Kalɛ 10 - NYANMIƐN NDƐ'N 1998

Awɛ nga be fali jɛtɛ ufue be yoli'n

¹ Anannganman seli Moiz kɛ:

² «Yo man be fa jɛtɛ ufue bɔ be boli'n be `fa yi awɛ nnyɔn, nan be `bo be fa flɛ sran'm be kwlaa. Kɛ be tutu bé tannin sua'n bé bo bɔ be ´kɔ'n, man be bo nan sran'm be wɔ be nyrun.

³ Sɛ be bo awɛ nnyɔn'n be likawlɛ'n, man sran'm be kwlaa be yia tannin sua nga n yi min wun nglo nun'n i anuan'n nun lɛ.

⁴ Sɛ kusu awɛ kunngba cɛ yɛ be bo'n, man wlengbi mun nin sran akpi su kpɛn bɔ be o Izraɛlfuɛ'm be afiɛn'n be ngunmin yɛ be sin yia wɔ-ɔ.

^5-6 Sɛ be bo awɛ'n nan be bo su ndɛ'n, ɔ ti akpasua'm be kɔlɛ liɛ. I klikli su'n, man akpasua nga be o tannin sua'n i bue ng'ɔ kpɛ wia afiliɛ lɔ'n be wɔ. I nnyɔn su'n, man akpasua nga be o ngua lɔ'n be wɔ.

⁷ Sanngɛ kɛ be bo awɛ'n kɛ sran'm be `yia'n, be bo-mɛn su ndɛ.

⁸ Aarɔn i osu'n nun sran'm be ngunmin cɛ yɛ be lɛ atin be bo awɛ nin-ɔn. Ɔ ti mmla kun bɔ amun bɔbɔ nin amun mma mun amun `fa su tititi.

⁹ Blɛ bɔ amun o amun mɛn'n nun bɔ amun kpɔfuɛ'm be ´fa alɛ wla amun sin'n bɔ amun nin be ´ko kun'n, amun `bo sro yɛ amun `bo awɛ'n, i liɛ'n min bɔ n ti Anannganman amun Nyanmiɛn'n, mín wla ´kpɛn amún su, kpɛkuun n ´de amun amun kpɔfuɛ'm bé sa nun.

¹⁰ Amun aklunjuɛ cɛn'm be nun'n, bɔ yɛlɛ amun cɛn dilɛ mun nin amun anglo le kun cɛn dilɛ mun'n, kɛ amun ´yi tɛ nga be yrɛ be nnɛn'n kɔlikɔli'n nin bo kun yolɛ i su tɛ'n, amun `bo awɛ'n. I sɔ'n nun yɛ mín wla ´kpɛn amún su-ɔ. Min yɛ n ti Anannganman amun Nyanmiɛn nin-ɔn.»

IZRAƐLFUƐ'M BE BO TULƐ SINAI LƆ LELE BƆ BE FA JU MOAB ANYIALIƐ'N SU LƆ'N I NDƐ Izraɛlfuɛ'm b'a fa atin'n

¹¹ Afuɛ nnyɔn su'n i anglo nnyɔn'n i le ablaɔn su'n, sin wɛnsrɛn'n jasoli Nyanmiɛn tannin sua bɔ yɛbuɛ paplaapla nnyɔn nga mmla blu'm be klɛ be su'n be o nun'n su.

¹² Izraɛlfuɛ'm be tuli bé bo Sinai aawlɛ flɛnnɛn'n nun lɛ kɛ Nyanmiɛn kleli be kɛ be yo'n sa. Sin wɛnsrɛn'n ko jrannin Paran aawlɛ flɛnnɛn'n nun lɔ.

¹³ Bé bo tulɛ nga Anannganman mannin Moiz mmla kɛ be `tu'n i klikli'n yɛ ɔ o lɛ-ɔ.

¹⁴ Be nga be kan be boli nun bɔ be o Zida i flanga'n i sin'n, be yɛ be dun mmua-a. Zida i akpasua su sonja'm be su kpɛn'n yɛlɛ Aminadab i wa yasua Naksɔn.

¹⁵ Yɛ Isakar akpasua'n i su sonja'm be liɛ'n yɛlɛ Ziar i wa Nɛtaneɛl.

¹⁶ Zabilɔn akpasua liɛ'n i su sonja'm be kusu be liɛ'n yɛlɛ Elɔn i wa Eliab.

¹⁷ Be tutuli Nyanmiɛn i sua'n, sran nga be sua ɔli mun yɛlɛ Gɛrsɔn i osu'n nunfuɛ mun nin Mɛrari i osu'n nunfuɛ mun.

