Kalɛ 15 - NYANMIƐN NDƐ'N 1998

Ble sanmlɛn mlɛnnɛnnɛn kpa'n nin ngo, ɔ nin nzan nga be fa yi sraka'n

¹ Anannganman seli Moiz kɛ ɔ kan ndɛ yɛ mun kle Izraɛlfuɛ mun.

² I waan: «Blɛ bɔ amun ko ju mɛn nga bɔ n wa fa man amun'n nun lɔ'n, bɔ amun ko tran nun'n,

³ amun `yi tɛ bɔ be yra be nnɛn'n kɔlikɔli'n, annzɛ bo kun yolɛ'n i su tɛ mun be man min. Man tɛ sɔ'm be yo kɛ sran wie tali min nda wie yɛ ɔ su yi i su tɛ-ɔ, annzɛ man be yo amun klun klo tɛ, annzɛ amun cɛn dilɛ wie su tɛ. Man i sɔ tɛ liɛ nga amun ´yi be man min'n be yo nannin, annzɛ bua, annzɛ boli, ɔ bɔn min bue nun fannin.

⁴ Sran ng'ɔ ´fa nnɛn'n blɛ min'n, ɔ `sie su ble sanmlɛn mlɛnnɛnnɛn kpa'n i sɔ kilo nsan annzɛ like ng'ɔ ti kɛ ble sa'n bɔ be fa yi sraka'n, ɔ `fa ngo litri kun nin sin fa fɔtɔ ble'n.

⁵ Yɛ be `fa nzan litri kun nin sin be `fa sie i bua nga ɔ'a kpɛ cro b'ɔ ti tɛ nga be yrɛ i nnɛn'n kɔlikɔli'n annzɛ b'ɔ ti bo kun yolɛ i su tɛ'n su.

⁶ Sɛ kusu bua nene kun yɛ be ´fa blɛ min'n, man be sunnzun ble sanmlɛn mlɛnnɛnnɛn kpa kilo nsiɛn, be `fɔtɔ i nin ngo litri nnyɔn, nan be ´fa `sie su.

⁷ Kpɛkuun be `sie su nzan litri nnyɔn. Ɔ bɔn min bue nun fannin.

⁸ Sɛ nannin yɛ be ´fa yi tɛ man min'n, sɛ tɛ nga be yrɛ i nnɛn'n kɔlikɔli'n nin o, sɛ bo kun yolɛ i su tɛ nin o, sɛ nda wie yɛ be tali min i su tɛ nin o, tɛ kwlaa nga be yi'n,

⁹ man be fa ble sanmlɛn mlɛnnɛnnɛn kpa kilo ngwlan bɔ be fali ngo litri nsan yɛ be fɔtɔli'n, be `fa sie su,

¹⁰ kpɛkuun, man be uka su nzan litri nsan. Kɛ be yrɛ i'n, ɔ bɔn min bue nun fannin.

¹¹ Blɛ kwlaa nga bɔ sɛ be ´fa nannin o, sɛ bua nene o, sɛ bua bɔ ɔ'a kpɛ cro o, annzɛ boli bɔ ɔ'a kpɛ cro o, be ´fa yi tɛ be ´man min'n, kɛ be `yo i sɔ-ɔ.

¹² Sɛ nnɛn nga amun ´kun be be ´fa man min'n be ti nnyɛ o, sɛ be ti nnyɛ o, man be fa cɛlɛ ninnge'm be sie bé su kunngunngun kɛ ng'ɔ o lɛ'n sa.

¹³ Man Izraɛlfuɛ'm be kwlaa be di i sɔ mmla'n su blɛ bɔ be ´yi tɛ ng'ɔ bɔn min bue nun fanninfannin'n be `man min'n.

¹⁴ Sɛ ɔ wie aofuɛ wie b'ɔ tran amun afiɛn lɛ titi o, sɛ kusu ɔ ´tran lɛ kan nan ɔ ´kɔ o, sɛ i waan ɔ ´yi tɛ nga be yrɛ i nnɛn'n kɔlikɔli b'ɔ bɔn min bue nun fannin'n, man ɔ fa mmla sɔ'n su wie.

¹⁵ Mmla kunngba nga Izraɛlfuɛ'm be kwlaa be di su'n, yɛ aofuɛ'm be kusu be `di su-ɔ. M bɔbɔ min Anannganman n kpa-man sran'm be nun. Wafa nga n fa bu Izraɛlfuɛ mun'n yɛ n fa bu aofuɛ mun-ɔn.

¹⁶ Mmla nga amun `di su'n, i kunngba'n yɛ be di su wie-ɔ.»

Kpaun nga be fa yi sraka'n

¹⁷ Anannganman seli Moiz kɛ ɔ `kan ndɛ yɛ mun kle Izraɛlfuɛ mun.

¹⁸ I waan: «Sɛ amun ju mɛn nga n ´fa amun kɔ lɔ'n i nun lɔ'n,

¹⁹ sɛ amun ´di mɛn sɔ'n nun lɔ kpaun'n, amun `fɛ i bue man min.

²⁰ Amun ble sanmlɛn mlɛnnɛnnɛn kpa bɔ amun fɔtɔ be fa tɔn gato'n, i gato klikli'n, amun `fa yi sraka be man min. Ɔ ti kɛ ble mma klikli nga be fa yi sraka man min'n sa.

