Jue Mun 89 - NYANMIƐN NDƐ'N 1998

?Ninnge nga Nyanmiɛn waan ɔ ´yo man David'n be o nin?

1 Jue nga ti Etan b'ɔ ti Ɛzrafuɛ'n i liɛ.

¹ Jue nga ti Etan b'ɔ ti Ɛzrafuɛ'n i liɛ. I waan:

² Anannganman, n ´to jue n ´fa kan ɔ klun-ufue'n i wun ndɛ. N ´kan ɔ nanwlɛ bɔ a di i titi'n i wun ndɛ n kle sran akpasua nga be wa jaso su'n.

³ Afin n kɛn i kɛ ɔ klun-ufue'n lɛ-man kpɛbo, yɛ ɔ nanwlɛ bɔ a di'n ɔ wie-man nyanmiɛn su lɔ.

⁴ A kannin kɛ: «N fua n kleli sran nga n kpɛli i'n, n tali David b'ɔ ti min sufuɛ'n i nda kɛ:

⁵ ‹Kɛ ɔ osu'n wo lɛ'n yɛ ɔ wo-ɔ, n ´fa famiɛn bia'n m ´man ɔ osu'n nunfuɛ mun, ɔ ´yo be liɛ tititi .› »

⁶ Anannganman, anz'm be bo flɛ wɔ abonuan sa bɔ a yo be'n ti. Be nga be ti ɔ liɛ'n be anyia nun'n, be yi wɔ ayɛ ɔ nanwlɛ bɔ a di i titi'n ti.

⁷ ?Anannganman, nyanmiɛn su lɔ'n, wan cɛ yɛ ɔ nin wɔ sɛ-ɔ? ?Amuɛn'm be nun'n, onin cɛ yɛ ɔ fɛ i wun sunnzun wɔ-ɔ ɔ yo ye-ɔ?

⁸ Be nga be o nyanmiɛn su lɔ'n, Nyanmiɛn ti dan tra be ngba. Ɔ wun sran'm be sa ɔ nyan.

⁹ ?Anannganman, wɔ bɔ a ti Nyanmiɛn bɔ a sie mɛn wunmuan'n, wan cɛ yɛ ɔ kwla kɛ wɔ sa-a? A ti nanwlɛfuɛ tititi sa kwlaa nun.

¹⁰ Kɛ jenvie'n jaso'n, ɔ waan ɔ su nyinmɛn-nyinmɛn i wun sa, wɔ yɛ a kɛn i ase-ɔ. Kɛ ɔ ´bo'n b'ɔ ko jaso kendengleiin, wɔ yɛ man ɔ guɛ i wun sa ase-ɔ.

¹¹ Wɔ yɛ a wɛtɛli nnɛn sroesroe nga be flɛ Raab nin-ɔn, wɔ man ɔ kpɔfuɛ'm be bo sanndili ɔ fanngan dan'n ti.

¹² Nyanmiɛn su lɔ'n ti ɔ liɛ, asiɛ'n kusu ti ɔ liɛ. Wɔ yɛ a boli mɛn wunmuan'n ɔ nin i nun ninnge'n kwlakwla-a.

¹³ Wɔ yɛ a yili mɛn'n i ja ngua'n nin i nglo lɔ nin-ɔn. Tabɔr oka'n nin Ɛrmɔn oka'n be su tranfuɛ'm be bo sro be yi be aklunjuɛ'n i nglo kle wɔ.

¹⁴ A lɛ wunmiɛn, a kwla, a man ɔ sa fama'n su nglo .

¹⁵ Ɔ famiɛn bia'n taka ndɛ nanwlɛ bulɛ nin mmla'n i su falɛ'n su. A yi ɔ klun-ufue'n nin ɔ nanwlɛ bɔ a di'n be nglo sa kwlaa nun.

¹⁶ Sran nga be bo sro be yi be aklunjuɛ nglo be kle wɔ'n, be liɛ su ti ye! Be sɔfuɛ mun'n, ɔ nyrun'n ti kɛ kannin sa yɛ ɔ kpaja be nyrun-ɔn.

¹⁷ Kɛ a ti be Nyanmiɛn'n ti bé wun kpaja be cɛn'n kwlaa. Ɔ sa nuan su bɔ a yo'n ti be lɛ kɔmin.

¹⁸ Afin wɔ yɛ a man be fanngan dan nin-ɔn. Ɔ ukalɛ bɔ a uka ye'n yɛ man e kwla-a.

¹⁹ Anannganman, wɔ bɔ a ti Izraɛl Nyanmiɛn'n, bɔ a ti e famiɛn'n, sran ng'ɔ sasa ye'n, wɔ yɛ a kpɛli i-ɔ.

²⁰ Le kun a kannin ndɛ kun kleli ɔ sufuɛ nanwlɛfuɛ mun aolia nun. A waan: «N suannin safunyrɛn kun bo, n niannin nvle'n nun m mannin gbanflɛn kun su.

²¹ David b'ɔ ti min sufuɛ'n yɛ n wunnin i-ɔ. N fali min ngo'n n guɛli i ti su.

²² N ´trɛ i nun kekle kpa. N ´wlɛ i nun wunmiɛn.

²³ I kpɔfuɛ'n ɔ su fu-mɛn i nun. Sran tɛ su guɛ-mɛn i nyin ase.

