Kalɛ 1 - NYANMIƐN NDƐ'N 1998

IZRAƐLFUƐ'M BE O SINAI AAWLƐ FLƐNNƐN NUN Izraɛl akpasua'm be dunman klɛlɛ

¹ Kɛ Izraɛlfuɛ'm be tuli Ezipt lɔ'n, i afuɛ nnyɔn'n su i anglo nnyɔn su, i cɛn ba klikli'n su'n, Anannganman kannin ndɛ kleli Moiz Sinai aawlɛ flɛnnɛn'n nun lɔ tannin sua bɔ Nyanmiɛn yi i wun nglo nun'n i nun. Ɔ seli i kɛ:

² «A nin Aarɔn amun `ka Izraɛlfuɛ'm be kwlakwla. Kɛ amun ´klɛ yasua'm be kwlaa be dunman'n, amun `klɛ be awlobo-awlobo nin kɛ be afiliɛ'n fa ti'n.

³ Amun `ka yasua'm be kwlaa nga b'a di afuɛ ablaɔn nin afuɛ ablaɔn gua su'n, bɔ be kwla di sonja, bɔ be o Izraɛl sonja akpasua-akpasua'm be nun'n.

⁴ Man akpasua kun su awlobo kpɛnngbɛn kun, akpasua kun su awlobo kpɛnngbɛn kun, be uka amun.

⁵ Sran sɔ'm bɔ be wa uka amun'n be dunman mun yɛ. Ribɛn akpasua liɛ'n su'n, amun `fa Sɛdeir i wa yasua bɔ be flɛ i Elizir.

⁶ Simeɔn akpasua'n su'n, amun `fa Zirisadai i wa yasua Sɛlimiɛl.

⁷ Zida akpasua'n su'n, amun `fa Abinadab i wa yasua Naksɔn.

⁸ Isakar akpasua'n su'n, amun `fa Ziar i wa yasua Nɛtaneɛl.

⁹ Zabilɔn akpasua'n su'n, amun `fa Elɔn i wa yasua Eliab.

¹⁰ Zozɛf i mma'm be liɛ'n, Efraim akpasua'n su'n, amun `fa Amiid i wa yasua Elisama. Manase akpasua'n su'n, amun `fa Pɛdazir i wa yasua Gamliɛl.

¹¹ Bɛnzamɛn akpasua'n su'n, amun `fa Gidɛɔni i wa yasua Abidan.

¹² Dan akpasua'n su'n, amun `fa Amisadai i wa yasua Aiezɛr.

¹³ Azɛr akpasua'n su'n, amun `fa Ɔkran i wa yasua Pagiɛl.

¹⁴ Gad akpasua'n su'n, amun `fa Deiɛl i wa yasua Eliazaf

¹⁵ Nɛftali akpasua'n su'n, amun `fa Enan i wa yasua Aira.»

¹⁶ Awlobo kpɛnngbɛn nga be kpali be sɔ'n be kunngba'n be ti Izraɛl sonja'm bé su kpɛn.

¹⁷ Moiz nin Aarɔn be fali sran nga be boboli be dunman'n be ukali bé wun su.

¹⁸ Anglo nnyɔn su'n, i cɛn ba klikli'n su'n, be yiali sran'm be kwlaa. Be klɛli Izraɛlfuɛ'm be kwlaa nga b'a di afuɛ ablaɔn nin afuɛ ablaɔn a gua su'n be dunman. Be klɛli be dunman kɛ be awlobo'n nin be afiliɛ'n fa ti'n.

¹⁹ Be niannin nga Anannganman kleli Moiz'n su yoli. Sinai aawlɛ flɛnnɛn'n nun yɛ Moiz kali sran mun-ɔn.

