Kalɛ 13 - NYANMIƐN NDƐ'N 1998

Moiz sunmannin sran kɛ be ko kpla Kanaan mɛn'n be nian

¹ Anannganman seli Moiz kɛ:

² «Sunman sran Kanaan mɛn'n bɔ n su fa man Izraɛlfuɛ mun'n i nun lɔ, man be ko nian-nian lɔ. Man akpasua'm be kwlakwla be yi sran kunngun, yɛ man sran sɔ'm be yo akpasua su kpɛnngbɛn mun.»

³ Moiz niannin ndɛ nga Anannganman kannin'n su yoli. Ɔ sunmannin sran sɔ mun. Kɛ ɔ ´yo sɔ'n, wuun be tɛ o Paran aawlɛ flɛnnɛn'n nun lɛ. Sran sɔ'm be kwlaa be ti Izraɛlfuɛ'm be su kpɛn mun.

⁴ Be dunman mun yɛ: Ribɛn akpasua'n su'n, Zakir i wa Samia yɛ ɔ ɔli-ɔ,

⁵ Simeɔn akpasua'n su'n, Ɔri i wa Safat yɛ ɔ ɔli-ɔ,

⁶ Zida akpasua'n su'n, Zɛfine i wa Kalɛb yɛ ɔ ɔli-ɔ,

⁷ Isakar akpasua'n su'n, Zozɛf i wa Zigal yɛ ɔ ɔli-ɔ,

⁸ Efraim akpasua'n su'n, Nɛn i wa Oze yɛ ɔ ɔli-ɔ,

⁹ Bɛnzamɛn akpasua'n su'n, Rafi i wa Palti yɛ ɔ ɔli-ɔ,

¹⁰ Zabilɔn akpasua'n su'n, Sɔdi i wa Gadiɛl yɛ ɔ ɔli-ɔ,

¹¹ Zozɛf akpasua'n su'n, Manasefuɛ'm be nun'n, Sizi i wa Gadi yɛ ɔ ɔli-ɔ,

¹² Dan akpasua'n su'n, Gɛmali i wa Amiɛl yɛ ɔ ɔli-ɔ,

¹³ Azɛr akpasua'n su'n, Mikaɛl i wa Sɛtir yɛ ɔ ɔli-ɔ,

¹⁴ Nɛftali akpasua'n su'n, Vɔfsi i wa Nakbi yɛ ɔ ɔli-ɔ,

¹⁵ Gad akpasua'n su'n, Maki i wa Geiɛl yɛ ɔ ɔli-ɔ.

¹⁶ Sran nga Moiz yili be kɛ be ko nian Kanaan mɛn mun yɛ be o lɛ-ɔ. Moiz mannin Nɛn i wa Oze i suan dunman, ɔ flɛli i kɛ Zozie.

¹⁷ Moiz sunmannin sran sɔ mun Kanaan mɛn'n nun lɔ kɛ be ko nian-nian lɔ. Ɔ seli be kɛ: «Amun `sin mɛn'n i ngua lɔ lika liɛ'n nun, kpɛkuun i sin amun `fu oka'n su.

¹⁸ Amun `nian kɛ mɛn'n fa ti'n, yɛ amun `nian kɛ i nunfuɛ'm be fa ti'n, sɛ be lɛ wunmiɛn o, sɛ be lɛ-man wunmiɛn o, sɛ be sɔnnin o, sɛ b'a sɔn-man o.

¹⁹ Amun `nian sɛ mɛn nga be tran nun'n ti kpa o, sɛ kusu ɔ ti tɛ o, sɛ be klɔ'm be ti klɔ dandan bɔ be sili bé wun nin o, annzɛ kusu sɛ be o nanmue kanngan'm be nun o.

²⁰ Amun `nian kɛ be asiɛ'n fa ti'n, sɛ be yo su like-ɔ ɔ yo kpa o, sɛ kusu be yo su like-ɔ ɔ yo-man kpa o, sɛ waka o lɔ o, sɛ kusu waka nun-man lɔ o. Amun `tra amun anwlɛn nan amun `ko fa mɛn sɔ'n nun lɔ waka mma'n wie bla.» Afin kɛ ɔ ´yo sɔ'n, wuun be o vinyi mma klikli'n i tilɛ blɛ'n nun.