²⁴ N ´nunkun i kpɔfuɛ'n i bɔbɔ i nyrun lɛ. N ´kle be bɔ be kpɔ i'n be nun.

²⁵ N su kpɔci-mɛn i mlɔnmlɔn le. N su yaci-mɛn i kpa yolɛ le. N ´yo man i wunmiɛn'n ɔ ´uka su tititi.

²⁶ N ´yo man ɔ ´sie jenvie'n nin nzue ba mun.

²⁷ Ɔ ´kpan flɛ min ´se kɛ: ‹Min si yɛlɛ wɔ, a ti min Nyanmiɛn, a ti kɛ yɛbuɛ sa, wɔ yɛ n talo wɔ yɛ n nyan n ti-ɔ.›

²⁸ Min kusu n ´fɛ i n yo kɛ mín wa klikli sa. N ´yo man i yɛ ɔ ´yo asiɛ'n su famiɛn'm be kwlakwla be nun dan nin-ɔn.

²⁹ N su yaci-mɛn i kpa yolɛ le nan kɛ ɔ ´yo-ɔ ɔ'a yo. E nin i e ´tra aenguɛ tankaan kpa.

³⁰ N ´yo man i osu'n su nunnun-man le. Sɛ i osu'n nunfuɛ ´tu famiɛn bia'n su'n, wuun nyanmiɛn'n b'ɔ la nglo lɔ plaii'n ɔ'a sin.

³¹ Sɛ i osu'n nunfuɛ nga be wa jaso su'n be yi min mmla'n i ase'n, sɛ be fa-man ndɛ nga n kan'n su'n,

³² sɛ be fa-man ndɛ nga n kan kle be'n be su'n nan be fa-man min mmla'm be su'n ,

³³ bé nyin kekle'n ti'n, n ´fa ngble m bo be, yɛ n ´tu be fɔ be fɔnlɛ'n ti.

³⁴ Sanngɛ nán kɛ n su yo-man be kpa kun ti-ɔ. N su kaci-man, like nga min waan n ´yo man be'n san n ´yo.

³⁵ Nán kɛ n su yo-man nda nga n tali'n i nuan like ti-ɔ. N su kaci-man ndɛ ng'ɔ fin mín nuan fiteli'n.

³⁶ M bɔbɔ min Nyanmiɛn n tali nda. ?N ´kaci aniɛn David wun sɛ?

³⁷ I osu'n ´tran lɛ tititi. Sɛ i osu'n nunfuɛ ´tu famiɛn bia'n su'n, wuun wia'n nun-man lɛ kun.

³⁸ Sɛ ɔ ´tu lɛ'n, wuun anglo'n ɔ'a tu lɛ. Anglo'n b'ɔ o nyanmiɛn ble'n sin lɔ'n yɛ ɔ ti e lalofuɛ-ɔ.»

³⁹ I sɔ'n kpɛkuun a bua-man sran'n bɔ a fɛli i sieli famiɛn'n i ndɛ nun kun, w'a yi i ase, w'a fɛ i wun ya.

⁴⁰ Nda nga a tali ɔ sufuɛ'n, w'a yo-mɛn i su like'n. A mɛnnin i famiɛn kle'n su a yili i ase, kle sɔ'n a yoli i wannzo.

⁴¹ A fitifitili i klɔ'n i wun talɛ'n. A bubuli i fiawlɛ sua mun.

⁴² Be nga be ´sin'n, be fɛn i bo ninnge'n. Be nga be lika'n mɛntɛn i liɛ'n, be srisri i.

⁴³ A wlɛli i kpɔfuɛ'm be fanngan. A yoli man be bɔ be klo-mɛn i sa'n be klun jɔli.

⁴⁴ A yoli man i tokofi'n trili. A jrɛn-mɛn i sin alɛ'n nun.

⁴⁵ A yoli man i anyrunnyan'n wieli. A suli i famiɛn bia'n bo yili i ase.

⁴⁶ Wɔ man ɔ yoli oke i gbanflɛn nun. A guɛli i nyin ase.

⁴⁷ ?Anannganman, cɛn onin ko yɛ a ´yaci é wun fialɛ-ɔ? ?Cɛn onin ko yɛ a ´yaci e wun ya falɛ kekle nin-ɔn?

⁴⁸ Man ɔ nyin kpɛn mín su, sran i nguan'n ti tika. A yili sran'n kɛ ɔ `wu.

⁴⁹ ?Sran kun o lɛ b'ɔ ´ka lɛ tititi b'ɔ su wu-man le-ɔ? ?Sran kun o lɛ b'ɔ su kɔ-man blɔlɔ lɔ le-ɔ?

⁵⁰ ?Min Min, sa kpakpa nga a yo be laa'n be o nin? A di nanwlɛ titi, i ti a kannin kɛ a ´yo sa sɔ mun man David. ?Be o nin?

⁵¹ Min Min, nán ɔ́ wla fi kuakualɛ nga be kuakuali ɔ sufuɛ mun'n su. A si kɛ mín ti su yɛ nyannzuɛn sɔ'n i kwlakwla taka-a.

⁵² Anannganman, nán ɔ wla fi nzowa nga ɔ kpɔfuɛ'm be kpɛ sran nga a kpali i fa sieli famiɛn'n. Be kpɛli i lelele.

⁵³ Man e la Anannganman i ase tititi! Man ɔ yo sɔ!