Kalɛ 14 - NYANMIƐN NDƐ'N 1998

Sran'm be waan be kɔ-man Kanaan mɛn'n nun lɔ

¹ Sran'm be kwlakwla be mannin be nɛn'n su be sunnin kɔnguɛ sɔ'n lele aliɛ'n fa cɛnnin be weiin.

² Izraɛlfuɛ'm be kwlaa be ijɔli Moiz nin Aarɔn bé tɛtɛ, be waan: «?Nguɛ sa yɛlɛ nga? Sɛ e wuli Ezipt mɛn'n nun lɔ'n annzɛ aawlɛ flɛnnɛn'n nun lɔ'n, wuun ɔ flunman!

³ ?Ɔ yo sɛ ti yɛ man Anannganman waan ɔ ´fa e ´kɔ mɛn sɔ'n nun lɔ nan alɛ ko di ye nan é yi nin e mma kanngan mun e ko kaci alɛ nnɛn nin-ɔn? ?Sɛ e sa é sin Ezipt lɔ bɔbɔ'n, ɔ flunman-man? »

⁴ Yɛ be seli be wiengu kɛ: «E `sie e kpɛnngbɛn kun nan e `sa é sin Ezipt lɔ.»

⁵ Moiz nin Aarɔn be kotoli sa klo, bé nyin utu asiɛ wun Izraɛlfuɛ'm be kwlaa be nyrun lɛ.

⁶ Yɛ be nga be ko kplali lika'n be niannin'n be nun nnyɔn: Nɛn i wa Zozie nin Zɛfine i wa Kalɛb, be titili bé wun tralɛ'm be nun,

⁷ nan b'a kan kle Izraɛlfuɛ'm be kwlakwla be kɛ: «Mɛn nga e ɔli e ko niɛnnin i lɛ'n, ɔ ti mɛn kun b'ɔ ti kpa dan.

⁸ Sɛ Anannganman jran é sin-ɔn, ɔ ´fa e kɔ mɛn sɔ'n nun lɔ yɛ ɔ ´fa man ye. Mɛn sɔ'n, i asiɛ'n ɔ yo like ye kpa. I kunngba'n ɔ ti nnɛn tawlɛ klanman.

⁹ Sanngɛ like kunngba ng'ɔ fata-man kɛ amun yo'n, yɛlɛ Anannganman su nyin kekle yolɛ'n. Nán amun sro mɛn sɔ'n nun sran mun. Be su ju-man e lika fi, e ´kwla be ndɛndɛ kpa. Afin be amuɛn nga be sasa be'n b'a wanndi be, sanngɛ Anannganman jin é sin. I ti nán man srɛ kun amun.»

¹⁰ Sran'm be kwlakwla be waan be ´finfin Zozie nin Kalɛb be yɛbuɛ nan be ´kun be. Kpɛkuun Anannganman yili i wun nglo sa nyannyan tannin sua'n su Izraɛlfuɛ'm be kwlaa be nyrun lɛ.

Moiz kpatali Nyanmiɛn mannin nzrafuɛ mun

¹¹ Anannganman seli Moiz kɛ: «?Finfin nga nvlefuɛ'm be yo min yɛ'n, cɛn onin ko yɛ be ´yaci i yolɛ-ɔ? ?Yɛ atrɛ nga n yi be be nyrun'n cɛn kwlaa bɔ be lafi-man su lɛ'n, cɛn onin ko yɛ be ´lafi min su-ɔ?

¹² N wa fa tukpacɛ b'ɔ sa ndɛndɛ kun n ´fa nunnun be kwlaa, i sin n wa yo man ɔ osu liɛ'n ´kaci nvle dan kun b'ɔ ´nyan wunmiɛn tra nvle nga.»

¹³ Moiz seli Anannganman kɛ: «Eziptfuɛ'm be sili kɛ ɔ wunmiɛn'n ti yɛ a fali nvle nga be mɛn'n nun lɔ bali-ɔ.

¹⁴ Be kɛnnin i sɔ kleli be lɔfuɛ mun. Be wunnin i kɛ wɔ Anannganman yɛ a jin ɔ nvle'n i sin-ɔn, nan a yi ɔ́ wun nglo a kle ɔ nvlefuɛ mun weiin. Be tili i kɛ wɔ yɛ a sasa be-ɔ. Afin a dun mmua be nyrun, wia nun, a o sin wɛnsrɛn tiaan kun nun, yɛ kɔnguɛ, a o sin tiaan kun nun.

