ wa yo man sran nga i bɔbɔ kpɛli i'n, sran sɔ'n ɔ wa mɛntɛn i .

⁶ I sɔ'n ti, Kɔre a nin ɔ su sufuɛ mun, amun `yo like nga: amun `fa sɛnmlɛn guawlɛ ninnge mun,

⁷ nan ainman amun `gua be nun sɛnmlɛn, yɛ amun `fa ansans be `gua be su nan amun `fa be `sie Anannganman nyrun. Kpɛkuun e wa wun sran nga Anannganman kpɛli i'n. I yɛ ɔ ti i liɛ klonglo nin-ɔn. Amun Levifuɛ mun amun liɛ'n, ɔ'a flan min ngboko siɛn'n.»

⁸ I sin Moiz seli Kɔre kɛ: «Amun Levifuɛ mun, amun `tie:

⁹ ?Kɛ amun yɛ Anannganman Nyanmiɛn kpali amun Izraɛlfuɛ'm be nun kɛ amun `mɛntɛn i nan amun `niɛn i sɔwlɛ sua'n i lika'n, nan amun `jran i bɔbɔ Nyanmiɛn i nyrun sran'm be kwlaa bé nuan'n, ɔ ju-man amun?

¹⁰ Wɔ Kɔre, a nin ɔ niaan Levifuɛ'm be kwlaa, Anannganman fali amun kɛ amun mɛntɛn i, kpɛkuun amun waan amun ´yo i nyrun jranfuɛ.

¹¹ Sa nga ti yɛ a nin ɔ minniɛn mun amun cicili Anannganman wun'n yɛ ɔ o lɛ-ɔ. ?Afin waan yɛlɛ Aarɔn bɔ amun kɛn i ndɛ tɛtɛ nin-ɔn?»

¹² Moiz yili sran kɛ be ko flɛ Datan nin Eliab i wa Abiram kɛ be bla. Sanngɛ be seli sran'n kɛ ɔ ko se Moiz kɛ: «E kɔ-man lika fi.

¹³ A fa e jasoli mɛn kun bɔ i asiɛ'n ɔ yo like ye kpa, bɔ i kunngba'n ɔ ti nnɛn tawlɛ klanman'n i nun. A fali e bali kɛ e wa wu aawlɛ flɛnnɛn nga nun wa. Ɔ nyin a yi-mɛn i sɔ liɛ bɔ a yoli'n, kpɛkuun ɔ waan a ´tran é su kpɛnngbɛn a ´uka su ekun.

¹⁴ Nanwlɛ, a fa-man ye a ba-man lika bɔ be yo like nun-ɔn ɔ yo ye'n nun, a man-man e fie nin vinyi. ?A bu i kɛ wuun e ti anyansifuɛ mun ti-ɔ? E kɔ-man lika fi.»

¹⁵ Wafa nga be fa tɛli Moiz su'n ti, ɔ fali ya dan kpa. Yɛ ɔ seli Anannganman kɛ: «Nán sɔ be cɛlɛ like'n nun. N nian de-man be like fi le, nnɛn kpanngɔ kun bɔ sa n nian de-man be le, n nian yo-man be nun kun sa i tɛ le.»

Kɔre nin i su sufuɛ'm be fɔ tulɛ

¹⁶ Moiz seli Kɔre kɛ: «A nin ɔ sran mun, ainman amun bla min nyrun. Aarɔn `bla wie.

¹⁷ Amun `fa amun sɛnmlɛn guawlɛ mun, amun `gua be nun ansans nan sran kun fɛ i liɛ'n blɛ Anannganman. Ɔ su sufuɛ sran ya nnyɔn sran ablenun'm be `fa be liɛ kunngun'n be bla. Aarɔn nin wɔ kusu an `fa amun liɛ mun blɛ Anannganman wie.»

¹⁸ Kɔre nin i su sufuɛ'm be niannin su be yoli: be fali be sɛnmlɛn guawlɛ kunngun mun sɛsɛsɛ, be guaguali be nun sɛnmlɛn sɛsɛsɛ, be fali ansans sieli su, yɛ be nin Moiz nin Aarɔn be wa jranjrannin tannin sua'n i anuan'n nun lɛ-ɔ.

