Jue Mun 90 - NYANMIƐN NDƐ'N 1998

FLUWA I BUE NNAN SU ( Jue 90—106 ) Sran i nguan'n i tika b'ɔ ti'n

¹ Moiz b'ɔ ti Nyanmiɛn sunmanfuɛ'n i srɛlɛ b'ɔ srɛli'n. I waan: Min Min, kɛ ɔ fɛ i e nannan'm be blɛ su lele b'ɔ ´ju e blɛ liɛ'n su yɛ'n, a yoli e fiawlɛ tititi.

² I sin nan b'a wun oka mun mɛn'n nun'n, nan mɛn'n bɔbɔ ɔ'a bo i bo'n, wuun a ti Nyanmiɛn, a ´ka sɔ tititi.

³ Wɔ yɛ man sran sɛ i sin asiɛ'n bo lɔ-ɔ. A se klɔ sran'n kɛ: «Sa ɔ́ sin kan a fin lɔ ba'n!»

⁴ Ɔ liɛ'n, afuɛ akpi ti ɔ nyrun kɛ anunman aliɛ b'ɔ cɛnnin bɔ ɔ'a sin'n sa, annzɛ kusu ɔ ti kɛ kɔnguɛ sin kan sa .

⁵ A yo man sran i nguan'n ɔ sin kɛ aliɛ njɛnniɛn lafilɛ'n sa. A yo man ɔ sin kɛ ijre'n sa,

⁶ Ijre'n nyin, ɔ bo nnyrɛ nglɛmun nun, kpɛkuun nnɔsua nun ɔ glɔ, i sin ɔ wu kee.

⁷ Kɛ a fa ya'n, é wun glɔ ye. Kɛ ɔ ya'n ko yo dan'n, srɛ kun-man e ngowa.

⁸ A fa e sa tɛ mun fite wein nun. Ɔ nyrun'n b'ɔ ti kɛ kannin sa'n, ɔ yi e nvialiɛ nun sa'm be nglo.

⁹ Ɔ ya'n ti, e nguan'n ti juɛɛ kan sa. E nyin bɔ e ´bo i-ɔ, ɔ'a wie kɛ aunngban fɛɛ kan wie sa .

¹⁰ Sɛ be waan y'a cɛ o, wuun y'a di afuɛ ableso. Be nga be lɛ wunmiɛn kpa'n be kwla di afuɛ ablaɔcuɛ. Sanngɛ afɛ nin nyrɛnnɛn ngunmin yɛ e wun i-ɔ. E nguan'n sin ndɛndɛ, wie'n fa e ndɛndɛ.

¹¹ ?Wan yɛ ɔ kwla si kɛ ɔ ya'n i dan'n fa ti ju-ɔ? ?Wan yɛ ɔ kwla wun ɔ ya'n i wlɛ b'ɔ man i nyin yi wɔ kɛ ɔ fata'n sa-a?

¹² Yo man e si kɛ e nguan nyanman'n ti tika kpa, kpɛkuun i liɛ'n, e ´si ngwlɛlɛ.

¹³ ?Anannganman, nan kɛ a ´fa é wun ya sa tititi? Kpɛ ɔ́ nyin é su, e ti ɔ sufuɛ, si ye aunnvuɛ.

¹⁴ Bo e ye yolɛ'n bo nglɛmun ndɛ kpa'n, nan cɛn kwlaa é wun `fa e feke, nan e klun jɔ.

¹⁵ Blɛ'n kwlaa nga a fa sokpali ye'n, man e klun jɔ ju sɔ. Blɛ'n kwlaa nga e fa wunnin e nyrun'n, man e klun jɔ ju sɔ.

¹⁶ Junman nga a di'n, man i nyin fite nan ɔ sufuɛ'm be wun i, nan e mma'm be kusu be wun kɛ a ti dan sakpa.

¹⁷ Anannganman e Nyanmiɛn, yo man e wun kɛ a klo ye. Man e junman'm bé nuan ninnge'm be cɛ. Man e junman'm bé nuan ninnge'm be cɛ sakpa.