^20-43 Izraɛl akpasua kwlaa'n su'n, be klɛli be dunman, kɛ be awlobo'n nin be afiliɛ'n fa ti'n. Be klɛli yasua'm be kwlaa nga b'a di afuɛ ablaɔn nin ablaɔn a gua su'n, bɔ be kwla di sonja'n be dunman. Be boli be dunman'n i klɛlɛ bo Ribɛn b'ɔ ti Zakɔb i wa'm be kpɛnngbɛn'n i akpasua liɛ'n su. Kɛ be kali be sɔ'n, bé nuan nga be wunnin i'n yɛ. Ribɛn i akpasua liɛ'n su'n, be ti sran akpi-akpi ablanan-nin-nsiɛn sran ya nnun (46.500). Simeɔn akpasua liɛ'n su'n, be ti sran akpi-akpi ablenun-nin-ngwlan sran ya nsan (59.300). Gad akpasua liɛ'n su'n, be ti sran akpi-akpi ablanan-nin-nnun sran ya nsiɛn sran ablenun (45.650). Zida akpasua liɛ'n su'n, be ti sran akpi-akpi ableso-nin-nnan sran ya nsiɛn (74.600). Isakar akpasua'n su'n, be ti sran akpi-akpi ablenun-nin-nnan sran ya nnan (54.400). Zabilɔn akpasua'n su'n, be ti sran akpi-akpi ablenun-nin-nso sran ya nnan (57.400). Efraim b'ɔ ti Zozɛf i mma'm be nun kun'n, i akpasua liɛ'n su'n, be ti sran akpi-akpi ablanan sran ya nnun (40.500). Manase b'ɔ ti Zozɛf i wa'm be nun kun ekun'n, i akpasua liɛ'n su'n, be ti sran akpi-akpi ablasan-nin-nnyɔn sran ya nnyɔn (32.200). Bɛnzamɛn i akpasua'n su'n, be ti sran akpi-akpi ablasan-nin-nnun sran ya nnan (35.400). Dan akpasua'n su'n, be ti sran akpi-akpi ablesiɛn-nin-nnyɔn sran ya nso (62.700). Azɛr akpasua'n su'n, be ti sran akpi-akpi ablanan-nin-kun sran ya nnun (41.500). Nɛftali akpasua'n su'n, be ti sran akpi-akpi ablenun-nin-nsan sran ya nnan (53.400).

⁴⁴ Kɛ Moiz nin Aarɔn, yɛ awlobo kpɛnngbɛn blu-nin-nnyɔn bɔ be jrannin be akpasua'm bé ja nun'n be kali sran mun'n, bé nuan nga be wunnin i'n yɛlɛ ng'ɔ o lɛ'n.

⁴⁵ Izraɛlfuɛ'm be kwlaa nga b'a di afuɛ ablaɔn nin afuɛ ablaɔn gua su'n, bɔ be kwla di sonja'n, kɛ be kali be'n,

⁴⁶ be ti sran akpi-akpi ya nsiɛn sran akpi nsan sran ya nnun sran ablenun. (603.550)

Levi akpasua'n i junman liɛ b'ɔ fata kɛ ɔ di'n

⁴⁷ Kɛ be ´ka Izraɛlfuɛ kun nga mun'n, b'a ka-man Levifuɛ'm be wie.

⁴⁸ Afin Anannganman dun mmua seli Moiz kɛ:

⁴⁹ «Kɛ a ´ka Izraɛlfuɛ kun nga mun bɔ a ´klɛ be dunman'n, nán fa Levi osu'n nunfuɛ mun wla nun.

⁵⁰ Tannin sua nga n yi min wun nglo nun'n bɔ min alaka'n wo nun'n, ɔ nin i wun ninnge'n kwlaa, fa wlɛ i Levifuɛ'm bé sa nun. Sɛ amun su tu amun bo kɔ lika uflɛ'n, be yɛ be ti tannin sua'n nin i wun ninnge'm be suafuɛ-ɔ. Be ´di sua sɔ'n i nun junman yɛ be ´yo be ngblaliɛ liɛ'n sin yiɛ i.

⁵¹ Sɛ amun su tu amun bo kɔ lika uflɛ'n, be yɛ be ti i tutufuɛ-ɔ. Blɛ bɔ amun ´kplan amun ngblaliɛ mun'n, be yɛ be ti tannin sua'n i kplanfuɛ-ɔ. Sɛ ɔ min kun bɔ a ti-man Levifuɛ a ko mantan mín tannin sua'n, be ´kun wɔ.

⁵² Man Izraɛlfuɛ'm be tran be ngblaliɛ kunngun'm be nun, be tran be sonja akpasua kunngun'm be nun be flanga'n i wun lɛ.

⁵³ San Levifuɛ'm be ngunmin yɛ be ngblaliɛ liɛ'n ɔ `sin yia tannin sua bɔ min alaka'n wo nun nin-ɔn. Be `di nun junman. I liɛ'n, n su fa-man Izraɛlfuɛ'm bé wun ya.»

⁵⁴ Izraɛlfuɛ'm be niannin Anannganman i nuan su ndɛ b'ɔ kan kleli Moiz'n su be yoli i sekeseke.