Jue Mun 96 - NYANMIƐN NDƐ'N 1998

Famiɛn ng'ɔ su ba'n i nun sɔlɛ jue

¹ Amun `to jue uflɛ-uflɛ be manman Anannganman! Asiɛ wunmuan'n su sran mun, amun `to jue be manman Anannganman.

² Amun `to jue be manman Anannganman Amun `lɛ i ase. Ɔ ti defuɛ, amun `kɛn i jasin fɛ'n cɛn kwlaa.

³ Amun `kɛn i nyrun b'ɔ lɛ i'n i ndɛ sin nvle-nvle'm be kwlaa nun. Amun `kɛn i abonuan sa mun kle sran'm be kwlaa.

⁴ Afin ɔ ti dan, ɔ nin manmanlɛ fata. Ɔ yo sro tra amuɛn'm be kwlaa .

⁵ Afin nvle-nvlefuɛ'm be amuɛn'm be ti ato ninnge mun. Anannganman yɛ ɔ yili nglo lɔ nin-ɔn.

⁶ Ɔ ti dan sakpa, ɔ nin sulɛ fata. Kan ɔ tran lɛ'n ɔ ti kpajawa yɛiin, yɛ ɔ yi i fanngan'n i nglo lɛ.

⁷ Asiɛ'n sufuɛ mun kwlaa, amun `manman Anannganman, amun `kɛn i nyrun b'ɔ lɛ i'n ɔ nin i kwlalɛ b'ɔ kwla'n be ndɛ man sran'm be ti.

⁸ Amun `bo flɛ i, i nyrun nyannyan'n ti. Ninnge nga an ´fa cɛ i'n, amun `fa ko mɛn i i awlo'n klun lɔ.

⁹ Kɛ ɔ yi i wun nglo nyannyan'n, amun `koto i bo. Asiɛ'n sufuɛ mun kwlaa, kɛ amun o i nyrun lɛ'n, amun `usu.

¹⁰ Amun `kan sin nvle-nvle'n kwlaa nun kɛ sielɛ'n ɔ ti Anannganman liɛ. Asiɛ'n kusu ti takawa kpa, ɔ su keje-man. Anannganman'n di nvlefuɛ'm be jɔlɛ kɛ ɔ fata'n sa .

¹¹ Man nglo lɔfuɛ'm be klun jɔ, yɛ man asiɛ'n sufuɛ'm bé wun kpaja be. Man jenvie'n nin i nun ninnge'n kwlaa be tɛ.

¹² Man bo mun nin kacɛ mun be nin be nun ninnge'm be kwlaa be klun jɔ. Man bo nun waka'm be kwlaa be kpan aklunjuɛ kpanlɛ kɛ sran mun sa

¹³ Anannganman nyrun! Afin ɔ su ba, ɔ wa di asiɛ'n sufuɛ'm be jɔlɛ. Ɔ wa di mɛn'n i nunfuɛ'm be jɔlɛ nin nanwlɛ. Ɔ wa siesie nvle'm be afiɛn klanman .