Kalɛ 12 - NYANMIƐN NDƐ'N 1998

Kokowe yoli Mari

¹ Moiz jali Kis lɔ bla kun. Mari nin Aarɔn be kannin i wun ndɛ tɛtɛ i bla aja sɔ'n ti.

² Be seli kɛ: «?Moiz i ngunmin li yɛ Anannganman ijɔ kle i-ɔ? ?Ɔ'a ijɔ-man ɔ'a kle-man e bɔbɔ nga e wie?» Anannganman tili be ndɛ nga be kannin'n.

³ Moiz kusu ti sran kun b'ɔ ti wun ase kanfuɛ dan, asiɛ nga su wa sran fi to-mɛn i wun ase kanlɛ'n nun.

⁴ Kpɛkuun Anannganman seli Moiz, nin Aarɔn, ɔ nin Mari be kɛ: «Amun sran nsan'n amun `wɔ tannin sua'n nun lɔ.» Yɛ be nsan'n be fiteli ngblaliɛ'n nun be ɔli-ɔ.

⁵ Anannganman jrali sin wɛnsrɛn tiaan kun nun, kpɛkuun ɔ jrannin tannin sua'n nyrun lɛ. Ɔ flɛli Aarɔn nin Mari, yɛ be nnyɔn'n be wunngeli i wun lɔ-ɔ.

⁶ Ɔ seli be kɛ: «Amun `tie min ndɛ'm be kpa. Mín nuan ijɔfuɛ kun b'ɔ o amun afiɛn sa'n, aolia nun yɛ n yi mín wun nglo n kle i-ɔ, laliɛ nun yɛ n kan ndɛ n kle i-ɔ.

⁷ Sanngɛ min sufuɛ Moiz liɛ'n, ɔ ti-man sɔ. I liɛ'n, ɔ nian min awlo'n su kpa.

⁸ N kan min ndɛ mun weiin n kle i. N yi mín wun nglo weiin n kle i, n yo-mɛn i nyanndra nun, ɔ wun wafa nga n fa ti'n. ?Yɛ ɔ yo sɛ ti yɛ an kan min sufuɛ sɔ'n i wun ndɛ tɛtɛ bɔ srɛ kaan sa kun-man amun nin-ɔn?»

⁹ Anannganman i ya'n jueli bé su kɛ sin sa, yɛ ɔ ɔli i nyrun-ɔn.

¹⁰ Kɛ sin wɛnsrɛn'n jasoli tannin sua'n su wieli'n, kpɛkuun fuaii, kokowe ufue yɛ ɔ'a yo Mari yɛ, kokowe sɔ'n ti ufue kɛ jese fɔkɔ sa. Aarɔn ´kpɛ i nyin nian Mari-ɔ, kokowe yɛ ɔ'a yo i yɛ.

¹¹ Aarɔn seli Moiz kɛ: «Ee, min min, y'a fɔn, n ´srɛ wɔ kpa ti-ɔ, nán yo man sa tɛ nga e fali sinnzin e yoli'n i nuan nyrɛnnɛn tɔ é su.

¹² Nán man Mari kaci kɛ ba bɔ ɔ'a wu i nin klun bɔ kɛ ɔ ´flo tɔ-ɔ, i bue kun a saci'n sa.»

¹³ Yɛ Moiz sun flɛli Anannganman-an, ɔ seli kɛ: «Ee Anannganman, n ´srɛ wɔ kpa ti-ɔ, yo i juejue.»

¹⁴ Anannganman tɛli i su kɛ: «?Sɛ i si guɛli i nyrun'n nun ngɔsrɛ bɔbɔ'n, nán cɛn ba nso yɛ ɔ tran nyannzuɛn nun-ɔn? I sɔ'n ti, man be kɛn i bo ngblaliɛ'n nun nan ɔ ko di cɛn ba nso nan ɔ'a sɛ i sin i wiengu'm be afiɛn wa ekun.»

¹⁵ Be kannin Mari bo ngblaliɛ'n nun lele cɛn ba nso. Sran'm be minndɛli kɛ ɔ `sɛ i sin be afiɛn, nan b'a tu bé bo b'a ɔ lika uflɛ.

¹⁶ Kɛ ɔ yoli sɔ'n, Izraɛlfuɛ'm be tuli bé bo ɔli Azerɔt, be ko kpɛli be ngblaliɛ Paran aawlɛ flɛnnɛn'n nun.