Jue Mun 81 - NYANMIƐN NDƐ'N 1998

Ɔo! Sɛ ɔ ti kɛ Nyanmiɛn i mma'm be ti i aniɛn'n

1 Jue nga ti Azaf liɛ. Ɔ o jue tofuɛ'm be su kpɛn'n i fluwa'm be nun wie. Kɛ be ´to'n, be bo jru nga be yo be Gat lɔ'n wie.

¹ Jue nga ti Azaf liɛ. Ɔ o jue tofuɛ'm be su kpɛn'n i fluwa'm be nun wie. Kɛ be ´to'n, be bo jru nga be yo be Gat lɔ'n wie. I waan:

² Amun `bo sro be yi amun aklunjuɛ'n i nglo kle Nyanmiɛn b'ɔ ti e sasafuɛ'n. Amun `kpan be yi Zakɔb i Nyanmiɛn'n i ayɛ.

³ Amun `man jue su, amun `bo klɛn mma mun, amun `bo jru mun nin sanngo mun.

⁴ Anglo le kun'n, ɔ nin blɛ bɔ anglo'n ta kpa'n, blɛ sɔ mun bɔ be ti cɛn dilɛ cɛn'n, amun `fita nnɛn wɛ'n nun .

⁵ Cɛn dilɛ sɔ'n, ɔ fata kɛ Izraɛlfuɛ'm be di, Zakɔb i Nyanmiɛn'n yɛ ɔ sieli-ɔ.

⁶ Kɛ Nyanmiɛn nin Eziptfuɛ mun be nyɛnnin i wieli'n yɛ ɔ sieli mmla sɔ'n mannin Zozɛf i osu'n nunfuɛ mun-ɔn. Be kan ndɛ kun n ti, sanngɛ n si-man sran ng'ɔ kan'n. Ɔ se min kɛ:

⁷ «M'an sike ɔ wati su trɔ'n m'an jin, yɛ ɔ sa'm b'a yaci gbogbo dan'n i nun tralɛ.

⁸ I nun bɔ a o nyrɛnnɛn nun'n, a kpan flɛli min yɛ n wa deli wɔ. N jrannin nyanmiɛn b'ɔ ´kpla'n nun n tɛli wɔ su. Mɛriba nzue ti'n su lɔ'n, n sali wɔ niannin .

⁹ Min sran mun, amun `sie amun su, n ´fa sa kun n ´sie amun nyrun. Ɔo, Izraɛlfuɛ mun, amun waan amun ti-man min aniɛn'n!

¹⁰ Nán amuɛn tran amún sa nun! Nán amun su nvle kun nga'm be amuɛn mun.

¹¹ N ti Anannganman amun Nyanmiɛn. Min yɛ n ko fali amun Ezipt lɔ m bali-ɔ. Like kwlaa ng'ɔ mian amún sa'n, amun `kan kle min, n ´fa man amun.

¹² Sanngɛ min sran'm b'a ti-man min aniɛn, Izraɛlfuɛ'm be kacili be sin sili min.

¹³ Yɛ n yacili be bé nyin kekle tantrantan sɔ'n nun. Ɔ man be fali be bɔbɔ be akunndan'n be nantili !

¹⁴ Sɛ ɔ ti kɛ min sran'm be ti min aniɛn'n, sɛ ɔ ti kɛ Izraɛlfuɛ'm be nanti atin nga n kle be'n su'n,

¹⁵ wuun n jranjran-man be kpɔfuɛ'm bé nyin ase gualɛ'n wun, wuun m boli be kpɔfuɛ sɔ mun.

¹⁶ Kpɛkuun wuun Anannganman i kpɔfuɛ'm be ´yaci bé wun tulɛ akunndan'n, yɛ ɔ ´tu be fɔ.

¹⁷ Yɛ Nyanmiɛn ɔ ´man Izraɛlfuɛ'm be ble kpakpa nin awɛma nzue kpanngban.»