Jue Mun 97 - NYANMIƐN NDƐ'N 1998

Aklunjuɛ ng'ɔ wo asiɛ wunmuan'n su'n

¹ Anannganman ti famiɛn, man asiɛ'n sufuɛ'm be kwlaa be si able. Man nvlefuɛ nga be tran jenvie'n nuan mmua-mmua lɔ'n be klun jɔ!

² Nyanmiɛn ble kun bo sin yiɛ i. Sa nuan su yolɛ'n nin ndɛ nanwlɛ dilɛ'n bé su yɛ i sielɛ'n taka-a.

³ Sin kun dun mmua i nyrun. Sin sɔ'n ɔ di i kpɔfuɛ'm be kwlaa sin yiɛ i.

⁴ Kɛ ɔ yo bɔ nyanmiɛn'n kpa sin'n, ɔ kpaja mɛn'n nun. Kɛ asiɛ'n sufuɛ'm be wun i'n, be usu tututu.

⁵ Oka'm be klo Anannganman b'ɔ ti asiɛ wunmuan'n i Min'n i nyrun kɛ ngo'n sa.

⁶ Sɛ nyanmiɛn'n b'ɔ la nglo lɔ plaii'n ti sran'n, wuun n ´se kɛ ɔ kɛn i sa b'ɔ yo i nuan su'n i ndɛ. I nyrun nyannyannyan'n yo nvlefuɛ'm be kwlaa be nyɛnmɛn.

⁷ Be nga waka sran mun yɛ be sɔ be'n, bɔ be manman ninnge finfin mun'n, be ´wun nyannzuɛn. Ɔ lɛ-man amuɛn kun b'ɔ bu-man Nyanmiɛn like-ɔ.

⁸ Ee Anannganman, kɛ Siɔnfuɛ mun nin Zida klɔ'm be sufuɛ mun be ti jɔlɛ nga a di be'n, be klun jɔ dan.

⁹ Afin wɔ Anannganman, like fi nun-man ɔ sin asiɛ'n su wa. Ɔ dan tra amuɛn mun fatifatifati.

¹⁰ Amun bɔ an klo Anannganman'n, an `kpɔ sa tɛ'n. Ɔ sasa i sufuɛ nanwlɛfuɛ'm be nguan'n. Ɔ de be klunwifuɛ'm bé sa nun .

¹¹ Be nga Nyanmiɛn bu be sran kpa'n, be liɛ'n kannin kun kpaja sin yia be. Be nga be anwlɛn'n nun ti weiin, aklunjuɛ'n ti be liɛ.

¹² Amun nga Anannganman bu amun sran kpa'n, man amun klun jɔ i dunman nun. An `bo flɛ i, afin i nzuɛn'n nin klɔ sran liɛ'n ti-man kun.