Jue Mun 88 - NYANMIƐN NDƐ'N 1998

E nin wulɛ'n y'a mantan koko

¹ Jue nga ti Kɔre i sran'm be liɛ. Ɔ o jue tofuɛ'm be su kpɛn'n i fluwa'm be nun wie. Kɛ be ´to'n, be bo blo. Be waan Eman b'ɔ ti Ɛzrafuɛ'n i jue-ɔ.

² Be waan: Anannganman Nyanmiɛn, wɔ bɔ a ti min defuɛ'n, n kpan flɛ wɔ kɔnguɛ nin wia su.

³ Sɔ min srɛlɛ'n nun, sie ɔ́ su min klun ndɛ bɔ n kpan n kan'n i bo.

⁴ Afin m'an wun nyrɛnnɛn'n lele m'an fɛ, e nin wie'n y'a mantan koko.

⁵ Be ka min wlɛ i be nga bɔ be liɛ ɔ'a wie'n be nun. N ti kɛ sran b'ɔ kwlɛ-mɛn i wun keje kun'n sa.

⁶ N la sran nga b'a wu'n be afiɛn. N ti kɛ fuɛn bɔ b'a sie be asieliɛ kunman nun'n sa. Yɛ n ti kɛ be nga ɔ́ wla kpɛn-man bé su kun nan se kɛ like yɛ a ´yo man be'n be sa.

⁷ A fa min a yi kunman dan bɔ be si-mɛn i bo'n nun, a fa min a yi wie'n i aosin tikitiki'n nun.

⁸ Ɔ ya dan'n wo min su sa mlɔnmlɔn nán sa yolɛ-ɔ. Sɛ ɔ ti nzue'n, wuun n ´se kɛ ɔ'a kata min su kplu.

⁹ W'a yo man min mantanfuɛ'm be kwlaa b'a wanndi min. Min wun yo be tɛ siɛn'n. Sɛ nyrɛnnɛn'n ti anuan'n, wuun n se kɛ ɔ'a nyin min su, n kwla fite-man.

¹⁰ Nyrɛnnɛn'n dunman nun ti min nyinma'n ɔ'a kata. Ee Anannganman, cɛn kwlakwla n kpan flɛ wɔ. M man mín sa'm be su nglo n flɛ wɔ.

¹¹ ?Be nga b'a wu'n, a yi atrɛ man be? ?Fuɛn'm be ´jaso be ´manman wɔ?

¹² ?Ndia nun lɔfuɛ'm be wa kan wɔ aklunye'n i ndɛ? ?Kan be kɔ lɔ be ba-man'n, be wa kan ɔ nanwlɛ bɔ a di i titi'n i ndɛ lɔ?

¹³ ?Aosin tikitiki nun lɔ'n, be si wɔ abonuan sa nga a yo be'n? ?Awlafiɛ mɛn'n nun lɔ'n, be kwla wun kɛ a yo sa i nuan su?

¹⁴ Anannganman, wɔ yɛ n kpan flɛ wɔ kɛ a uka min nin-ɔn. Nglɛmun kwlaa e nin wɔ e ijɔ yɛ n srɛ wɔ like.

¹⁵ ?Anannganman, ɔ yo sɛ ti yɛ a yi min blo-ɔ? ?Ɔ yo sɛ ti yɛ a kunndɛ-man kɛ a wun min nin-ɔn ?

¹⁶ Kɛ ɔ fɛ i min kaan nun lele b'ɔ ´fa ju ndɛ yɛ'n, n wo nyrɛnnɛn nun. E nin wie'n e mantan koko tititi. Sa sroesroe mun yɛ a fa yi min su-ɔ, min anwlɛn'n ɔ ti sannganwa.

¹⁷ Ɔ ya dan'n wo min su. Sa kekleekle nga a fa be yo min'n ti man n kwla uke-man min nuan n kan-man ndɛ.

¹⁸ Sa sɔ'm be ti kɛ nzue sa, be tɔ mín su cɛn kwlaa, be mɛn min.

¹⁹ Min janvuɛ mun nin be bɔ e nin be e san nun'n a fuan be mín wun. Siɛn'n, be flɛ kɛ aosin'n yɛ ɔ nin min o nun-ɔn.