Jue Mun 86 - NYANMIƐN NDƐ'N 1998

David i Si Nyanmiɛn i srɛlɛ

¹ Anannganman, sie ɔ su mín nuan bo, tɛ min su! Afin n ti yalɛfuɛ, nán like fi yɛ n lɛ i-ɔ.

² Wɔ, min Nyanmiɛn, sasa min nguan'n, afin n ti ɔ liɛ mlɔnmlɔnmlɔn. De min bɔ n ti ɔ sufuɛ'n, n fa min wla'n gua ɔ su.

³ Min Min, si min aunnvuɛ, afin wɔ cɛ yɛ n flɛ wɔ titi-ɔ.

⁴ Min Min, ɔ su yɛ n kpɛ mín nyin-ɔn, n srɛ wɔ, yo man min klun jɔ.

⁵ Afin min Min, ɔ klun ti kpa, a yaci sran wun sa cɛ i. Be nga be kpan flɛ wɔ'n, a yi wɔ aklunye'n i nglo kle be.

⁶ Anannganman, sie ɔ su min srɛlɛ'n bo. Kɛ n kpata wɔ'n, sie ɔ su.

⁷ Kɛ n wo nyrɛnnɛn nun'n, n kpan flɛ wɔ, afin n si kɛ a ´tɛ min su.

⁸ Min Min, amuɛn fi ti-man kɛ wɔ sa! Ɔ ninnge nga a yili be'n be lɛ-man wunsu.

⁹ Min Min, wɔ yɛ a yili nvle-nvlefuɛ'm be kwlaa-a. Be wa ba, be wa koto ɔ bo, be ´bo flɛ wɔ ɔ nyrun nyannyan'n ti.

¹⁰ Afin a ti kpli, a yo abonuan sa mun. Wɔ kunngba wɔ yɛ a ti Nyanmiɛn nin-ɔn.

¹¹ Anannganman, kle min atin nga n ko fa su'n. Min nyin ´yi wɔ tititi. Man min anwlɛn b'ɔ ti wɛtɛɛ. Man min nyin yi wɔ.

¹² Min Min, min Nyanmiɛn n ´tu min klun m ´manman wɔ. M ´bo n flɛ wɔ cɛn kwlakwla.

¹³ Wɔ aklunye'n ti dan min lika. A deli min wie'n i nuan nun.

¹⁴ Ee Nyanmiɛn, be bɔ be tu bé wun'n b'a jaso mín wun. Sa tɛtɛ yofuɛ'm bé bo a yo kun, be kunndɛ kɛ be ´kun min. Be bu-man wɔ akunndan kaan sa.

¹⁵ Sanngɛ min Min, ɔ liɛ'n, a ti Nyanmiɛn kun b'ɔ a si aunnvuɛ, a fa-man ya ndɛndɛ. Wɔ aklunye'n ti dan, a ti nanwlɛfuɛ tititi.

¹⁶ Kpɛ ɔ nyin min su, yɛ si min aunnvuɛ. Ɔ sufuɛ yɛlɛ min. Fa ɔ wunmiɛn'n wie wla min nun. N ti wɔ liɛ, de min.

¹⁷ Yo sa kun b'ɔ kle kɛ min wun sa'n kwlaa ɔ ´yo ye. Min Min, kɛ min kpɔfuɛ'm be wun kɛ w'a de min nan w'a fɔnvɔ min'n, man be wun nyannzuɛn.