Jue Mun 83 - NYANMIƐN NDƐ'N 1998

Nyanmiɛn i nvle b'ɔ o nyrɛnnɛn nun'n i srɛlɛ

1 Jue nga ti Azaf liɛ.

¹ Jue nga ti Azaf liɛ. I waan:

² Ee, Nyanmiɛn, nán tran lɛ bliin sɔ! Ee Nyanmiɛn, nán muan ɔ nuan sɔ, nán tran ase de wunmiɛn.

³ Ɔ kpɔfuɛ'm be keje-man ngowa. Be nga be klo-man ɔ sa'n b'a man bé ti'n su.

⁴ Be cici ɔ sran mun bé wun sa. Be wun bé wun be bu be nga a sasa be'n bé wun akunndan tɛ.

⁵ Be waan: «Amun man e wɔ e ko nunnun be nvle'n, nán man be bo Izraɛl dunman su be di jɔlɛ kun.»

⁶ Bé nuan ɔ'a yo kun, b'a di anuansɛ, b'a ti bé wun aniɛn kɛ be ´jaso ɔ́ wun.

⁷ I Edɔmfuɛ mun o, i Ismaɛlfuɛ mun o, i Moabfuɛ mun o, i Agarenfuɛ mun o, i Gɛbalfuɛ mun o,

⁸ i Amɔnfuɛ mun o, i Amalɛkfuɛ mun o, i Filistifuɛ mun o, i Tirfuɛ mun o.

⁹ Asirifuɛ mun be fali bé wun be ukali be su, kɛ be ´suan Lɔt i osu'n nunfuɛ'm bé bo.

¹⁰ Kle be nun kɛ a fa kleli Sizɛra nin Zabɛn be nun Kizɔn nzue ba'n i nuan lɔ'n sa. Kle be nun kɛ a kleli Madianfuɛ'm be nun sa .

¹¹ A nunnunnin be kwlaa sɔ'n An-dɔr lɔ, be sacili, be kacili angrɛ.

¹² Kle be wlengbi mma'm be nun kɛ Orɛb nin Zeɛb be liɛ'n sa. Kle be su kpɛnngbɛn'm be kwlaa be nun kɛ Zebak nin Zalmɔna be liɛ'n sa .

¹³ Sran sɔ'm be seli kɛ: «Amun man e fa Nyanmiɛn i lika mun.»

¹⁴ Min Nyanmiɛn, yo man be yo kɛ like b'ɔ seke fitɛ i kɔ'n sa, annzɛ kɛ ijre kee bɔ aunngban'n fitɛ i fa kɔ'n sa.

¹⁵ Kɛ sin fa di bo'n, yɛ kɛ ɔ fa yra oka'm bé su ninnge mun'n,

¹⁶ nian su fa aunngban dan'n su bé su, fa wɔ aunngban dan'n wlanwlan be.

¹⁷ Ee Anannganman, yo man nyannzuɛn kun be kpo nan be kaci bé nyin ɔ su.

¹⁸ Man bé nyin gua ase, man srɛ kun be sa tititi, man bé wla bo bé wun, man be yo kokloo!

¹⁹ Kpɛkuun man be si kɛ wɔ bɔ ɔ dunman'n yɛlɛ Anannganman'n, ɔ kunngba cɛ yɛ like fi nun-man ɔ́ sin asiɛ wunmuan'n su-ɔ.