²¹ Amun `fa gato klikli nga an dun mmua kɛɛn'n fa man min. Ba nga be wa wu be'n, be ´di i sɔ mmla'n su wie.»

Sanvuɛsa'n i ti tɛ

^22-23 «Mmla nga n fa mannin Moiz kɛ amun `di su'n, ɔ ti amun nin amun mma mun, ɔ nin amun anunman'm be liɛ. Sɛ kɛ ɔ fin i bo bolɛ nun nin o, sɛ kusu blɛ ng'ɔ ´ba lɔ nun nin o, sɛ sa wie fa amun ase nan amun fɔn mmla sɔ'n i wie nun likawlɛ'n,

²⁴ sɛ nán amun nyinfu yɛ amun yoli sa sɔ'n, amun kwlaa amún bo `yo kun, amun `man min nannin tola kun, amun `fa yi tɛ nga be yrɛ i nnɛn'n kɔlikɔli'n b'ɔ bɔn min bue nun fannin'n.

²⁵ Man min nyrun jranfuɛ'n ɔ yo like ng'ɔ fata kɛ ɔ yo nan m'an yaci Izraɛlfuɛ nga be yiali'n be kwlaa bé sa m'an cɛ be'n, kpɛkuun n ´yaci bé wun sa'n n ´cɛ be, afin sanvuɛsa-a, yɛ kusu b'a yi i ti tɛ nga be yrɛ i nnɛn'n kɔlikɔli'n nin n kpatalɛ tɛ'n.

²⁶ N ´yaci sran'm be kwlaa bé wun sa'n n ´cɛ be, i aofuɛ o, i ɔnvuɛ o, afin sran'm be kwlaa bé ti su ndɛ-ɔ.

²⁷ Sɛ sran kunngba yɛ sanvuɛsa'n nyɛnnin i yɛ ɔ yoli sa tɛ'n, ɔ `man boli bla kaan kun bɔ ɔ'a di afuɛ kun'n, ɔ `fa kpata min.

²⁸ Man min nyrun jranfuɛ'n yo sran ng'ɔ yoli sa tɛ'n i su nzɔliɛ b'ɔ kle kɛ b'a yaci i wun sa b'a cɛ i'n, man ɔ yo nzɔliɛ sɔ'n min nyrun lɛ.

²⁹ Sran kwlaa bɔ sanvuɛsa nyɛn i b'ɔ yo sa tɛ'n, mmla kunngba'n nga su yɛ be `di-ɔ, i ɔnvuɛ o, i aofuɛ o.

³⁰ Sanngɛ sɛ sran kun, sɛ ɔnvuɛ o, sɛ aofuɛ o, bɔ nán sanvuɛsa yɛ ɔ nyɛnnin i-ɔ, nan ɔ yo nyinfu sa'n, be `kɛn i bo min mma'm be afiɛn.

³¹ Kɛ b'ɔ yoli min ndɛ'n i finfin b'ɔ fɔnnin min mmla'n, i sɔ ti yɛ be `kɛn i bo-ɔ. I bɔbɔ yɛ ɔ ´fɛ i sa tɛ'n i su afɛ nin-ɔn.»

Wunmiɛn-delɛ-cɛn'n i sacilɛ

³² Kɛ Izraɛlfuɛ'm be tɛ o aawlɛ flɛnnɛn'n nun lɔ'n, wie'm be ko trali sran kun, ɔ su isa yie wunmiɛn-delɛ-cɛn'n nun.

³³ Be fɛli i be bali Moiz nin Aarɔn nin sran'm be kwlaa be nyrun.

³⁴ Be trɛli i ase, yɛ be man be niɛnnin i su kpa, be ´minndɛ kɛ Anannganman kle fɔ ng'ɔ fata kɛ be fa tu i'n.

³⁵ Anannganman seli Moiz kɛ: «Man be fɛ i ngblaliɛ'n nun fite nan sran'm be kwlaa be `finfin i yɛbuɛ nan ɔ wu.»

³⁶ Be fali ndɛ nga Anannganman kannin'n su nan b'a fa sran sɔ'n ngblaliɛ'n nun lɔ b'a fite nan b'a ko finfin i yɛbuɛ b'a kun i.

Tralɛ nuan njɔlɛ'n

³⁷ Anannganman seli Moiz kɛ ɔ `kan ndɛ yɛ mun kle Izraɛlfuɛ mun.

³⁸ I waan: «Amun nin amun osu nunfuɛ mun amun `yo amun tralɛ'm bé nuan njɔlɛ, amun `sinsin su nin jese ble nzue-nzue.

³⁹ Tralɛ ng'ɔ lɛ nuan su njɔlɛ'n yɛ amun `wla-a. I liɛ'n, kɛ amun wun be'n, amún wla ´kpɛn min mmla'm bé su, kpɛkuun amun ´fa bé su. Nán amun yo amun klun klo ninnge nin konvi ninnge bɔ be fa sran wla amuɛn sɔlɛ nun mun.

⁴⁰ An `bu min mmla'm bé su falɛ'n i akunndan, i sɔ'n yɛ ɔ kle kɛ amun ti min liɛ-ɔ.

⁴¹ Min yɛ n ti Anannganman amun Nyanmiɛn nin-ɔn. N fali amun Ezipt lɔ m bali kɛ n ´yo amun Nyanmiɛn. Min yɛ n ti Anannganman amun Nyanmiɛn nin-ɔn.»