Jue Mun 85 - NYANMIƐN NDƐ'N 1998

Aunjuɛ'n i ndɛ nga Nyanmiɛn kan'n

1 Jue nga ti Kɔre i sran'm be liɛ. Ɔ o jue tofuɛ'm be su kpɛn'n i fluwa'm be nun wie.

¹ Jue nga ti Kɔre i sran'm be liɛ. Ɔ o jue tofuɛ'm be su kpɛn'n i fluwa'm be nun wie. Be waan:

² Ee Anannganman, a yo mɛn ng'ɔ ti ɔ liɛ'n i nunfuɛ'm be ye dan, wɔ man Zakɔb i osu'n nunfuɛ mun bɔ be kacili kanga'n b'a sa bé sin b'a ba.

³ A sikeli ɔ sran'm bé ti su sa tɛ trɔ'n jinnin. A yacili bé wun sa'n cɛli be.

⁴ A guali ɔ ya'n kwlaa i ase, a yacili ɔ ya dan sɔ'n nun.

⁵ Anannganman e defuɛ, fa e sie e osu'n nun! Yaci e wun ya'n bɔ a fali'n nun.

⁶ ?Nan a ´ka é wun ya falɛ'n su sa tititi? ?A ´fa ɔ ya'n a ´gua akpasua nga be ´jaso su'n be su?

⁷ ?E bɔ e ti ɔ sran mun'n, nán wɔ yɛ man e sa e ´sin e ´nyan nguan ekun yɛ e klun jɔ-ɔ?

⁸ Anannganman, yi ɔ klun-ufue'n i nglo kle ye, yɛ de ye.

⁹ Sa nga Anannganman Nyanmiɛn kan'n, n ´tie. I waan ɔ ´yo man i nvle'n i nunfuɛ mun nin i sran nanwlɛfuɛ mun bé wun ´jɔ be fɔun kɛ ɔ ´yo nan b'a yo-man be sinnzin sa'n kun'n ti.

¹⁰ Nanwlɛ, be nga be sro i'n, ɔ ka kaan-an, ɔ wa uka be, kɛ ɔ ´yo nan i anyrunnyan'n ɔ'a tran e mɛn'n su'n ti.

¹¹ Sɛ e ´kwla se'n, klun-ufue yolɛ'n, nin nanwlɛ dilɛ'n be yia nun. Yɛ sa bɔ be yo i nuan su'n nin fɔun tranlɛ'n be ´ti bé wun aniɛn.

¹² Sɛ e ´kwla se'n, nanwlɛ dilɛ'n fifi asiɛ wun kɛ waka mma sa. Sa i nuan su yolɛ'n fin nglo lɔ yɛ ɔ ba-a.

¹³ Anannganman bɔbɔ yɛ ɔ ´man muae nin-ɔn, yɛ e asiɛ'n ɔ ´su mma kpa.

¹⁴ Sɛ e ´kwla se'n, kɛ e Min'n ´nanti kɔ'n, sa i nuan su yolɛ'n dun mmua i nyrun yɛ ɔ bo atin'n mɛn i-ɔ.