Kalɛ 11 - NYANMIƐN NDƐ'N 1998

Izraɛlfuɛ'm be juli Tabeera lɛ

¹ Cɛn kun Izraɛlfuɛ'm be ijɔli Nyanmiɛn tɛtɛ kpa. Kɛ Anannganman tili i sɔ'n, ɔ fali ya nan sin ɔ'a nunnun ngblaliɛ'n i bue kun.

² Sran'm be kpannin kekle, be sun flɛli Moiz, nan Moiz a kpata Nyanmiɛn, kpɛkuun fɔun yɛ sin'n nuannin-ɔn.

³ Be tɔnnin lika sɔ'n i dunman kɛ Tabeera. I bo'n yɛlɛ Sin Dan afin lɛ yɛ Anannganman wɔli be ngblaliɛ'n nun nin-ɔn.

Izraɛlfuɛ'm be waan be ´di nnɛn

⁴ Cɛn kun, be o lɛ kpɛkuun aofuɛ bɔ be fin lika fanunfanun'm be nun bɔ be nin Izraɛlfuɛ mun be o lɛ'n be konvi sɔli nnɛn dilɛ dan kpa, yɛ Izraɛlfuɛ'm be bɔbɔ kusu be wa triki-ɔ. Be waan: «?Wan yɛ ɔ ´man e nnɛn nan y'a di-ɔ?

⁵ Ee! E wla kpɛn ninnge nga e di be Ezipt lɔ'n bé su: kpatra bɔ e ´di-ɔ e yi-man dein'n, e di kɔnkɔmbru, nin melɔn, nin puaro nin lai mun.

⁶ Siɛn'n e yɛ e su yo kokloo yɛ, e nyan-man like sɔ'm be wie fi e di-mɛn i kun. Mani'n yɛ e wun i sa bɔ tititi-ɔ.»

⁷ Mani'n ti kɛ awie mma sa, kpɛkuun ɔ ti ufue kɛ bdeliɔm sa.

^8-9 Kɔnguɛ kɛ bɔlɛ ufue'n ´gua'n, yɛ mani'n kusu gua-a. Kpɛkuun nglɛmun'n, sran'm be bo sanndi lika'n nun be kɔ i isalɛ. Be ko tin i yɛbuɛ su annzɛ be si i kpokpo nun. Be tɔn i blalɛ sɛ nun, be fa yo gato. I fɛ'n ti kɛ gato bɔ be fa ngo yɛ be fa yoli'n sa-a.

¹⁰ Moiz tili trikilɛ bɔ nvlefuɛ'm be trikili'n, kɛ ɔ ´yo sɔ'n, wuun be kwlaa be o be awlo kunngun be nun be tannin sua'n i anuan'n nun. Anannganman fali ya dan kpa, i sɔ'n ti man Moiz i wun fɔli.

¹¹ Moiz seli Anannganman kɛ: «?Nguɛ ti yɛ a yo min sɔ-ɔ, Anannganman? ?Nguɛ ti yɛ ɔ waan a yo-man min ye nin-ɔn? ?Ɔ yo sɛ ti yɛ a fali nvle nga i nyrun mmua dunlɛ b'ɔ ti kɛ trɔ sa'n a fa sieli mín ti su-ɔ?

¹² ?Min yɛ n wunnzɛli nvle nga nunfuɛ mun-ɔn? ?Min yɛ n wuli be-ɔ? ?Nguɛ ti yɛ ɔ waan n `ju be kɛ bla ta b'ɔ ju i wa nɔnman'n sa, nan n `fa be n wɔ mɛn nga a seli be nannan'm be kɛ a ´fa man be'n i nun nin-ɔn?

¹³ ?Ninfan yɛ n ´ko nyan min nnɛn liɛ nan m'an fa man sran nga be ´sun gua mín wun yɛ'n, bɔ be ´se n kɛ m `man be nnɛn man be di yɛ mun-ɔn?

¹⁴ Min ngunmin n kwla suan-man sran nga'm be kwlaa bé bo, afin be yo nɔnnin ngboko kɛ trɔ sa, trɔ sɔ'n ɔ tra min fanngan'n su.

¹⁵ Sɛ ɔ waan a ´yo min sɔ'n, wuun kun min kpɛkun. Kɛ ɔ ko yo sɔ'n, wuun ndɛ ti a kpɛ, wuun w'a yo min ye, kpɛkuun n su wun-man min nyrun kun.»

¹⁶ Anannganman seli Moiz kɛ: «Yia sran yasua ableso bɔ be ti Izraɛlfuɛ'm be nun kpɛnngbɛn bɔ be nian Izraɛl nvle'n su'n. Fa be kɔ tannin sua nga n yi min wun nglo nun'n i bo lɔ man be jran nglo ɔ nyrun lɛ.

¹⁷ N wa jra nan e nin wɔ e wa koko yalɛ lɛ. N ´fa wawɛ ng'ɔ o ɔ́ su'n wie n ´fa wla be nun. Kpɛkuun be ´uka wɔ nvle'n b'ɔ ti kɛ trɔ sa'n i sualɛ nun nan ɔ ngunmin w'a sua-man trɔ sɔ'n kun.

¹⁸ Se nvlefuɛ'm be kɛ: ‹Amun `yo amún wun saun sie ainman, nan amun wa di nnɛn, afin n tili amun sunlɛ nga amun sunnin i wun'n. Amun seli kɛ: ?Wan yɛ ɔ ´man e nnɛn nan y'a di-ɔ? Afin e nyan like kpakpa e di Ezipt lɔ. N wa man amun nnɛn amun ´di.

