Jue Mun 92 - NYANMIƐN NDƐ'N 1998

Anannganman nin manmanlɛ'n fata

1 Be to jue nga wunmiɛn-delɛ-cɛn'n nun.

¹ Be to jue nga wunmiɛn-delɛ-cɛn'n nun. Be waan:

² Anannganman, sɛ be manman wɔ-ɔ, ɔ nin i fata! Ee, wɔ bɔ like fi nun-man ɔ sin'n, sɛ be to jue be bo flɛ wɔ-ɔ, i su-ɔ!

³ Kɛ aliɛ'n ɔ ´cɛn cɛ bɔ be ´kan ɔ klun-ufue'n i ndɛ'n, yɛ kɔnguɛ bɔ be ´kan ɔ nanwlɛ bɔ a di i titi'n i ndɛ'n

⁴ wuun be bo jru annzɛ sanngo'n, annzɛ aluku'n, i sɔ'n ti kpa o!

⁵ Ee Anannganman, sa nga a yo be'n be yo min fɛ dan, i ti m bo ndɛ.

⁶ Ee Anannganman, ɔ́ sa nuan ninnge'm be ti dandan, wɔ akunndan'm bé bo'n ti kploun.

⁷ Sran ng'ɔ wun-man sa wlɛ'n, ɔ bu-mɛn i like fi, sinnglinfuɛ'n ɔ wun-mɛn i sin.

⁸ Man klunwifuɛ'm be nyin kɛ ijre sa, man sa tɛ yofuɛ'm be kwlaa be kpuke kɛ waka nnyrɛ sa, sanngɛ be ´nunnun mlɔnmlɔnmlɔn.

⁹ Sanngɛ wɔ liɛ'n, Anannganman kɛ a o nglo lɔ'n yɛ a wo-ɔ.

¹⁰ Ɔ kpɔfuɛ'm be kusu be liɛ'n, be wa wu, ɔ kpɔfuɛ'm be ´wu. Sa sukusuku yofuɛ'm be ´bo sanndi.

¹¹ A man min wunmiɛn kɛ awuɛ'n i liɛ'n sa, a gua min ti su ngo mɔnnɛn.

¹² N wun min kpɔfuɛ'm be kwlaa be tɔlɛ'n nun, n ti be nga be yo min sa tɛ'n be kpanlɛ'n.

¹³ Sran nga Nyanmiɛn bu be sran kpa'n, be nyin flololo kɛ mme'n sa, be trɛ kɛ Liban lɔ sɛdri waka'n sa.

¹⁴ Be ti kɛ waka bɔ b'a ta be Anannganman i awlo'n nun'n sa. Be nnyrɛ'n ɔ kpuke Nyanmiɛn i lika'n nun.

¹⁵ Kannzɛ be ´yo kpɛnngbɛn o, be tɛ su mma, nzue tɛ o be nun, yɛ be tɛ yo mlanmlanmlan.

¹⁶ Ɔ kle kɛ Anannganman yo sa i nuan su. Ɔ kle kɛ i b'ɔ ti kɛ yɛbuɛ sa bɔ n talo i'n, ɔ yo-man gblɛgblɛ sa mun.