¹⁵ ?Yɛ siɛn'n, sɛ a nunnun be kpalɛ kunngba'n, mɛn nga bɔ be tili sa nga a yoli be'n, be su se-man kɛ:

¹⁶ ‹Anannganman ɔ'a kwla fa-man i nvle'n ɔ'a ɔ-man mɛn nga ɔ seli i kɛ ɔ ´fɛ i kɔ nun'n i nun kun, i sɔ'n ti yɛ ɔ nunnunnin be aawlɛ flɛnnɛn'n nun lɔ nin-ɔn›?

¹⁷ I sɔ'n ti, n ´srɛ wɔ kpa, Anannganman, yi ɔ tinmin'n i nglo. Ndɛ nga a kan kleli ye'n, yiɛ i nuan. A seli kɛ:

¹⁸ ‹N ti Anannganman, n ti amlin difuɛ, yɛ min klun ti ufue kpa liɛ su. N di sa nga be yo min'n nin nyin kekle nga be yo i min su'n bé wun amlin. N jran-man sa tɛ yofuɛ'n i sin, n se-man kɛ ɔ'a yo-man sa tɛ. Kɛ sran kun yo sa tɛ'n n tu i fɔ lele fa wlu i anunman sian nin i anunman siansian'm be nun .›

¹⁹ Anannganman, ɔ klun kpa'n ti, yaci ɔ nvle'n i sa tɛ'n cɛ i, kɛ a fa sɔli bé sa tɛ'm be yaci cɛlɛ Ezipt lɔ lele bɔ ɔ'a fa ju yɛ'n sa.»

²⁰ Anannganman tɛli i su kɛ: «Kɛ bɔ a kpatali min'n ti m'an yaci.

²¹ Sanngɛ n ti Nyanmiɛn bɔ n lafi-man, yɛ min anyrunnyan'n ɔ yi asiɛ wunmuan'n .

²² Be kwlaa nga be wunnin min anyrunnyan'n nin min atrɛ nga n yili be Ezipt lɔ'n nin aawlɛ flɛnnɛn'n nun lɔ'n, bɔ b'a dun mmua b'a klɔklɔ min kpɛ blu'n, bɔ bé nyin a yi-man min'n,

²³ be kwlaa sɔ'n be nyinma sa su ta-man mɛn nga n seli be kɛ be `wɔ nun lɔ'n. Be kwlaa nga be yoli min finfin'n be su wun-man mɛn sɔ'n .

²⁴ Kɛ bɔ min sufuɛ Kalɛb fali akunndan kpa, b'ɔ yoli min klun sa'n ti, i liɛ'n, n ´yo man lika nga i ja tiali lɔ lɛ'n, ɔ ´kaci i ɔ nin i mma'm be liɛ .

²⁵ Kɛ e ´se yɛ'n, Amalɛkfuɛ'm be nin Kanaanfuɛ'm be tran lika kpɛtɛkplɛɛ'n nun lɔ. Ainman'n, amun `sa amún sin be `wɔ aawlɛ flɛnnɛn'n nun lɔ ndɛma jenvie'n i bue liɛ'n su lɔ.»

Anannganman i nvle'n i fɔ tulɛ

²⁶ Anannganman seli Moiz nin Aarɔn be kɛ:

²⁷ «?Mín wun ndɛ tɛtɛ nga nvlefuɛ klunwifuɛ nga'm be kan'n, cɛn onin ko yɛ be yaci-ɔ? M'an ti mín wun ndɛ tɛtɛ sɔ'n wie be nuan nun pɛ.

²⁸ Se be kɛ m bɔbɔ min Anannganman n wan yoo: ‹N ti Nyanmiɛn bɔ n lafi-man, yɛ wafa nga amun fa kannin min ndɛ bɔ n tili'n, i su sa yɛ n fa ´yo amun-ɔn.

²⁹ Amun fuɛn'm be ´ka aawlɛ flɛnnɛn nga nun wa. Amun kwlaa nga be kali amun'n, kɛ ɔ fɛ i be bɔ be lɛ afuɛ ablaɔn'n be nun b'ɔ ´fa ju be bɔ be lɛ afuɛ ablaɔn tra'n be nun'n, bɔ amun kannin mín wun ndɛ tɛtɛ,

³⁰ amún ja sa su tia-man mɛn nga n seli amun kɛ amun ´tran nun'n i nun wie . San Zɛfine i wa Kalɛb nin Nɛn i wa Zozie be ngunmin yɛ be ´ju lɔ-ɔ.