¹⁹ Nán cɛn kunngba yɛ an ´di nnɛn sɔ nin-ɔn, nán cɛn nnyɔn ndɛ-ɔ, nán cɛn nnun annzɛ cɛn blu, annzɛ cɛn ablaɔn ndɛ-ɔ.

²⁰ Amun ´di i lele anglo klonglo kun, ɔ ´flan amun siɛn'n, lele ɔ ´bɔn amun bue nun. Kɛ bɔ amun yoli min bɔ n wo amun afiɛn'n min finfin, bɔ amun sun guali min wun, bɔ amun seli kɛ: ?Nguɛ ti yɛ e fin Ezipt lɔ e bali'n? Sa nga amun yoli'n i nuan fɔ nga n ´tu amun'n yɛ ɔ o lɛ-ɔ? › »

²¹ Moiz seli kɛ: «Sran nga be sin yia min yɛ'n be ju sran akpi-akpi ya nsiɛn. Kpɛkuun ɔ waan a ´man be nnɛn lele anglo klonglo kun.

²² Sɛ e kun é bua nin e nannin'm be kwlakwla'n ɔ su ju-man lika fi. Sɛ e waan e ko tra kpatra nga be o jenvie'n nun'n be kwlaa bɔbɔ'n, ɔ su ju-man be.»

²³ Anannganman tɛli i su kɛ: «?A bu i kɛ wuun n su kwla-man ndɛ nga n kannin'n i yo? Tran lɛ nian, sɛ nga n kɛn i lɛ'n ɔ ´yo su o, sɛ kusu ɔ su yo-man su o .»

Nyanmiɛn fɛli i Wawɛ'n mannin sran ableso mun

²⁴ Moiz ɔli ko kannin ndɛ nga Anannganman kan kleli i'n kleli nvlefuɛ mun. I sin ɔ flɛli sran ableso bɔ be ti Izraɛl kpɛnngbɛn mun. Ɔ siesieli be tɛɛn sin yiali tannin sua'n.

²⁵ Anannganman jrali sin wɛnsrɛn'n nun kpɛkuun ɔ nin Moiz be ijɔli. Nyanmiɛn fali Wawɛ ng'ɔ o Moiz i su'n wie mannin kpɛnngbɛn ableso sɔ mun. Kɛ Wawɛ'n jrali bé su'n yɛ be tɔli Nyanmiɛn i nuan ijɔlɛ'n su-ɔ. Sanngɛ i sɔ'n ɔ'a cɛ-man.

²⁶ Sran nnyɔn, be flɛ kun Ɛldad yɛ be flɛ kun ekun Medad, be kali be liɛ ngblaliɛ'n nun lɔ. Wawɛ'n jrali bé su wie, afin be o sran ableso nga be klɛli be dunman'n be nun wie, kusu wuun b'a ɔ-man tannin sua'n wun lɔ wie, yɛ be tɔli Nyanmiɛn i nuan ijɔlɛ'n su-ɔ.

²⁷ Gbanflɛn kun wanndili ko seli Moiz kɛ: «Ɛldad nin Medad be su ijɔ Nyanmiɛn nuan ngblaliɛ'n nun lɔ.»

²⁸ Yɛ Nɛn i wa yasua liɛ Zozie bɔ kɛ ɔ fin i kaan nun'n ɔ uka Moiz be di junman'n, ɔ seli kɛ: «Moiz min min, nán kplin bé su kɛ be `ijɔ Nyanmiɛn nuan kun.»

²⁹ Moiz tɛli i su kɛ: «?A su si mín ti kwla? ?Sɛ i li Anannganman fɛ i Wawɛ'n sie i nvlefuɛ'm be kwlaa be su nan be ijɔ i nuan'n, nán ndɛ fɛ-ɔ?»

³⁰ Moiz nin Izraɛl kpɛnngbɛn'm be cuɛnnin bé wun be ɔli ngblaliɛ'n nun lɔ.

Aoko'm be balɛ

³¹ Anannganman yoli man aunngban kun fin jenvie'n su lɔ, ɔ fali aoko mun wa guali ngblaliɛ'n nun. Be sin yia ngblaliɛ'n. Sɛ sran kun waan ɔ ´nanti be nun'n, kɛ ɔ fɛ i bue kun su sa'n, ɔ ´nanti lele cɛn ba klonglo kun nan ɔ'a kpɛ be. I bue kun ekun su lɔ'n i kunngba nin-ɔn. Kɛ be tian be wiengu su sa, be fleiin su ju mɛtri kun.

³² Izraɛlfuɛ mun be fali cɛn wunmuan nin i kɔnguɛ wunmuan'n ɔ nin kɛ aliɛ'n cɛnnin'n i nglɛmun'n wunmuan'n fa isali aoko'n wie. Sran nga bɔ be waan ɔ'a isa-man wie mlɔnmlɔn'n, yɛlɛ kilo akpi kun. Be wlɛli be sin yiali ngblaliɛ'n.

³³ Sanngɛ kwlaa nan be je a kan nnɛn sɔ'n, Anannganman fali ya dan kpa nan ɔ'a fa nyrɛnnɛn ɔ'a yi bé su.

³⁴ Be tɔnnin lika sɔ'n i dunman kɛ Kibrɔt-Atava. I bo'n yɛlɛ Konvi Asieliɛ, afin lɛ yɛ be sieli be nga nnɛn'n i dilɛ'n i konvi kpli'n ɔ trannin be nun nin-ɔn.

³⁵ Kɛ Izraɛlfuɛ'm be tuli bé bo Kibrɔt-Atava lɛ'n, be ɔli Azerɔt lɔ nan b'a yo be ngblaliɛ'n lɔ.