Jue Mun 82 - NYANMIƐN NDƐ'N 1998

Nyanmiɛn b'ɔ yo sa i nuan su'n

1 Jue nga ti Azaf liɛ.

¹ Jue nga ti Azaf liɛ. I waan: Nyanmiɛn i wun sran mun b'a sin b'a yiɛ i, ɔ su di jɔlɛ.

² «?Cɛn onin ko yɛ amun ´yaci sran'm be ndɛ kwlɛ dilɛ-ɔ? ?Cɛn onin ko yɛ amun ´yaci be nga be fɔn'n be ndɛ fɛ manlɛ-ɔ?

³ Be nga be lɛ-man like'n, be nin aika mma mun'n, amun `bu be ndɛ mun i atin su kɛ ɔ fata'n sa. Yalɛfuɛ mun, be nin be nga be yo annvɔ'n, amun `di be jɔlɛ mun klanman.

⁴ Amun `de be nga be lɛ-man like'n ɔ nin nyrɛnnɛnfuɛ mun. Amun `de be klunwifuɛ'm bé sa nun.

⁵ Be wun-man sa fi wlɛ, yɛ be wun-man sa'm bé bo, be nanti aosin nun dunmlan-dunmlan ngbɛn. Asiɛ'n i nunnunlɛ'n ɔ'a mantan koko.

⁶ ?N seli amun kɛ amun ti kɛ Nyanmiɛn sa. N seli amun kɛ amun ti Nyanmiɛn bɔ like fi nun-mɛn i sin'n i mma mun .

⁷ Sanngɛ amun wa wu kɛ be nga'm be sa, amun wa tɔ kɛ wlengbi wie ɔ'a tɔ sa.»

⁸ Ee Nyanmiɛn, di mɛn'n i nunfuɛ'm be jɔlɛ, afin nvle'm be kwlakwla be nunfuɛ'm be ti ɔ liɛ.