Jue Mun 84 - NYANMIƐN NDƐ'N 1998

Be nga be ba Nyanmiɛn srɛlɛ Zerizalɛm'n be jue'n

1 Jue nga ti Kɔre i sran'm be liɛ. Ɔ o jue tofuɛ'm be su kpɛn'n i fluwa'm be nun wie. Kɛ be ´to'n, be bo jru nga be yo be Gat lɔ'n wie.

¹ Jue nga ti Kɔre i sran'm be liɛ. Ɔ o jue tofuɛ'm be su kpɛn'n i fluwa'm be nun wie. Kɛ be ´to'n, be bo jru nga be yo be Gat lɔ'n wie. Be waan:

² Anannganman, wɔ bɔ a sie mɛn wunmuan'n, n klo ɔ sua nin o!

³ Kɛ n nian kwla wlu-man ɔ́ sua'n i awlo'n nun lɔ'n, kɛ min anwlɛn'n be min klun sa. M bo sro n yi min aklunjuɛ'n i nglo n kle Nyanmiɛn b'ɔ lafi-man'n.

⁴ Anannganman, wɔ bɔ a sie mɛn wunmuan'n, min famiɛn, min Nyanmiɛn, nian: ɔ liɛ ndrofia'm be bɔbɔ be lɛ sua, alialia'm be lɛ sua bɔ be sie be mma'm be nun ɔ sɔwlɛ'm be wun lɛ.

⁵ Be nga be tran ɔ sua'n nun lɔ'n bɔ be kwla manman wɔ cɛn kwlakwla'n, be liɛ su ti ye!

⁶ Be nga be fia ɔ sin'n, be liɛ su ti ye! Be atin nga be fa'n, bé su ti wein-wein.

⁷ Kɛ be sin sunlɛ kongo nun'n, kpɛkuun Nyanmiɛn kaci i nzue lika, yɛ nzue klikli ng'ɔ tɔ'n ɔ jranjran lika'm be nun.

⁸ Kɛ be ´nanti be kɔ Siɔn nan be ´ko wun Nyanmiɛn wun'n, wuun be wunmiɛn'n ɔ uka su kɔ i nyrun.

⁹ Anannganman, wɔ Nyanmiɛn bɔ a sie mɛn wunmuan'n, tie min srɛlɛ'n. Zakɔb Nyanmiɛn, sie ɔ su.

¹⁰ Ee Nyanmiɛn, wɔ bɔ a ti kɛ e nyrɛn sa'n, nian! Ɔ sran bɔ a kpɛli i fa sieli famiɛn'n, niɛn i nyrun.

¹¹ Nanwlɛ, sɛ be tran ɔ sua'n i awlo'n nun cɛn ba kunngba cɛ bɔbɔ'n, ɔ ti kpa tra kɛ b'a di cɛn akpi lika uflɛ'n. Sran nga be bu-man wɔ like fi'n, bɔ be bu-man ɔ nuan ndɛ'n i like fi'n, kɛ e nin be e ko tran'n, ɔ flunman kɛ n tran ɔ sua'n i anuan'n nun lɛ.

¹² Afin Anannganman Nyanmiɛn ti kɛ wia sa, yɛ ɔ sasa e kɛ nyrɛn sa. Anannganman yo sran ye, yɛ ɔ yo man sran nyrun ba nyan. Be nga be nantilɛ'n ti sein'n, Anannganman man ninnge kpakpa'n kwlaa ti sin yia be.

¹³ Anannganman, wɔ bɔ a sie mɛn wunmuan'n, be nga be fa be wla gua wɔ su'n, be liɛ su ti ye!