¹⁸ I sin be nga be mantan be'n yɛlɛ be nga be nin Ribɛn i akpasua'n be yoli kun bɔ be o Ribɛn i flanga liɛ'n i sin'n. Ribɛn i akpasua su sonja'm bé su kpɛn'n yɛlɛ Sɛdeir i wa Elizir.

¹⁹ Simeɔn i akpasua su sonja liɛ'm bé su kpɛn'n yɛlɛ Zirisadai i wa Sɛlimiɛl.

²⁰ Gad i akpasua su sonja liɛ'm bé su kpɛn'n yɛlɛ Deiɛl i wa Eliazaf.

²¹ Levifuɛ nga be fin Keat osu nun'n, bɔ be sua ninnge nga be ti Nyanmiɛn liɛ klonglo'n be suli bé su. Levifuɛ'm bé onga'm be dun mmua ko kplannin Nyanmiɛn i lika'n be fa minndɛli Keatfuɛ mun.

²² Be nga be nin Efraimfuɛ mun be yoli kun bɔ be nin be o Efraim i flanga liɛ'n i sin'n yɛ be suli bé su-ɔ. Sran ng'ɔ ti Efraim i akpasua su sonja'm be kpɛn'n yɛlɛ Amiid i wa Elisama.

²³ Manasefuɛ'm be sonja liɛ'm bé su kpɛn'n yɛlɛ Pɛdazir i wa Gamliɛl.

²⁴ Bɛnzamɛnfuɛ'm be sonja su kpɛn liɛ'n yɛlɛ Gidɛɔni i wa Abidan.

²⁵ Be nga be nin Danfuɛ'm be yoli kun bɔ be nin be o Dan i flanga liɛ'n i sin'n be suli bé su. Be yɛ be cuɛn be kwlaa bé bo-ɔ. Dan i akpasua su sonja su kpɛn'n yɛlɛ Amisadai i wa Aiezɛr.

²⁶ Azɛr i akpasua'n su sonja'm bé su kpɛn'n yɛlɛ Ɔkran i wa Pagiɛl.

²⁷ Nɛftali i akpasua'n su sonja'm bé su kpɛn'n yɛlɛ Enan i wa Aira.

²⁸ Kɛ Izraɛlfuɛ'm be lɔngɔli su kɛ nga sa yɛ be ɔli-ɔ. Be ɔli akpasua-akpasua.

Moiz su kunndɛ sran kun b'ɔ ´dun be nyrun mmua ɔ ´kle be atin'n

²⁹ Moiz kannin ndɛ kleli Ɔbab b'ɔ ti Moiz i sia Reiɛl i wa yasua'n. Reiɛl ti Madianfuɛ. Moiz seli Ɔbab kɛ yoo: «Lika nga bɔ Anannganman seli kɛ ɔ ´fa man ye'n, i nun yɛ e su kɔ lɛ. Bla man e wɔ, e ´yo wɔ kpa, afin Anannganman kannin kɛ ɔ wa yo Izraɛlfuɛ'm be kpa.»

³⁰ Ɔbab tɛli i su kɛ: «N kɔ-man, min mɛn liɛ'n nin min awlo liɛ'n nun yɛ n ´kɔ-ɔ.»

³¹ Moiz seli i kɛ: «N ´srɛ wɔ kpa ti-ɔ, nán yaci e ngunmin, yɛlɛ kɛ ɔ liɛ'n a si aawlɛ flɛnnɛn nga nun lika nga e kwla kpɛ e ngblaliɛ mun'n, yɛ a kwla klekle e atin mun.

³² Sɛ a nin ye san nun'n, sa kpa nga Anannganman ´yo ye'n, ɔ ´yo wɔ wie.»

³³ Be tuli be bo Anannganman i oka'n wun lɛ be nantili cɛn ba nsan. Be fa Nyanmiɛn i alaka'n dun mmua be nyrun nan ɔ ´kunndɛ lika kpa kun nga be ko tran nun'n.

³⁴ Anannganman i sin wɛnsrɛn'n wo bé ti su wia nun kɛ be ´kɔ'n.

³⁵ Kɛ be ´fa alaka'n be ´kɔ'n, Moiz seli kɛ: «Anannganman, jaso kɛ ɔ ´yo nan ɔ kpɔfuɛ'm b'a bo b'a sanndi'n ti. Man be kwlaa nga be kpɔ wɔ'n be wanndi ɔ nyrun .»

³⁶ Yɛ kɛ be taka alaka'n i ase'n, ɔ seli kɛ: «Anannganman, bla wa tran Izraɛl awlobo kpanngban nga'm be afiɛn.»