Jue Mun 91 - NYANMIƐN NDƐ'N 1998

Nyanmiɛn'n bɔ like fi nun-mɛn i sin'n i sran sasalɛ

¹ Sran ng'ɔ ko fia Nyanmiɛn bɔ like fi nun-mɛn i sin'n i sin'n, wuun ɔ'a tran Nyanmiɛn b'ɔ kwla like kwlaa yo'n i fɔnvɔ'n nun.

² Ɔ fata kɛ sran sɔ'n se Anannganman kɛ: «A ti min fiawlɛ, a ti min fiawlɛ sua, a ti min Nyanmiɛn, ɔ su yɛ n fa n wla'n n gua-a!»

³ Anannganman yɛ ɔ ´de wɔ ɔ́ wun aya suafuɛ'm bé sa nun-ɔn. I yɛ ɔ ´de wɔ nguan'n, yɛ man tukpacɛ b'ɔ sa ndɛndɛ'n su kun-man wɔ-ɔ.

⁴ Ɔ ´sasa wɔ, a ´nyan fiawlɛ i sin kɛ akɔwa'n nyan fiawlɛ i nin'n i ndɛwa'n bo'n sa. I nanwlɛ'n b'ɔ di'n ti kɛ nyrɛn b'ɔ sasa sran'n sa, yɛ ɔ ti kɛ like kokloko bɔ be fa kata be wue'n su'n sa.

⁵ Srɛ su kun-man wɔ like fi wun. A su sro-man sa sroesroe nga be ju kɔnguɛ annzɛ cua nga be to be wia nun'n mun.

⁶ Srɛ su kun-man wɔ tukpacɛ b'ɔ sa ndɛndɛ b'ɔ wlan sin aosin nun'n i wun, yɛ srɛ su kun-man wɔ sa kekle bɔ be tu sin wia kpa'n nun'n bé wun.

⁷ Kannzɛ sran akpi be ´tɔ ɔ́ wun koko lɛ'n, kannzɛ sran akpi blu (10.000) be ´tɔ ɔ́ sa fama su lɛ'n, like fi su nyan-man wɔ.

⁸ Ɔli sie ɔ́ nyin ase diin nan nian, a wa wun kɛ Nyanmiɛn fa tannin klunwifuɛ'm be kalɛ ju'n.

⁹ Afin Anannganman yɛ ɔ ti ɔ fiawlɛ-ɔ. Nyanmiɛn bɔ like fi nun-mɛn i sin'n, i sin yɛ a fia-a.

¹⁰ Sa tɛ fi su ju-man ɔ su, nyrɛnnɛn fi su wunnge-man wɔ awlo'n wun.

¹¹ Afin Anannganman ɔ ´se i anz'm be kɛ be sasa wɔ ajalɛ kwlaa nga a ´tu'n nun.

¹² Be ´sua wɔ bé sa su, kɛ ɔ ´yo nan ɔ́ ja ɔ'a kpla-man yɛbuɛ wie'n ti .

¹³ Sɛ a fu asɔmɔli wie annzɛ ɔnda wie su'n, like fi su yo-man wɔ. Sɛ a tia nnɛn wlɛfuɛ wie annzɛ wuo wie su'n, like fi su yo-man wɔ .

¹⁴ Anannganman waan: «Ɔ klo min, i sɔ'n ti n ´fɛ i n ´fia, n ´sɛsɛ i afin ɔ si min.

¹⁵ Sɛ ɔ kpan flɛ min'n, n ´tɛ i su, Sɛ ɔ o nyrɛnnɛn nun'n, e nin i-ɔ.

¹⁶ M ´mɛn i nguan tɛnndɛn man i klun'n ´jɔ, ɔ ´wun i kɛ n ti i defuɛ.»