³¹ Amun mma kanngan mun bɔ amun waan be wa kaci alɛ nnɛn'n, n ´fa be n ´kɔ mɛn sɔ'n nun lɔ. Kpɛkuun be wa wun mɛn nga amun nyin tuli su'n.

³² Amun fuɛn liɛ'm be ´ka aawlɛ flɛnnɛn'n nun wa.

³³ Yɛ amun mma'm be wa wlan-wlan aawlɛ flɛnnɛn'n nun sa daan lele afuɛ ablanan. Amún nyin kekle nga amun yoli'n, be yɛ be wa fɛ i su afɛ nin-ɔn. Ɔ ´yo sɔ lele san amun fuɛn'm be kwlaa be ´ka aawlɛ flɛnnɛn'n nun wa.

³⁴ Amun fali cɛn ba ablanan yɛ amun fa nian-niannin mɛn nin-ɔn. N kusu n ´fa afuɛ ablanan n ´fa tu amun fɔ, afuɛ kun afɛ'n ɔ ti cɛn kun nun nyin kekle'n i akatua. Kpɛkuun amun ´si kɛ sɛ bé nyin yi-man min'n ɔ ti like tɛ.

³⁵ M bɔbɔ min Anannganman, min ndɛ nga n ko kan'n yɛ m'an kɛn i lɛ-ɔ. Nga n wa fa yo sran klunwifuɛ bɔ be jasoli mín wun mun'n, yɛ m'an kɛn i lɛ-ɔ. Be kwlaa be fuɛn'm be wa ka aawlɛ flɛnnɛn nga nun, amun ´wu wa sekeseke kpan.› »

³⁶ Sran nga bɔ Moiz sunmannin be kɛ be ko kpla mɛn'n be nian'n, bɔ kɛ be sali bé sin'n be yoli man sran'm be kwlaa be kannin mɛn sɔ'n i wun ndɛ tɛtɛ'n,

³⁷ bɔ be yoli man sran'm bé nyin tuli mɛn sɔ'n i nun lɔ kɔlɛ'n su'n, Anannganman boli be nan b'a wu.

³⁸ Sran nga be ɔli mɛn sɔ'n i nianlɛ be bali'n, be kwlaa sɔ'n be wuli kpan, san Nɛn i wa Zozie nin Zɛfine i wa Kalɛb yɛ be kali lɛ-ɔ.

Sran'm be fɔnnin ekun

³⁹ Moiz ko kannin ndɛ sɔ'n kleli Izraɛlfuɛ'm be kwlaa. Bé wla boli bé wun dan kpa.

⁴⁰ I sɔ'n ti be jasoli nglɛmun ndɛ kpa, be ɔli oka'n su lɔ nan b'a se kɛ: «E yoli sa tɛ, ɔ man i ti lika nga Anannganman kleli ye'n, e waan e ´kɔ lɔ siɛn'n.»

⁴¹ Moiz usali be kɛ: «?Nguɛ ti yɛ amun kaci Anannganman i nuan ndɛ nin-ɔn? Kannzɛ amun yo i sɛ, ɔ su yo-man ye kun.

⁴² Nán amun wɔ, afin Anannganman nun-man amun afiɛn kun. Nán amun wɔ nan amun kpɔfuɛ'm be kɔ kwla amun lɔ ngbɛn.

⁴³ Amalɛkfuɛ'm be nin Kanaanfuɛ'm be yɛ be o amun nyrun lɛ-ɔ, alɛ'n wa di amun. Afin kɛ bɔ amun kacili amún sin sili Anannganman'n ti'n, ɔ su jran-man amún sin.»

⁴⁴ Be fali bé nyin kekle kɛ be ´kɔ oka-oka lika'n nun lɔ. Sanngɛ Moiz nin Nyanmiɛn i alaka'n b'a tu-man bé bo ngblaliɛ'n nun lɛ.

⁴⁵ Amalɛkfuɛ nin Kanaanfuɛ bɔ be tran oka-oka lika'n nun lɔ'n be jrali nan b'a kwla be kwlalɛ tɛtɛ kpa. Be fuannin be lele be ko sieli be Ɔrma lika liɛ'n nun lɔ.