¹⁹ Kɔre yiali Izraɛlfuɛ'm be kwlaa, be wa jranjrannin be nyrun ndɛnman su lɛ tannin sua'n i anuan'n wun lɛ. Kpɛkuun sran'm be kwlaa be nyrun lɛ'n, Anannganman yili i nyrun nyannyan'n i nglo.

²⁰ Anannganman seli Moiz nin Aarɔn be kɛ:

²¹ «Amun `jaso sran sɔ'm be nun lɛ, afin n wa saci be kpɛ kunngba.»

²² Moiz nin Aarɔn be tɔli asiɛ wun, bé utuli be nyin ase, yɛ be sun flɛli Anannganman kɛ: «?Ee Nyanmiɛn, wɔ bɔ a mannin ninnge nga a yili be'm be nguan'n, sran kunngba b'ɔ yoli sa tɛ'n, i ti a ´fa ya sran'm be kwlakwla bé wun?»

²³ Anannganman tɛli Moiz su kɛ:

²⁴ «Se Izraɛlfuɛ'm be kɛ be cuɛn bé wun be wɔ lika nga Kɔre nin Datan nin Abiram be tran lɛ'n i wun mmua.»

²⁵ Moiz jasoli, ɔ ɔli Datan nin Abiram be wun lɔ. Kɛ ɔ ´kɔ'n, Izraɛl nvle'n nun kpɛnngbɛn'm be suli i su.

²⁶ Ɔ seli nvlefuɛ'm be kɛ: «Amun `jaso sa tɛ yofuɛ nga'm bé tannin sua'm bé wun lɛ. Nán amun kan bé sa nun like fi, afin sɛ amun kan be'n, amun nin be be ´wu bé sa tɛ'm bé ti.»

²⁷ Yɛ nvlefuɛ'm be jasoli kan Kɔre, nin Datan, ɔ nin Abiram be tran lɛ nin-ɔn. Datan nin Abiram, be nin bé yi mun nin be mma mun, ɔ nin be osufuɛ mun, be fiteli be wa trantrannin bé tannin sua'm be nyrun lɛ.

²⁸ Moiz seli kɛ: «Amun wa wun kɛ Anannganman yɛ ɔ sunmannin min sakpa kɛ n wa yo sa'n kwlaa nga n yo be lɛ mun-ɔn, nan nán m bɔbɔ min fanngan nun yɛ n yo be-ɔ.

²⁹ Sɛ sran nga be o yɛ'n be wu kɛ sran'm be kwlaa be fa wu'n sa'n, wuun nán Anannganman yɛ ɔ sunmannin min-ɔn.

³⁰ Sanngɛ sɛ Anannganman yo sa kekle kun nan asiɛ'n kpaci nan ɔ mɛn be nin be osufuɛ mun'n mɔnnɛn-mɔnnɛn sa'n nan be kɔ blɔlɔ, amun wa si kɛ sran sɔ'm be yoli Anannganman i finfin.»

³¹ Kɛ Moiz nuan'n tɔli cɛ'n, kpɛkuun kplalala asiɛ'n nun ɔ'a kpaci Datan nin Abiram bé bo.

³² Kɛ asiɛ'n kpacili'n, ɔ mɛnnin be nin be osufuɛ mun, yɛ Kɔre nin i minniɛn liɛ mun, ɔ nin bé bo ninnge'n kwlaa.

³³ B'a wu-man nan b'a jra blɔlɔ lɔ, be nin bé sa nun ninnge mun, asiɛ'n katali bé su kplu, kpɛkuun be kali lɛ be mlinnin kpɛ kunngba Izraɛlfuɛ'm be afiɛn.

³⁴ Izraɛlfuɛ nga be mantan koko lɛ'n be kwlaa be wanndili srɛ b'ɔ kunnin be'n ti, afin be bu i kɛ wuun asiɛ'n wa mɛn be wie.

³⁵ Kpɛkuun Anannganman yoli man sin taaman kun fin i wun lɔ wa jrali sran ya nnyɔn sran ablenun bɔ be su fa ansans be ´mɛn i'n be su nan ɔ'a yra be sekeseke kpan.