Jue Mun 99 - NYANMIƐN NDƐ'N 1998

Anannganman ti famiɛn, i nzuɛn'n nin klɔ sran liɛ'n ti-man kun

¹ Anannganman ti famiɛn, ɔ man nvlefuɛ'm be usu. Ɔ ti anz'm bé ti su nglo, ɔ man asiɛ'n keje.

² Anannganman yɛ ɔ ti dan Siɔn lɔ-ɔ. Ɔ o nvle'm be kwlakwla bé ti su.

³ Man be manman wɔ ɔ dunman b'ɔ ti dan, b'ɔ yo sro'n ti. Ɔ nzuɛn'n nin klɔ sran liɛ'n ti-man kun.

⁴ Man be manman famiɛn'n b'ɔ kwla'n, b'ɔ klo nanwlɛ dilɛ'n. Wɔ yɛ a sieli mmla ng'ɔ ti bɔ e nanti su nin-ɔn. Wɔ yɛ a sieli ndɛ siesielɛ'n i wafa'n nin sa nuan su yolɛ'n Izraɛl mɛn'n nun-ɔn.

⁵ An `yi Anannganman e Nyanmiɛn'n i ayɛ. An `koto i ja takatakawlɛ'n i nyrun lɛ. I nzuɛn'n nin klɔ sran liɛ'n ti-man kun.

⁶ Moiz nin Aarɔn bɔ be ti Anannganman nyrun jranfuɛ'n, ɔ nin Samiɛl b'ɔ bo i dunman'n, kɛ be kpan flɛli i'n, ɔ tɛli be su.

⁷ Ɔ jrannin nyanmiɛn ble b'ɔ jaso tianmaan'n nun ɔ kan ndɛ kleli be. Ndɛ ng'ɔ kan kleli be'n, ɔ nin mmla ng'ɔ fa mannin be'n, be niannin su.

⁸ Anannganman e Nyanmiɛn, ɔ bɔbɔ yɛ a tɛli be su nin-ɔn. A kleli be kɛ a ti Nyanmiɛn kun bɔ a tra wɔ anwlɛn, a yaci sa cɛ, sanngɛ kusu a tu be fɔ be sa tɛ bɔ be yo'n ti.

⁹ An `yi Anannganman e Nyanmiɛn'n i ayɛ. An `koto i oka'n su, afin Anannganman e Nyanmiɛn'n i nzuɛn'n nin klɔ sran liɛ'n ti-man kun.