Jue Mun 9 - NYANMIƐN NDƐ'N 1998

Be kpɔfuɛ'm be kwlalɛ'n i su jue

1 Jue nga ti David liɛ. Ɔ o jue tofuɛ'm be su kpɛn'n i fluwa'm be nun wie. I waan sɛ be ´to'n, be `man be aniɛn'n su.

¹ Jue nga ti David liɛ. Ɔ o jue tofuɛ'm be su kpɛn'n i fluwa'm be nun wie. I waan sɛ be ´to'n, be `man be aniɛn'n su. I waan:

² Anannganman, n ´tu n klun m ´manman wɔ, n ´kan abonuan sa nga a yoli be'n i kwlakwla.

³ Wɔ ti n klun jɔ, wɔ ti min wun kpaja min. Nyanmiɛn, wɔ bɔ like fi nun-man wɔ sin'n, m ´bo flɛ wɔ.

⁴ Min kpɔfuɛ mun b'a kaci bé sin, be su kɔ. Kɛ be wun wɔ'n, srɛ kun be, bé wun usu be, kpɛkuun b'a tɔ b'a wu.

⁵ A buli min ndɛ'n klanman, afin min ndɛ yo fɛ. A ti ɔ famiɛn bia'n su yɛ a di jɔlɛ nin-ɔn, a bu-man ndɛ kwlɛ.

⁶ A tu be bɔ be su-man wɔ'n be fɔ. A nunnun sa tɛ yofuɛ sɔ mun. A yo man be dunman'n ɔ mlin mlɔnmlɔnmlɔn.

⁷ Min kpɔfuɛ'm b'a tu lɛ siɛn'n. Be tranwlɛ'm b'a nunnun treketreke. Be klɔ nga a sacili be'n, be bo-man be su be di-man jɔlɛ kun.

⁸ Anannganman i sielɛ'n ɔ lɛ-man awieliɛ. Jɔlɛ dilɛ'n i dunman nun ti ɔ'a taka i famiɛn bia'n .

⁹ Ɔ di mɛn nunfuɛ'm be jɔlɛ weinwein. Ɔ kan be ndɛ mun ɔ nin nanwlɛ .

¹⁰ Anannganman ti be nga be mian-mian be'n be fiawlɛ. Sɛ nyrɛnnɛn tɔ be su-ɔ, i yɛ be talo i-ɔ.

¹¹ Be nga be si wafa bɔ a ti'n, be fa bé wun wla ɔ sa nun. Afin Anannganman, be bɔ be fa bé wun man wɔ'n, a yi-man be ase .

¹² Amun `to jue be manman Anannganman b'ɔ tran Siɔn'n. Amun `bo sa dandan ng'ɔ yo be'n be jɔ sin nvle-nvle'm be nun.

¹³ Ɔ nin be bɔ be gua mmoja ase'n be lɛ i, i wla fi-man be nga be kun be'n be kpanlɛ'n.

¹⁴ Anannganman, si min aunnvuɛ, nian nyrɛnnɛn bɔ min kpɔfuɛ mun b'a fa min b'a yi nun-ɔn. Yo man n fin wie'n i sa nun n fite.

¹⁵ Yɛ n ´kan like fanunfanun nga a yo mannin min'n i kwlaa. N ´kan be sran'm be afiɛn Siɔn wa. Kpɛkuun n ´di delɛ nga a deli min'n i ti aklunjuɛ.

¹⁶ Nvle-nvle nga be nun sran'm be si-man wɔ'n, b'a tɔ kunman nga be bɔbɔ be kpɛli'n nun. Aya nga be fia be suali'n, ɔ'a yaci ɔ'a tra be bɔbɔ.

¹⁷ Anannganman ɔ'a fa wafa ng'ɔ ti'n ɔ'a kle, ɔ di jɔlɛ weinwein. Anannganman man sa tɛ yofuɛ'n ɔ'a tɔ aya nga i bɔbɔ suali'n nun.

¹⁸ Man sa tɛ yofuɛ'm be wu wɔ blɔlɔ, afin bé wla fi Nyanmiɛn.

¹⁹ Anannganman wla fi-man nyrɛnnɛnfuɛ mun, yalɛfuɛ'm be lɛ bé wla ase guawlɛ tititi.

²⁰ Anannganman, jaso! Nán man klɔ sran'n ɔ kwla! Fa nvle-nvlefuɛ mun jran ɔ nyrun lɛ nan di be jɔlɛ.

²¹ Anannganman, wla be srɛ, Man nvle-nvle'm be nun sran mun be si kɛ sran ngbɛn yɛlɛ be.