Jue Mun 94 - NYANMIƐN NDƐ'N 1998

Nyanmiɛn klo sa nuan su yolɛ'n

¹ Anannganman Nyanmiɛn bɔ a tu klunngbɔ'n, Nyanmiɛn bɔ a tu klunngbɔ'n, yi ɔ́ wun nglo.

² Wɔ yɛ a ti asiɛ'n sufuɛ'm be jɔlɛ difuɛ nin-ɔn, jaso! A nin be bɔ be yo bé wun dandan'n be `yia nun. Fa bé sa tɛ'n i ti akatua'n man be.

³ Ee Anannganman, cɛn onin ko nan klunwifuɛ'm b'a yaci able silɛ'n? ?Cɛn onin ko?

⁴ Bé nuan nun ndɛ'm be ti dandan ngunmin. Sa tɛ yofuɛ sɔ'm be yia be ti bé wun aniɛn .

⁵ Anannganman, be mianmian ɔ sran mun, be yo ɔ sran'm be tɛtɛ.

⁶ Be kun angboti bla mun nin aofuɛ mun, be kun aika ba mun.

⁷ Kpɛkuun be se kɛ: «Anannganman wun-man sa fi. Zakɔb Nyanmiɛn'n wun-man nun o!»

⁸ Sinnglinfuɛ tɛ mun, amun `nian amún wun kpa. ?Komofuɛ mun, blɛ onin ko yɛ amun ´si ngwlɛlɛ-ɔ?

⁹ ?Sran ng'ɔ sieli bé sukpɔ'n, be waan i bɔbɔ ti-man sa? ?Sran ng'ɔ yili be nyinma'n, be waan i bɔbɔ wun-man ase?

¹⁰ ?I b'ɔ tu nvlefuɛ'm be fɔ'n, ɔ kwla ijɔ-man be? ?I b'ɔ kle sran'm be ngwlɛlɛ'n, be waan ɔ lɛ-man akunndan?

¹¹ Anannganman si klɔ sran'm be klun akunndan mun, ɔ si kɛ akunndan sɔ'n be ti ngbɛn-ngbɛn ngunmin .

¹² Ee! Anannganman, sran nga a tu i fɔ'n, i liɛ su ti ye. Sran nga a fa ɔ mmla'n kle i ngwlɛlɛ'n, i liɛ su ti ye!

¹³ Kɛ nyrɛnnɛn'n tɔ i su'n, i akunndan'n sanngan-man. Sanngɛ klunwifuɛ i liɛ'n, be ´kpɛ kunman i bo.

¹⁴ Afin Anannganman yi-mɛn i sran'm be blo le. Ɔ yi-mɛn i sran'm be ase le.

¹⁵ Kannzɛ ɔ yo sɛ san sran nga ɔ'a yo-man sa'n i yɛ i ndɛ'n ɔ ´yo fɛ-ɔ, yɛ be kwlaa nga be anwlɛn'n ti sɛsɛ'n be ´jrɛn i sin.

¹⁶ ?N ´nyan wan yɛ ɔ nin klunwifuɛ'm be ´kun man min-ɔn? ?N ´nyan wan yɛ ɔ nin sa tɛ yofuɛ'm be ´yia nun man min-ɔn?

¹⁷ Ee! Sɛ Anannganman ɔ'a uka-man min'n, wuun n ɔli blɔlɔ nán ndɛ sa-a.

¹⁸ Kɛ n waan: «Ndɛ liɛ m'an tɔ o!» Kpɛkuun Anannganman, a suan min bo ɔ klun-ufue'n ti.

¹⁹ Blɛ bɔ min akunndan'n sanngan sa sunman ti'n, a fɔnvɔ min ɔ man n nyan aklunjuɛ.

²⁰ Jɔlɛ difuɛ tɛtɛ nga be kle sran'm be nyrɛnnɛn, sanngɛ wuun mmla'n wo bé sa nun, a nin bé bo ti-man kun.

²¹ Be nin sran kpa mun be lɛ i. Be bu sran nga ɔ'a yo-man sa'n i fɔ.

²² Sanngɛ Anannganman ti min fiawlɛ sua kpa. Min Nyanmiɛn'n ti kɛ yɛbuɛ sa, i yɛ n talo i yɛ n nyan fiawlɛ-ɔ.

²³ Ɔ ´fa bé sa tɛ'n yi be bɔbɔ bé ti su. Be bɔbɔ be klunwi'n ti, ɔ ´nunnun be Anannganman e Nyanmiɛn'n ɔ ´nunnun be.