²¹ Be ko niannin mɛn'n, be fɛli i Zin aawlɛ flɛnnɛn'n nun lɛ lele fa juli Rɛɔb, Amat i wun koko lɛ.

²² Be ´kɔ'n, be sinnin ngua lɔ lika'n nun, be ɔli lele be juli Ebrɔn, kan Anak i mma Aiman nin Sesai, ɔ nin Talmai be osu'n nunfuɛ'm be tran lɛ'n. Ba sɔ'm be ti blamiɛn. Sran nga be kplannin Ebrɔn klɔ'n be dun mmua kplannin ɔ dili afuɛ nso kwlaa nan sran uflɛ'm b'a kplan Zɔan b'ɔ wo Ezipt lɔ'n.

²³ Be ɔli lele be ko toli Ɛskɔl kongo'n lɔ, yɛ be kpɛli vinyi sama kun bɔ vinyi mma kpatrɛ kun wo su'n, be fa sieli waka floloflolo wie su, kpɛkuun sran nnyɔn suali. Be tili grenadie mma nin figie mma be ukali su.

²⁴ Kɛ bɔ Izraɛlfuɛ'm be kpɛli vinyi mma kpatrɛ kun lika sɔ'n nun'n ti'n, be tɔnnin i dunman kɛ Ɛskɔl kongo.

Ndɛ bɔ sran nga Moiz sunmannin be'n be wa kannin'n

²⁵ Be ko dili cɛn ba ablanan lika'n i nian-nianlɛ'n nun, nan b'a sa bé sin.

²⁶ Kɛ be sali bé sin'n, be toli Moiz nin Aarɔn, ɔ nin Izraɛlfuɛ'm be kwlakwla Kadɛs lɔ Paran aawlɛ flɛnnɛn'n nun lɛ. Be kannin like nga be wunnin i lɔ'n i ndɛ kleli be, kpɛkuun be fali lɔ waka mma'n kleli be.

²⁷ Ndɛ nga be kan kleli Moiz'n yɛ: «E ɔli lele e juli mɛn nga a sunmannin e lɔ'n i nun lɔ kpɔ. Nanwlɛ o, ɔ ti mɛn kun bɔ lɔ asiɛ'n ɔ yo like ye kpa sakpa, i kunngba'n ti nnɛn tawlɛ klanman. Lɔ waka mma'n wie yɛ.

²⁸ Sanngɛ mɛn sɔ'n nun sran'm be ti tinwa yɛ be klɔ'm bé wun ti siwa. Klɔ sɔ'm be cɛncɛnnin kpa. Anak i osu'n nunfuɛ mun bɔ be ti blamiɛn'n e wunnin be lɛ bɔbɔ.

²⁹ Amalɛkfuɛ'm be tran ngua lɔ lika'n nun, Ɛtfuɛ'm be nin Zɛbisfuɛ mun, ɔ nin Amɔrfuɛ mun be tran oka-oka lika'm be nun, yɛ Kanaanfuɛ'm be tran be liɛ jenvie'n wun koko lɛ Zurdɛn nzue ba'n i nuan.»

³⁰ Kalɛb seli be nga be ijɔ Moiz tɛtɛ'm be kɛ be `muan bé nuan, nan ɔ'a kan ɔ'a gua su kɛ: «E `wɔ e `ko fa mɛn'n, afin san e ´nyan kwlalɛ le.»

³¹ Sanngɛ be nga be nin i ɔli lika'n i nian-nianlɛ'n be seli kɛ: «E nin nvle sɔ nunfuɛ mun kwla kun-man, afin be wunmiɛn'n tra e liɛ fatifati.»

³² Be nga be ɔli Kanaan lɔ be bali'n, be kannin mɛn sɔ'n i wun ndɛ tɛtɛ be kleli Izraɛlfuɛ mun. Be seli be kɛ: «Mɛn nga e ɔli nun lɛ'n, ɔ ti mɛn kun bɔ sɛ e waan e ´ko tran nun'n, e su nyan-man alaje.

³³ Afin sran nga e wunnin be lɔ'n be kwlaa be ti sran jajraajra ngunmin. Be ti Anak i osu nunfuɛ mun. Kɛ e nin be e jran sa'n, be tra é su fatifati, e ti bé bo kɛ ijrewa mun sa. Be nyrun kusu kɛ e ti sɔ-ɔ .»